Psalme
Ditaelo tšeo di yago go mohlahli: Diriša diletšo tša metato. Koša ya Asafa.
76 Batho ba Juda ba tseba Modimo,
Gomme leina la gagwe ke le legolo Isiraele.
2 Tente ya gagwe e kua Salema,
Gomme o dula Tsione.
3 Gona moo o robile mesebe ya bora yeo e tukago mollo,
Kotse, tšhoša le dibetša tše dingwe tša ntwa. (Selah)
4 Wena Modimo o a phadima
E bile o yo mogolo go feta dithaba tšeo go tsongwago go tšona.
5 Bao ba nago le sebete ba tšeetšwe dilo tša bona.
Ba hlokofetše,*
Go be go se na seo mašole a ka se dirago.
6 Wena Modimo wa Jakobo, ka baka la kgalemelo ya gago, dipere di hwile
Gomme banamedi ba dikariki tša ntwa le bona ba hlokofetše.
7 Wena o a boifiša,
Le gona ke mang yo a ka emago pele ga gago ge o galefile?
8 O boletše o le legodimong gore o tlo ahlola manaba a gago.
Batho bao ba dulago lefaseng ba ile ba boifa gomme ba homola
9 Ge Modimo a be a ema gore a ahlole,
Gore a phološe ba boleta ka moka ba lefaseng. (Selah)
10 Ge batho ba dira dilo ba kwatile, wena o diriša sebaka seo gore o tumišwe.
Wena o a itagafatša gaešita le ge lenaba la gago le ka dira dilo le kwatile.
11 Enelang Jehofa Modimo wa lena gomme le phetheng seo le mo enetšego sona,
Anke bohle bao ba lego kgauswi le yena, ba mo tlišetše dimpho ka poifo.
12 O tla kokobetša baetapele bao ba ikgantšhago,
A dira gore dikgoši tša lefase di boife.