Jeremia
12 Wena Jehofa, o Modimo yo a lokilego,
Ruri o lokile ge ke go llela le ge ke bolela le wena ka dikahlolo tša gago.
Eupša ke ka baka la’ng batho ba babe bona dilo di ba sepelela gabotse,
Le gona ke ka baka la’ng baradia ba sa tshwenyege ka selo?
2 O ba bjetše, le gona ba tsemile medu.
Ba godile e bile ba tšweleditše dienywa.
Ba dula ba bolela ka wena, fela dipelo tša bona di kgole le wena.
3 Eupša wena Jehofa, o ntseba gabotse e bile o a mpona.
O hlahlobile pelo ya ka gomme wa e hwetša e tshepagala.
Ba hlaole go swana le dinku tšeo di yago go hlabiwa,
Gomme o ba beele ka thoko bakeng sa letšatši la go bolawa.
4 Naga e tlo omelela go fihlela neng,
Gomme dimela tšona tša pona go fihla neng?
Dibata le dinonyana di fedišitšwe
Ka baka la batho ba babe bao ba dulago nageng yeo,
Ka gobane ba itše: “Ga a bone seo se tlago go re diragalela.”
5 Ge e ba le lapišwa ke go kitima ka maoto,
Bjale le ka kgona bjang go kitima le dipere?
Le nagana gore le šireletšegile nageng ya khutšo,
Eupša le tla dira’ng ge le le sethokgweng se se bofaganego seo se lego kgauswi le Noka ya Jorodane?
6 Ka gobane gaešita le banabeno, bona ba lapa la tatago,
Ba go radiile.
Ba go hlabetše mašata.
O se ke wa ba tshepa,
Le ge ba ka go botša dilo tše dibotse.
7 “Ke tlogetše ntlo ya ka, ka ba ka lahla le bohwa bja ka.
Ke neetše motho yo ke mo ratago manabeng a gagwe.
8 Bohwa bja ka bo mphetogetše, bo bjalo ka tau sethokgweng.
Bo a rora ge bo mpona.
Ke ka baka leo ke bo hloilego.
9 Mo go nna, bohwa bja ka bo swana le nonyana ya mebalabala ya go ja nama,
Dinonyana tše dingwe tša go ja nama di a bo dikanetša gomme tša bo hlasela.
Lena dibata ka moka tša naga, etlang le kgobokaneng,
Etlang le jeng.
10 Badiši ba bantšhi ba sentše mašemo a ka a diterebe,
Ba gataketše karolo ya ka ya naga.
Karolo ya ka ya naga yeo ke e ratago ba e fetošitše lešoka.
11 E fetogile lešope.
E senyegile,
Mo go nna ke lešope.
Naga ka moka e dirilwe lešope,
Eupša ga go na motho yo a naganišišago ka taba yeo.
12 Batho bao ba senyago ba tlile ka ditsela ka moka tšeo go sepelwago go tšona lešokeng,
Ka gobane sabola ya Jehofa e bolaya batho go tloga karolong e nngwe ya naga go ya go e nngwe.
Ga go na motho yo a nago le khutšo.
13 Ba bjetše korong, eupša ba buna meetlwa.
Ba šomile ka thata, eupša ba bereketše mahala.
Ba tla hlabišwa dihlong ke dilo tšeo ba di bunnego
Ka baka la ge Jehofa a galefile kudu.”
14 Se ke seo Jehofa a se bolelago ka baagišane ba ka ka moka ba babe bao ba kgwathilego bohwa bjoo ke dirilego gore setšhaba sa ka sa Isiraele se bo tšee. O re: “Bjale ke nna yo ke ba ntšha mo nageng ya bona, e bile ke tla tloša batho ba Juda gare ga bona. 15 Eupša ka morago ga gore ke ba tloše, ke tla ba gaugela gape, ka ba ka bušetša yo mongwe le yo mongwe bohwa bja gagwe le naga ya gagwe.”
16 “Le gona, ge e ba ba ka ithuta ka ditsela tša batho ba ka, gomme ba ena ka leina la ka ba re: ‘Re ikana ka Jehofa yo a phelago,’ go no swana le ge ba rutile batho ba ka go ena ka Baali, gona le bona ba tla fiwa naga gare ga batho ba ka. 17 Eupša ge e ba ba ka se kwe, gona ke tla tloša setšhaba seo, ka se tumola ka ba ka se fediša,” o realo Jehofa.