Jeremia
30 Jehofa o ile a bolela le Jeremia a re: 2 “Jehofa Modimo wa Isiraele o re: ‘Ngwala ka pukung dilo ka moka tšeo ke go botšago tšona. 3 Jehofa o re: “Tsebang gore go tla nako yeo ka yona ke tlago go kgoboketša batho ba ka bao ba thopilwego, e lego batho ba Isiraele le ba Juda,” o realo Jehofa. “E bile ke tla ba bušetša nageng yeo ke e neilego borakgolokhukhu ba bona, gomme ba tlo dula mo go yona gape.”’”
4 Se ke seo Jehofa a se boditšego Isiraele le Juda.
5 Jehofa o re:
“Re kwele mekgoši ya batho bao ba llago ba tšhogile,
Ba a boifa, e bile ga go na khutšo.
6 Hle botšišang ge e ba monna a ka kgona go belega.
Bjale goreng dinatla tša banna ka moka di itshwere matheka
Go swana le mosadi yo a belegago?
Goreng difahlego tša bona ka moka di sehlefetše?
7 Joo nna! Ke ka gobane letšatši leo le a tšhoša.
Ga go na leo le swanago le lona,
Ka nako yeo Jakobo o tla be a tlaletšwe,
Eupša ke tla mo phološa.”
8 Jehofa wa madira o re: “Le gona letšatšing leo ke tla roba joko ya batho ba ka melaleng ya bona, gomme dithapo tša bona ka di kgaola tša tšwa diripa tše pedi, e bile go ka se sa ba le batho ba ditšhaba tše dingwe bao ba tlago go ba dira makgoba a bona. 9 Ba tla hlankela Jehofa Modimo wa bona gotee le Dafida yoo ke tlago go mo kgetha gore e be kgoši ya bona.”
10 Jehofa o re: “Ge e le wena mohlanka wa ka Jakobo, o se ke wa tšhoga,
E bile o se ke wa boifa wena Isiraele.
Ka gobane ke tla go phološa ke le kgole,
Ka phološa le ditlogolwana tša gago nageng yeo di thopetšwego go yona.
Jakobo o tla boa, gomme a iketla, gwa se be le yo a mo tshwenyago,
Le gona go ka se be le yo a mo tšhošago.”
11 “Ka gobane ke na le wena gore ke go phološe.
Eupša ke tla fediša ditšhaba ka moka tšeo ke phatlalaleditšego batho ba gago go tšona,
Eupša wena nka se go fediše.
Ke tla go phošolla ka tsela yeo e go swanetšego,
E bile nka se go tlogele o se wa otlwa,” o realo Jehofa.
12 Jehofa o re:
“Ga go na seo se ka alafago moo o gobetšego gona,
Le gona ntho ya gago e ka se fole.
13 Ga go na yo a ka go rapelelago gore ditaba tša gago di loke,
Ga go na selo seo se ka fodišago sešo sa gago.
Ga go na yo a ka go alafago.
14 Batho ka moka bao o ratanago le bona ba go lebetše.
Ga ba sa go nyaka.
Ka gobane ke go iteile ka kgati yeo ke itiago lenaba ka yona,
Gomme ka go otla go swana le motho yo sehlogo,
Ka baka la molato wa gago o mogolo le dibe tša gago tše dintšhi.
15 O na le lebaka lefe la go balabala ka baka la ge o gobetše?
Bohloko bja gago bo ka se fole.
Ke go dirile dilo tše ka baka la molato wa gago o mogolo
Le dibe tša gago tše dintšhi.
16 Ka gona batho ka moka bao ba go fedišago le bona ba tla fedišwa,
Ge e le manaba a gago ka moka, le ona a tla išwa bothopša.
Le gona bao ba go utswetšago dilo, le bona ba tla utswetšwa,
Ge e le bao ba go tšeelago dilo, le bona ba tla tšeelwa dilo.”
17 “Eupša ke tla go alafa, e bile ka fodiša dintho tša gago,” o realo Jehofa,
“Le ge ka moka ba ile ba gana go go amogela,
Gomme ba go bitša Tsione, yo go sego motho yo a mo nyakago.’”
18 Jehofa o re:
“Bjale ke tlo boela ditenteng tša Jakobo gore ke kgoboketše bao ba thopilwego,
Gomme ke tla kwela bohloko mafelo ao Jakobo a dulago go ona.
Motse o tla agwa leswa godimo ga marope a wona,
Le gona moago wo o šireleditšwego o tla ema mo o swanetšego go ema gona.
19 Ba tla opela koša ya go leboga, gomme ba goeletša ba thabile.
Ke tla ba dira gore e be ba bantšhi, gomme ba ka se fokotšege.
Ke tla ba oketša gore e be ba bantšhintšhi,
Gomme e ka se be ba banyenyane ka palo.
20 Bana ba bona e tla ba ba bantšhi, go no swana le nakong e fetilego,
Ke tla ba dira gore e be setšhaba se matla pele ga ka.
E bile ke tla otla batho ka moka bao ba ba gatelelago.
21 Moetapele wa bona o tla tšwa setšhabeng sa bona,
Le mmuši wa bona o tla tšwa go bona.
Ke tla dira gore a be kgauswi le nna, gomme o tla mpatamela.”
“Bjale ke mang yo a ka bago le sebete sa go mpatamela?” O realo Jehofa.
22 “Lena le tla ba batho ba ka, gomme nna ke tla ba Modimo wa lena.”
23 Bonang! Ledimo la Jehofa le tla tšubutla le galefile,
Le tla tšubutla ka godimo ga dihlogo tša batho ba babe go swana le ledimo le šoro.
24 Bogale bja Jehofa bo ka se gomele morago
Ntle le gore a phethe seo pelo ya gagwe e nyakago go se dira.
Lena le tla kwešiša taba ye mehleng ya bofelo.