Puku ya Pele ya Dikgoši

17 Eliya* wa Mothishibe yo a bego a dula Gileada, o ile bolela le Ahaba a re: “Ke ikana ka Jehofa Modimo wa Isiraele yo a phelago yoo ke mo hlankelago gore mengwageng ye go ka se we phoka goba gwa na pula, ka ntle le ge nka bolela gore go be bjalo!”

2 A kwa lentšu la Jehofa le re: 3 “Tloga mo o ye ka bohlabela gomme o ikute Moeding wa Kirithe woo o lego ka bohlabela bja Noka ya Jorodane. 4 O nwe meetse a moeding gomme ke tla romela magokobu gore a go tlišetše dijo moo.” 5 Ka yona nako yeo o ile a sepela gomme a dira go ya le kamoo lentšu la Jehofa le mo laetšego ka gona. O ile a ya a dula Moeding wa Kirithe woo o lego ka bohlabela bja Noka ya Jorodane. 6 Le gona, magokobu a be a mo tlišetša senkgwa le nama mesong e mengwe le e mengwe le mantšiboa a mangwe le a mangwe, gomme a enwa meetse a moeding. 7 Eupša ka morago ga matšatši a itšego moedi woo o ile wa pšha ka gobane go be go sa ne pula moo nageng.

8 Bjale lentšu la Jehofa la re go yena: 9 “Eya Tsarepata ya Sidone gomme o dule moo. Ke tla laela mosadi yo mongwe wa mohlologadi gona moo gore a go fe dijo.” 10 Ka gona a ya Tsarepata, ge a fihla keiting ya motse a bona mohlologadi a topelela dikgong. Ke moka a re go yena: “Ke kgopela o ntlišetše meetse a manyenyane ka komiki gore ke nwe.” 11 Ge mohlologadi yoo a eya go mo kgela meetse, Eliya a re go yena: “Ke kgopela o ntlišetše le senkgwanyana.” 12 Ge a realo, mosadi yoo a re go yena: “Ke ikana ka Jehofa Modimo wa gago yo a phelago gore ga ke na senkgwa, ke šetše feela ka folouru yeo e ka tlalago seatla yeo e lego ka sebjaneng se segolo le makhura a manyenyane ao a lego ka sebjaneng se senyenyane. Bjale ke topelela dikgong tše sego kae gore ke yo apeela nna le morwa wa ka dijo. Tše e tla ba dijo tša rena tša mafelelo, ka morago ga moo re tlo hwa.”

13 Ke moka Eliya a re go yena: “O se ke wa tšhoga. Eya gae o dire seo o se boletšego. Eupša o thome pele ka go ntirela senkgwanyana sa nkgokolo ka dilo tšeo o nago le tšona ke moka o ntlišetše sona. Ka morago ga moo e be gona o direlago wena le morwa wa gago. 14 Ka gobane Jehofa Modimo wa Isiraele o re: ‘Folouru yeo e lego ka sebjaneng se segolo e ka se fele, le makhura ao a lego ka sebjaneng se senyenyane a ka se fele go fihlela letšatšing leo Jehofa a tlago go neša pula.’” 15 Ka gona a ya a dira seo Eliya a mmoditšego sona, gomme yena, ba lapa la gagwe le Eliya ba ile ba fetša nako e telele ba na le dijo. 16 Folouru yeo e bego e le ka sebjaneng se segolo ga se ya ka ya fela, le makhura ao a bego a le ka sebjaneng se senyenyane ga se a ka a fela, go diregile feela bjalo ka ge Jehofa a ile a bolela a diriša Eliya.

17 Ka morago ga dilo tše, morwa wa mosadi yoo o ile a lwala kudu moo a ilego a feleletša a hlokofala. 18 Ke moka mosadi yoo a re go Eliya: “Wena monna wa Modimo wa nnete, ke go dirile eng? Na o tlile mo go tlo nkgopotša ka molato wa ka le go tlo bolaya morwa wa ka.” 19 Eupša Eliya a re go yena: “Tliša morwa wa gago mo go nna.” Ke moka a mo tšea go mmagwe a mo kuka gomme a ya le yena ka phapošing ya ka godimo yeo a bego a dula ka go yona, a mmea mpeteng wa gagwe. 20 A rapela Jehofa ka go hlaboša a re: “Wena Jehofa Modimo wa ka, na o dumelela gore mosadi yo a nkamogetšego le yena a tlaišege? Ke ka baka la eng o dumelela gore morwa wa gagwe a hwe?” 21 Ke moka a gokarela ngwana yoo gararo gomme a rapela Jehofa ka go hlaboša a re: “Wena Jehofa Modimo wa ka, hle anke o dire gore ngwana yo a boele a phele.” 22 Jehofa o ile a theetša thapelo ya Eliya, gomme ngwana yoo a boela a phela gape. 23 Eliya a tloga le ngwana yoo ka phapošing ya ka godimo a mo iša ka ntlong gomme a mo fa mmagwe. Ke moka Eliya a re: “Bona, morwa wa gago o a phela.” 24 Ke moka mosadi yoo a re go Eliya: “Bjale ke a bona gore ka nnete o monna wa Modimo le gore lentšu la Jehofa leo o le boletšego ke la nnete.”