Puku ya Pele ya Dikgoši
1 Kgoši Dafida o be a godile e bile a tšofetše kudu. Le ge ba be ba mo apeša dikobo o be a sa ruthele. 2 Ka gona bahlanka ba gagwe ba re go yena: “Wena kgoši mong wa rena, e re re go nyakele ngwanenyana yo a sa kago a robala le monna gore a go hlankele le go go hlokomela. O tla robala kgauswi le wena e le gore wena kgoši mong wa rena o ruthele.” 3 Ba ya nageng ka moka ya Isiraele gore ba yo nyaka ngwanenyana yo mobotse gomme ba hwetša Abishaga wa Moshunema ke moka ba mo tliša go kgoši. 4 Ngwanenyana yoo e be e le yo mobotse kudu. O ile a hlankela kgoši le go e hlokomela. Eupša kgoši ga se ya ka ya robala le yena.
5 Ka nako yeo, Adonija morwa wa Hagithi o be a ikgodiša a re: “Nna ke tlo ba kgoši!” O ile a nyaka batho gore ba mo direle kariki ya ntwa, ba be ba mo nyakele le banamedi ba dipere le banna ba 50 gore ba kitime pele ga gagwe. 6 Eupša tatagwe ga se a ka a mo kgala a mmotšiša gore ke ka baka la eng a dirile seo. Le gona Adonija o be a le botse kudu e bile mmagwe o be a mmelege ka morago ga Abesalomo. 7 Adonija o ile a boledišana le Joaba morwa wa Tseruya le moperisita Abiathara gomme ba mo thuša le go mo thekga. 8 Eupša moperisita Tsadoko, Benaya morwa wa Jehoyada, moporofeta Nathane, Shimei, Rei le mašole a matla a Dafida, ga se ba ka ba thekga Adonija.
9 Ka morago, Adonija a dira sehlabelo ka dinku, dikgomo le diphoofolo tše di nonnego kgauswi le leswika la Tsohelethe yeo e lego kgauswi le Ene-rogele, gomme a laletša bana babo ka moka, e lego barwa ba kgoši gotee le banna ka moka ba Juda bao e bego e le bahlanka ba kgoši. 10 Eupša ga se a ka a laletša moporofeta Nathane, Benaya le mašole a matla a Dafida goba moratho wa gagwe Solomone. 11 Ke moka Nathane a botšiša Batseba mmago Solomone a re: “Na o kwele gore Adonija morwa wa Hagithi ke kgoši le gore Dafida mong wa rena ga a tsebe selo ka taba yeo? 12 Bjale etla ke go eletše hle gore o iphološe o be o phološe le morwa wa gago Solomone. 13 Eya go Kgoši Dafida gomme o mmotšiše o re: ‘Wena kgoši mong wa ka, na ga se wena o enetšego nna mohlanka wa gago wa re: “Morwa wa gago Solomone o tla ba kgoši ka morago ga ka, le gona ke yena a tlago go dula setulong sa ka sa bogoši?” Bjale ke ka baka la eng Adonija e le kgoši?’ 14 E tla re ge o sa bolela le kgoši, nna ke tla tsena ke go šetše morago gomme ka botša kgoši gore seo o se bolelago ke nnete.”
15 Ke moka Batseba a ya go kgoši ka kamoreng ya yona. Kgoši e be e tšofetše kudu, gomme Abishaga wa Moshunema o be a e hlankela. 16 Ka gona Batseba a inamišetša hlogo ya gagwe fase go bontšha gore o hlompha kgoši. Ke moka kgoši ya re: “O tlile go kgopela eng?” 17 Yena a re go kgoši: “Mong wa ka, na ga se wena o enetšego nna mohlanka wa gago ka leina la Jehofa Modimo wa gago wa re: ‘Solomone morwa wa gago e tla ba kgoši ka morago ga ka, e bile ke yena a tlago go dula setulong sa ka sa bogoši?’ 18 Bjale tseba gore Adonija ke kgoši gomme wena kgoši mong wa ka ga o tsebe selo ka taba yeo. 19 O dirile sehlabelo ka dipoo, diphoofolo tše di nonnego le ka dinku tše dintšhi kudu, gomme a laletša barwa ba kgoši ka moka le moperisita Abiathara gotee le Joaba molaodi wa mašole eupša ga se a laletša Solomone mohlanka wa gago. 20 Wena kgoši mong wa ka, Baisiraele ka moka ba letetše gore wena o tle o ba botše gore ke mang yo a tlago go dula setulong sa gago sa bogoši ka morago ga gago. 21 Go sego bjalo, ge wena kgoši mong wa ka o se na go hlokofala go swana le borakgolokhukhu ba gago, nna le morwa wa ka Solomone re tla lebelelwa re le bjalo ka manaba.”
22 Ge Batseba a sa bolela le kgoši, moporofeta Nathane a tsena. 23 Gateetee kgoši ya botšwa gore: “Moporofeta Nathane šo!” Ke moka Nathane a tla a khunama pele ga kgoši hlogo ya gagwe e kgwathile fase go bontšha gore o hlompha kgoši. 24 Ke moka Nathane a re: “Wena kgoši mong wa ka, na o be o itše: ‘Adonija ke yena e tlago go ba kgoši ka morago ga ka, le gona ke yena a tlago go dula setulong sa ka sa bogoši’? 25 Ka gobane lehono o theogile gore a yo dira sehlabelo ka dipoo, diphoofolo tše di nonnego le dinku tše dintšhi kudu, e bile o laleditše barwa ba kgoši ka moka le balaodi ba mašole gotee le moperisita Abiathara. Ba dutše kua e bile ba a ja le go nwa ba na le yena gomme ba duletše gore: ‘Anke Kgoši Adonija a phele nako e telele!’ 26 Eupša ga se a laletša nna mohlanka wa gago goba moperisita Tsadoko goba Benaya morwa wa Jehoyada goba Solomone mohlanka wa gago. 27 Na wena kgoši mong wa ka o dirile phetho ye o se wa ntsebiša nna mohlanka wa gago gore ke mang yo a tlago go dula setulong sa gago sa bogoši ka morago ga gago?”
28 Bjale Kgoši Dafida a re: “Mpiletšeng Batseba.” Ke moka yena a tla go kgoši gomme a ema pele ga yona. 29 Ke moka kgoši ya mo enela ya re: “Ke ikana ka Jehofa yo a phelago, yena yo a mphološitšego mathateng a ka ka moka, 30 go no swana le ge ke ile ka go enela ka leina la Jehofa Modimo wa Isiraele ka re: ‘Morwa wa gago Solomone o tla ba kgoši ka morago ga ka gomme ke yena a tlago go dula setulong sa ka sa bogoši legatong la ka,’ lehono ke tla kgonthišetša gore seo se a direga.” 31 Ke moka Batseba a inamišetša sefahlego sa gagwe fase go bontšha gore o hlompha kgoši gomme a re: “Anke Kgoši Dafida mong wa ka a phele go ya go ile!”
32 Gateetee Kgoši Dafida a re: “Mpiletšeng moperisita Tsadoko, moporofeta Nathane le Benaya morwa wa Jehoyada.” Ka gona ba tla pele ga kgoši. 33 Ke moka kgoši ya re go bona: “Sepelang le bahlanka ba ka gomme le nametšeng Solomone morwa wa ka meila* ya ka ke moka le mo išeng Gihone. 34 Ke moka moperisita Tsadoko le moporofeta Nathane ba mo tlotše moo gore e be kgoši ya Isiraele. Ka morago le letše naka le re: ‘Anke Kgoši Solomone a phele nako e telele!’ 35 Ke moka le boeng le yena gore a tle a dule setulong sa ka sa bogoši, gomme yena e tla ba kgoši legatong la ka e bile ke tla mo dira moetapele wa Isiraele le Juda.” 36 Gateetee Benaya morwa wa Jehoyada a re go kgoši: “Amene! Anke Jehofa Modimo wa kgoši mong wa ka le yena a tiišetše seo. 37 Go etša ge Jehofa a ile a thekga wena kgoši mong wa ka, anke a thekge le Solomone, le gona anke a dire gore pušo ya gagwe e be matla go feta ya gago wena Kgoši Dafida mong wa ka.”
38 Moperisita Tsadoko, moporofeta Nathane, Benaya morwa wa Jehoyada, Bakereta gotee le Bapelethe ba ya ba nametša Solomone meila ya Kgoši Dafida, ke moka ba mo iša Gihone. 39 Bjale moperisita Tsadoko a tšea lenaka la makhura ka tenteng a tlotša Solomone gore e be kgoši ke moka ba thoma go letša naka, gomme batho ka moka ba thoma go goeletša ba re: “Anke Kgoši Solomone a phele nako e telele!” 40 Ka morago ga moo, batho ka moka ba mo šala morago ba letša dinaka e bile ba thabile kudu moo lefase le ilego la bulega ka bogare ka baka la lešata la bona.
41 Adonija le batho ka moka bao a bego a ba memile ba ile ba kwa lešata leo ge ba se na go fetša go ja. Gateetee ge Joaba a ekwa modumo wa naka, a re: “Ke ka baka la eng go na le lešata le legolo motseng?” 42 Ge a sa bolela, gwa tšwelela Jonathane morwa wa moperisita Abiathara. Ke moka Adonija a re: “Tsena, ka gobane o monna wa go loka e bile o swanetše go ba o ntlišeditše ditaba tše dibotse.” 43 Eupša Jonathane a araba Adonija a re: “Ga se ka go swarela ditaba tše dibotse. Kgoši Dafida mong wa rena o beile Solomone gore e be kgoši. 44 Kgoši e laetše gore moperisita Tsadoko, moporofeta Nathane, Benaya morwa wa Jehoyada le Bakereta gotee le Bapelethe, ba mo felegetše ba mo nameditše meila ya kgoši. 45 Ke moka moperisita Tsadoko le moporofeta Nathane ba mo tlotša gore e be kgoši ba le kua Gihone. Ka morago ga moo ba boa ba thabile gomme batho ba motse ka moka ba dirile lešata le legolo. Leo ke lona lešata leo le le kwelego. 46 Le gona Solomone o dutše setulong sa bogoši. 47 Taba e nngwe ke gore bahlanka ba kgoši ba tlile go lebogiša Kgoši Dafida mong wa rena, ba re: ‘Anke Modimo wa gago a dire gore leina la Solomone le hlomphiwe go feta la gago. Le gona anke a dire gore pušo ya gagwe e be matla go feta ya gago!’ Ge kgoši e ekwa seo ya inamiša hlogo ya yona e le mpeteng. 48 Ka gona kgoši e ile ya re: ‘A go retwe Jehofa Modimo wa Isiraele, yoo lehono a kgethilego motho yo a tlago go dula setulong sa ka sa bogoši a ba a ntumelela gore ke bone seo!’”
49 Ke moka batho ka moka bao Adonija a bego a ba memile ba tšhoga gomme yo mongwe le yo mongwe a sepela. 50 Adonija le yena o be a tšhogile ka baka la Solomone. Ka gona o ile a ema a ya aletareng gomme a swara manaka a yona. 51 Solomone o ile a tsebišwa gore: “Adonija o tšhogile ka baka la gago wena Kgoši Solomone, e bile o swere manaka a aletare, o re: ‘Anke Kgoši Solomone a nkenele pele nna mohlanka wa gagwe gore a ka se mpolaye ka sabola.’” 52 Ge Solomone a ekwa seo a re: “Ge a ka itshwara gabotse, ga go moriri wa gagwe le o tee woo o tlago go wela fase. Eupša ge e ba a ka hwetšwa a na le molato, gona o tlo hwa.” 53 Ka gona Kgoši Solomone a romela batho gore ba mo tloše aletareng ba mo tliše go yena. Ke moka a ya go Kgoši Solomone gomme a mo khunamela. Ka morago ga moo, Solomone a re go yena: “Eya ntlong ya gago.”