Maleaki

1 Molaetša o bohlokwa šo:

Mantšu ao Jehofa a laetšego Maleaki* gore a a botše Isiraele šea:

2 Jehofa o re: “Ke le bontšhitše gore ke a le rata.”

Eupša lena la re: “O re bontšhitše bjang gore o a re rata?”

Jehofa a re: “Na Esau e be e se buti wa Jakobo? Eupša nna ke ratile Jakobo, 3 gomme Esau yena ka mo hloya. Le gona ke dirile dithaba tša gagwe gore e be mašope gomme ka dira gore naga yeo e bego e le bohwa bja gagwe e dulwe ke diphukubje tša lešoka.”

4 “Le ge Baedomo ba re: ‘Re pšhatlagantšwe, eupša re tla boa gomme ra tsošološa mašope.’ Jehofa wa madira o re: ‘Ba tla aga, eupša nna ke tla phušola. E bile ba tla bitšwa “naga ya batho ba go dira dilo tše mpe” le “batho bao Jehofa a ba ahloletšego sa ruri.” 5 Le tla bona se gomme la re: “Anke Jehofa a hlomphiwe nageng ya Isiraele.”’”

6 “‘Morwa o hlompha tatagwe, gomme mohlanka le yena o hlompha mong wa gagwe. Ge e ba ke le tatago lena, gona tlhompho yeo e ntshwanetšego e kae? Le gona, ge e ba ke le mong wa lena,* gona poifo yeo e ntshwanetšego e kae?’ Jehofa wa madira o bolela le lena baperisita bao le nyatšago leina la gagwe.

“‘Eupša lena le re: “Re nyaditše leina la gago bjang?”’

7 “‘Ka go tliša dijo tšeo di šilafetšego aletareng ya ka.’

“‘Lena le re: “Re go šilafaditše bjang?”’

“‘Ka ge le re: “Ga se ra swanela go hlompha tafola* ya Jehofa.” 8 Jehofa wa madira o re: “Le gona, ge le tliša phoofolo yeo e foufetšego gore e be sehlabelo le re: “Ga se phošo.” Le ge le tliša phoofolo yeo e hlotšago goba yeo e babjago le re: “Ga se phošo.”’”

“Ke kgopela gore le leke go di iša go mmuši wa lena. Na o tla le thabela goba a le amogela ka botho?”

9 “Bjale, kgopelang Modimo gore a re kwele bohloko.” Jehofa wa madira o re: “Na ke tla le kwela bohloko ka baka la dibego tšeo le mphago tšona?”

10 Jehofa wa madira o re: “Ke mang mo go lena yo a ikemišeditšego go tswalela mejako,* ka gobane ge le gotša mello aletareng ya ka le nyaka go patelwa? Ga le nkgahle, e bile ga ke thabišwe ke dihlabelo tšeo le ntirelago tšona.”

11 Jehofa wa madira o re: “Leina la ka le tla hlomphiwa ditšhabeng, go tloga ka bohlabela go fihla ka bodikela. Lefelong le lengwe le le lengwe, leina la ka le tla direlwa dihlabelo le go išetšwa dibego e le mpho e sekilego. Ka gobane leina la ka e tla ba le legolo ditšhabeng.”

12 “Eupša le nyatša leina la ka* ka go bolela gore: ‘Tafola ya Jehofa e šilafetše. Le gona, dienywa tša yona le dijo ga se tša swanela go hlomphiwa.’ 13 E bile le re: ‘Mošomo wo o re lapišitše!’ La ba la nkgelela dibego tšeo le sentše difahlego,” o realo Jehofa wa madira. “E bile le ntlišetša dimpho ka diphoofolo tša go utswiwa, tša go hlotša le tšeo di babjago. Na ke swanetše go di amogela?” o realo Jehofa.

14 Jehofa wa madira o re: “Go rogakilwe yo a enelago Jehofa gomme a mo direla sehlabelo ka phoofolo yeo e fokolago mola mohlapeng wa gagwe go na le phoofolo e tona yeo e phetšego gabotse. Ka gobane ke nna Kgoši e kgolo e bile ditšhaba di tla boifa leina la ka le go le hlompha.”