Hosea
11 “Isiraele ke mo ratile e sa le mošemane.
Ke ile ka bitša morwa wa ka kua Egepeta.
Ba ile ba dula ba direla diswantšho tša Baali dihlabelo,
E bile ba direla diswantšho tše di betlilwego dihlabelo.
3 Le gona ke nna ke rutilego Baefuraime go sepela, ka ba kuka ka matsogo a ka,
Eupša ba be ba sa lemoge gore ke ba alafile.
4 Ke ile ka ba gogela go nna ka lerato le ka botho bjalo ka ge eka ke ba goga ka thapo.
Ke be ke le bjalo ka yo a ba tlošago joko melaleng ya bona,*
Gomme ka ba bontšha botho ka go išetša yo mongwe le yo mongwe wa bona dijo.
5 Ba ka se boele nageng ya Egepeta
Eupša Asiria e tla ba kgoši ya bona ka gobane ba ganne go boela go nna.
6 Manaba a tla fediša metse ya bona ka sabola,
Gomme a roba ditšhipi tšeo di thekgilego dikeiti tša bona, le go ba fediša ka baka la maano a bona.
7 Batho ba ka ba ikemišeditše go se mpotegele.
Le ge ba biletšwa go yo a phagamego, ga go na yoo a emelelago.
8 “Nka go lahla bjang wena Efuraime?
Nka lesa bjang go go phološa wena Isiraele?
Nka go swantšha bjang le Adema?
Nka go dira bjang tše ke di dirilego Tseboima?
Pelo ya ka e fetogile,
E bile ke nyaka go go kwela bohloko.
9 Nka se ke ka le galefela kudu.
Nka se ke ka fediša Efuraime gape
Ka gobane ke nna Modimo, ga se nna motho,
Ke Mokgethwa gare ga lena,
Nka se tle go lena ke galefile.
10 Ba tla rapela Jehofa gape, gomme Yena o tla rora bjalo ka tau.
Ge a rora, barwa ba gagwe ba tla tla go yena ba thothomela ba etšwa bodikela.
11 Ba tlo tšwa Egepeta ba thothomela go etša nonyana
Gomme ba tlo tšwa nageng ya Asiria go swana le leeba.
Ke tla ba dudiša ka dintlong tša bona,” o realo Jehofa.
12 “Efuraime e dula e mpotša maaka,
Ge ke re ke a retologa, ke bona bofora bja Isiraele.
Eupša Juda e sa dutše e sepela le Modimo,
E bile e botegela Mokgethwakgethwa.”