Psalme
96 Opelelang Jehofa koša e mpsha.
Opelelang Jehofa, lena batho ka moka bao ba dulago lefaseng.
2 Opelelang Jehofa, gomme le rete leina la gagwe.
Letšatši le letšatši, bolelang ditaba tše dibotse tša kamoo a phološago batho.
3 Tsebišang ditšhaba gore o na le matla a magolo,
Le tsebiše batho ka moka ka mediro ya gagwe e makatšago.
4 Jehofa ke yo mogolo, e bile o swanelwa ke go tumišwa kudu.
O swanelwa ke go hlomphiwa kudu go feta medimo e mengwe ka moka.
5 Medimo ka moka ya batho ba bangwe ga e na mohola.
Eupša Jehofa ke yena a dirilego magodimo.
6 O a hlomphega e bile o na le letago.
Sekgethwa sa gagwe ke se sebotse gomme matla a gagwe a go sona.
7 Retang Jehofa lena malapa ka moka a mo lefaseng,
Retang Jehofa ka gobane o na le letago le matla.
8 Efang Jehofa letago leo le swanelago leina la gagwe.
Etlang le mpho gomme le tsene ntlong ya gagwe.
9 Khunamelang Jehofa le apere diaparo tša lena tše dikgethwa.
Lefase ka moka le swanetše go mo hlompha.
10 Botšang ditšhaba ka moka gore: “Jehofa bjale ke Kgoši.
O dirile lefase gore le tie gomme le ka se šikinyege.
O tla ahlola batho ka go loka.”
11 Anke magodimo a thabe, le lefase le thabe.
Anke lewatle le tšohle tšeo di lego go lona di mo rete.
12 Anke naga le tšohle tše di lego go yona di thabe.
Le gona, anke mehlare ka moka ya sethokgwa e goeletše ka lethabo
13 Pele ga Jehofa ka gobane o a tla,*
O tlo ahlola lefase.
O tla ahlola badudi ba lefase ka go loka
Gomme a ahlola batho ka go tshepega.