Genesi

7 Ka morago ga moo Jehofa a re go Noa: “Wena le lapa la gago ka moka tsenang ka arekeng, ka gobane ke wena feela ke bonego o lokile gare ga batho bao o phelago le bona. 2 O tšee diphoofolo tše šupago go mehuta ka moka ya diphoofolo tše di hlwekilego, e tona le e tshadi. Ke moka go diphoofolo ka moka tšeo di sa hlwekago o tšee tše pedi feela, e tona le e tshadi. 3 Le gona go dinonyana tše di fofago magodimong o tšee tše šupago, tše tona le tše tshadi, gore mehuta ya tšona e dule e le gona lefaseng ka moka. 4 Ka gobane go šetše matšatši a šupago feela gore ke neše pula mo lefaseng ka matšatši a 40 le mašego a 40. Ke tla fediša selo se sengwe le se sengwe seo se phelago seo ke se dirilego mo lefaseng.” 5 Ke moka Noa a dira dilo ka moka tšeo Jehofa a mo laetšego tšona.

6 Noa o be a na le mengwaga e 600 (makgolotshela) ge meetsefula a be a etla mo lefaseng. 7 Noa a tsena ka arekeng a na le barwa ba gagwe, mosadi wa gagwe le basadi ba barwa ba gagwe pele ga ge go etla meetsefula. 8 Gwa tsena le phoofolo e nngwe le e nngwe e hlwekilego le phoofolo e nngwe le e nngwe e sa hlwekago, dinonyana le diphedi ka moka tšeo di gagabago. 9 Tša tsena ka arekeng e le tše pedi tše pedi moo Noa a bego a le gona, e le e tona le e tshadi, go etša ge Modimo a ile a laela Noa. 10 Ka morago ga matšatši a šupago, meetsefula a tla lefaseng.

11 Ka letšatši la bo-17 la kgwedi ya bobedi ka ngwaga wa bo-600 (makgolotshela) Noa a phela, Modimo o ile a bula mafelo ka moka ao a nago le meetse a mantši gomme a thibolla le meetse a mantši a magodimong ka lona letšatši leo. 12 Pula ya matlorotloro ya tšhologa mo lefaseng ka matšatši a 40 le mašego a 40. 13 Ka lona letšatši leo, Noa o ile a tsena ka arekeng a na le barwa ba gagwe e lego Sheme, Hama le Jafete. A tsena le mosadi wa gagwe le basadi ba bararo ba barwa ba gagwe. 14 Ba tsena le mehuta ka moka ya diphoofolo tša naga, diruiwa, digagabi le mehuta ka moka ya diphedi tšeo di fofago, e lego mehuta ka moka ya dinonyana le mehuta ka moka ya diphedi tšeo di nago le maphego. 15 Diphoofolo ka moka tšeo di nago le moya wa bophelo di ile tša tla go Noa ka arekeng e le tše pedi tše pedi. 16 Ka gona tša tsena ka gare. E be e le diphoofolo tša mehuta ka moka, e le tše tona le tše tshadi, tša tsena ka arekeng go etša ge Modimo a laetše Noa. Ka morago ga moo, Jehofa a tswalela mojako.

17 Meetsefula a tšhologa lefaseng ka matšatši a 40. Meetse a tšwela pele a oketšega go fihlela areka e phaphamala ka godimo ga ona. 18 Meetse a ba a mantšintši gomme a oketšega kudu mo lefaseng, eupša areka yona ya no dula e phaphametše godimo ga meetse. 19 Meetse a ba a mantšintši lefaseng moo a ilego a khupetša dithaba ka moka tše ditelele tša lefaseng ka moka. 20 Meetse a khupetša dithaba ka bophagamo bja dimithara tšeo e ka bago tše 6,5* gomme tša se sa bonagala.

21 Ka gona diphedi* ka moka tšeo di bego di phela lefaseng tša fedišwa, gwa fedišwa le dinonyana, diruiwa, dibata, digagabi le batho ka moka. 22 Dilo ka moka tše di phelago tšeo di bušago moya tšeo di bego di le mo lefaseng, tša hwa. 23 Ka gona Modimo a fediša selo se sengwe le se sengwe seo se bego se phela lefaseng, go thoma ka motho go fihla ka phoofolo, digagabi le dinonyana tše di fofago magodimong. Ka moka tša fedišwa lefaseng, gwa phologa Noa feela le bao ba bego ba na le yena ka arekeng. 24 Meetse a khupetša lefase matšatši a 150 (lekgolo-masomehlano).