Joshua

23 Ka morago ga matšatši a mantši Jehofa a khutšišitše Baisiraele go manaba a bona ka moka, ge Joshua a be a šetše a tšofetše e bile a le kgauswi le go hlokofala, 2 Joshua o ile a bitša Baisiraele ka moka, banna ba bona ba bagolo, baetapele ba setšhaba, baahlodi gotee le bahlankedi ba setšhaba, gomme a re go bona: “Ke tšofetše e bile ke kgauswi le go hlokofala. 3 Le gona le bone dilo ka moka tšeo Jehofa Modimo wa lena a di dirilego ditšhaba tše ka moka gore a le šireletše, ka gobane Jehofa Modimo wa lena ke yena yo a bego a le lwela. 4 Ke rakile batho bao ba bego ba dula ka bodikela bja Noka ya Jorodane go fihla Lewatleng le Legolo,* gomme ka le abela naga yeo ka matengwa. Batho ba bangwe ba sa dula nageng yeo, eupša naga yeo ke ya lena. 5 Le gona Jehofa Modimo wa lena ke yena a bego a dula a raka ditšhaba tšeo pele ga lena, gomme a di amoga naga gore le tle le dule go yona ke moka la tšea naga yeo la dula go yona go etša ge Jehofa Modimo wa lena a be a le tshepišitše.

6 “Le swanetše go ba le sebete e le gore le kgone go kwa le go latela dilo ka moka tšeo di ngwadilwego ka pukung ya Molao wa Moshe. Le gona le swanetše go dira selo se sengwe le se sengwe seo se ngwadilwego ka pukung yeo. 7 E bile ga se la swanela go tlwaelana le ditšhaba tšeo di šetšego nageng yeo le dulago go yona. Le se ke la bitša maina a medimo ya tšona goba la dira dikeno ka ona e bile le se ke la e hlankela goba la e khunamela. 8 Eupša le swanetše go dula le botegela Jehofa Modimo wa lena, go etša ge le dirile bjalo go fihla le lehono. 9 Jehofa o tla raka ditšhaba tše dikgolo le tše matla pele ga lena ka gobane ga go na motho yo a ilego a lwa le lena a le fenya go fihla le lehono. 10 Monna o tee gare ga lena o tla fenya banna ba 1 000 (sekete) ka gobane Jehofa Modimo wa lena ke yena a le lwelago, go etša ge a le tshepišitše. 11 Le dule le kgonthišetša gore le rata Jehofa Modimo wa lena.

12 “Eupša ge e ba le ka tlogela Modimo gomme la latela ditšhaba tšeo di šetšego nageng yeo le dulago go yona, la nyalelana le tšona gomme la gwerana le tšona, 13 gona le tsebe gore Jehofa Modimo wa lena a ka se sa amoga ditšhaba tše naga pele ga lena. Go e na le moo, dinaga tšeo di tla ba bjalo ka molaba go lena le sefepi seo se le bethago mekokotlo le meetlwa ka mahlong a lena, go fihla le hwelela nageng yeo Jehofa Modimo wa lena a le neilego yona.

14 “Bjale le a bona gore ke kgauswi le go hlokofala, e bile le tseba gabotse ka dipelo tša lena ka moka le ka meoya* ya lena ka moka gore ga go le lentšu letee leo le sa kago la phethagala go ditshepišo ka moka tšeo Jehofa Modimo wa lena a le tshepišitšego tšona. Ka moka ga tšona le di bone di phethega. Ga go lentšu letee la ditshepišo tšeo leo le sa kago la phethega. 15 Go etša ge dilo ka moka tše dibotse tšeo Jehofa Modimo wa lena a bego a le tshepišitše tšona di ile tša direga, gona Jehofa o tla le tlišetša dilo ka moka tše mpe tšeo a le tshepišitšego tšona gomme a le tloša nageng ye e botse yeo Jehofa Modimo wa lena a le neilego yona. 16 Ge e ba le ka se phethe kgwerano yeo Jehofa Modimo wa lena a le laetšego gore le e phethe, le ge le ka ya la hlankela medimo e mengwe gomme la e khunamela, gona Jehofa o tla le galefela kudu gomme a dira gore le hwe ka pela nageng e botse yeo a le filego yona.”