Jeremia
14 Jehofa o ile a nea Jeremia molaetša mabapi le komelelo a re:
2 Juda e a lla le dikeiti tša yona di senyegile.
Di wetše fase,
Gomme sello sa batho ba Jerusalema se fihlile magodimong.
3 Balaodi ba Jerusalema ba romile bahlanka ba bona gore ba yo ga meetse.
Bahlanka bao ba ya didibeng gomme ba se hwetše meetse.
Ba boa le dilo tša bona tša go ga meetse di se na selo.
Ba hlabilwe ke dihlong e bile ba swabile,
Gomme ba khupeditše dihlogo tša bona.
4 Balemi ba hlabilwe ke dihlong,
E bile ba khurumeditše dihlogo,
Ka gobane naga e omeletše kudu ka ge pula e sa ne.
5 Gaešita le kgama* e tlogela ngwana wa yona yoo e sa tšwago go mo tswala,
Ka ge go se na bjang nageng.
6 Ditonki tša nageng tšona di eme mebotong yeo e sa melago selo,
Di hemelana go swana le diphukubje,
Mahlo a tšona a gohlometše ka gobane ga go na dimela.
7 Le ge diphošo tša rena di bontšha gore re na le molato,
Wena Jehofa, dira se sengwe ka baka la leina la gago,
Ka gobane re dirile dilo tše dintšhi tšeo di bontšhago gore ga re go botegele.
Re senyeditše wena.
8 Wena yo Isiraele e go holofetšego, wena Mophološi wa yona nakong ya tlalelo,
Ke ka baka la’ng o swana le motho yo a sa tšwego nageng ye,
O le bjalo ka motho yo a etago, yo a robalago bošego bjo botee feela?
9 Ke ka baka la’ng o swana le monna yo a tšhogilego,
E bile o swana le monna yo bogale yo a sa kgonego go phološa motho?
Wena Jehofa o gare ga rena,
Gomme re bitšwa ka leina la gago.
O se ke wa re lahla.
10 Jehofa o bolela mabapi le batho ba o re: “Ba rata go ralala, ga ba kgone go dula felo gotee. Ka gona ga ba kgahle Jehofa. Bjale o tla gopola melato ya bona gomme a ba otla ka baka la dibe tša bona.”
11 Ke moka Jehofa a re go nna: “O se ke wa rapelela gore batho ba ba diragalelwe ke dilo tše dibotse. 12 Le ge ba ka itima dijo, nka se theetše dikgopelo tša bona tšeo ba di dirago ka pelo ka moka, le gona le ge ba dira sebego se se feletšego sa go fišwa le sebego sa mabele, di ka se nkgahle, ka gobane ke tla ba fediša ka sabola, tlala le leuba la bolwetši.”
13 Ke moka ka re: “Joo, Mmuši Morena Jehofa! Šefa baporofeta ba re go bona: ‘Le ka se bolawe ka sabola gomme le ka se welwe ke tlala, eupša Modimo ke yena a tlago go le nea khutšo ya nnete lefelong le.’”
14 Ke moka Jehofa a re go nna: “Baporofeta ba porofeta maaka ka leina la ka. Ga se ka ba roma, e bile ga se ka ba laela goba ka bolela le bona. Ba le porofetela dilo tša maaka le tšeo di se nago mohola tšeo ba di bonago ka boloi le tšeo di tšwago dipelong tša bona tša boradia. 15 Ka gona Jehofa o boletše gore: “Ge e le mabapi le baporofeta bao ba porofetago ka leina la ka, bao ke sego ka ba roma bao ba rego le ka se bolawe ka sabola goba ka tlala nageng ye, tsebang gore baporofeta bao ba tla fedišwa ka sabola le ka tlala. 16 Le gona bona batho bao ba ba porofetelago ba tla lahlelwa ka ntle diterateng tša Jerusalema ka ge ba tla be ba bolailwe ke tlala le sabola, e bile bona, basadi ba bona le barwa ba bona le barwedi ba bona go ka se be le motho yo a ba bolokago. Ke tla ba tlišetša masetlapelo ka baka la dilo tše mpe tšeo ba di dirilego.’
17 “O ba botše molaetša wo:
‘Anke mahlo a ka a dule a elela megokgo bošego le mosegare,
Ka gobane kgarebe yeo e lego morwedi wa batho ba ka e otlilwe gabohloko,
Gomme e gobetše kudu.
18 Ge ke eya nageng go yo e lebelela,
Ke bona bao ba bolailwego ga sehlogo ka sabola!
Le gona ge ke tsena motseng,
Ke bona bao ba swerwego ke malwetši ka baka la tlala!
Ka gobane baporofeta gotee le baperisita ba sepelasepela nageng yeo ba sa e tsebego.’”
19 Na Juda o e lahletše sa ruri, goba na Tsione e a go šišimiša?
Ke ka baka la’ng o re bethile moo e lego gore ga re kgone le go fola?
Re be re holofetše gore go tla ba le khutšo, eupša ga go na selo se sebotse seo se tlilego,
Le gona re be re holofetše gore re tla fodišwa, eupša ke letšhogo feela.
20 Wena Jehofa, re a dumela gore re dirile dilo tše mpe,
E bile re amogela le melato ya borakgolokhukhu ba rena,
Ka gobane re senyeditše wena.
21 O se ke wa re lahla ka baka la leina la gago,
O se ke wa nyatša setulo sa gago sa bogoši sa letago.
Gopola kgwerano yeo o e dirilego le rena gomme o se ke wa e fetogela.
22 Na go na le medingwana yeo e se nago mohola ya ditšhaba yeo e ka nešago pula,
Goba na magodimo a ka no neša pula ka bo ona?
Na ga se wena feela o e nešago, wena Jehofa Modimo wa rena?
Re holofetše wena,
Ka gobane ke wena yo a dirilego dilo tše ka moka.