Jeremia

37 Kgoši Tsedekia morwa wa Josia, o ile a thoma go buša legatong la Konia morwa wa Jehoyakima ka gobane Kgoši Nebukadinetsara wa Babilona o be a mo dirile kgoši nageng ya Juda. 2 Eupša Tsedekia le bahlanka ba gagwe gotee le batho ba mo nageng, ga se ba ka ba theetša dilo tšeo Jehofa a di boletšego a diriša moporofeta Jeremia.

3 Kgoši Tsedekia a roma Jehukale morwa wa Shelemia le Tsefanya morwa wa Maaseya yo e bego e le moperisita go moporofeta Jeremia, gore ba re go yena: “Hle, re rapelele go Jehofa Modimo wa rena.” 4 Jeremia o be a itshepelela a lokologile mo gare ga batho, ka gobane ba be ba se ba tšwa ba mo iša teronkong. 5 Ka nako yeo Bakaladea ba be ba dikaneditše motse wa Jerusalema, gomme ba kwa pego ya gore mašole a Farao ao a tšwago Egepeta a a tla. Ka gona ba tlogela go hlasela motse woo wa Jerusalema. 6 Ke moka Jehofa a bolela le moporofeta Jeremia a re: 7 “Jehofa Modimo wa Isiraele o re: ‘Le botše kgoši ya Juda yeo e le romilego go nna gore le tlo mpotšiša le re: “Tseba gore mašole a Farao ao a tlago go go thuša, a tlo swanelwa ke go boela nageng ya ona ya Egepeta. 8 Ke moka Bakaladea ba tla boa ba lwa le motse wo, ba o thopa gomme ba o fiša ka mollo.” 9 Jehofa o re: “Le se ke la iphora la re: ‘Bakaladea ba tla sepela ba se sa lwa le rena,’ ka gobane ba ka se sepele. 10 Le ge le be le ka bolaya mašole ka moka a Bakaladea ao a lwago le lena gomme gwa šala feela banna bao ba gobetšego, ba be ba tlo no tsoga ditenteng tša bona gomme ba fiša motse wo ka mollo.”’”

11 Ge mašole a Bakaladea a tlogetše go lwa le Jerusalema ka baka la mašole a Farao, 12 Jeremia o ile a tloga Jerusalema a ya nageng ya Benjamini gore a yo hwetša bohwa bja gagwe gare ga batho ba gabo. 13 Eupša ge moporofeta Jeremia a fihla Keiting ya Benjamini, motho yo a bego a hlokometše batho bao ba letago motse, yoo leina la gagwe e bego e le Iriya morwa wa Shelemia morwa wa Hanania, a swara moporofeta Jeremia gomme a re: “Wena o neelwa go Bakaladea!” 14 Eupša Jeremia a re: “Seo ga se nnete! Nka se neelwe go Bakaladea.” Eupša Iriya a se ke a mo theetša. Ka gona a swara Jeremia a mo iša go dintona. 15 Dintona di ile tša galefela Jeremia, tša mo itia gomme tša mo golega ntlong ya Jehonathane yo e bego e le mongwaledi. Ntlo yeo e be e fetošitšwe teronko. 16 Jeremia o ile a tsenywa ka moleteng wo a bego a golegilwe go wona, a tsenywa ka phapošing ya ka garegare gomme a tswalelelwa moo ka matšatši a mantšhi.

17 Ke moka Kgoši Tsedekia a romela batho gore ba yo tšea Jeremia, gomme kgoši ya mmotšiša dipotšišo ka sephiring ka ntlong ya yona ya re: “Na go na le seo Jehofa a go boditšego sona?” Jeremia a araba a re: “Ee, se gona!” Ke moka a tšwela pele a re: “Wena o tlo neelwa go kgoši ya Babilona!”

18 Le gona Jeremia a re go kgoši Tsedekia: “Wena le bahlanka ba gago gotee le setšhaba sa gago, ke le senyeditše eng mo e bilego le ntsentše teronkong? 19 Bjale ba kae baporofeta ba lena bao ba le porofetetšego ba re: ‘Kgoši ya Babilona e ka se lwe le lena goba ya lwa le naga ye’? 20 Wena kgoši mong wa ka, theetša hle! Hle theetša ge ke kgopela gore o nkgaugele, o se ke wa mpušetša ntlong ya Jehonathane yo e lego mongwaledi, go sego bjalo ke tlo hwela moo.” 21 Bjale Kgoši Tsedekia a laela gore Jeremia a golegwe Lapeng la Motho yo a Letago, gomme letšatši le letšatši o be a fiwa borotho bjo bo tšwago seterateng sa batho bao ba pakago marotho, go fihlela borotho bo fedile mo motseng. Ke moka Jeremia a tšwela pele a dula Lapeng la Motho yo a Letago.