Puku ya Pele ya Samuele
23 Ka morago Dafida a botšwa gore: “Bafilisita ba lwa le Keila e bile ba thopa dilo tšeo di bjetšwego.” 2 Dafida a botšiša Jehofa a re: “Na ke ye go bolaya Bafilisita ba?” Jehofa yena a re go Dafida: “Sepela o yo bolaya Bafilisita gomme o phološe Keila.” 3 Eupša banna bao ba bego ba na le Dafida ba re go yena: “ Re boifa re sa le mo Juda, bjale re tlo boifa le go feta ge re ka ya Keila go lwa le mašole a Bafilisita!” 4 Dafida a botšiša Jehofa gape. Jehofa a mo araba a re: “Theogela Keila, ka gobane ke tla go thuša go fenya Bafilisita.” 5 Dafida a ya Keila le banna bao a bego a na le bona gomme a lwa le Bafilisita, a ba bolaya ka bontši a ba a thopa diruiwa tša bona, ke moka Dafida a phološa badudi ba Keila.
6 Abiathara morwa wa Ahimeleke o ile a tšhabela go Dafida kua Keila, a swere efoda.* 7 Saulo a botšwa gore: “Dafida o ile Keila.” Ke moka Saulo a re: “Modimo o mphile yena, ka gobane o tsene motseng woo o tswalelwago ka dikeiti le ditšhipi.” 8 Ke moka Saulo a bitša batho ka moka gore ba ye ntweng, ba theogele Keila, ba yo hlasela Dafida le banna bao a bego a na le bona. 9 Ge Dafida a lemoga gore Saulo o be a mo logela maano a mabe, o ile a re go moperisita Abiathara: “Tliša efoda mo.” 10 Ke moka Dafida a re: “Wena Jehofa Modimo wa Isiraele, nna mohlanka wa gago ke kwele gore Saulo o nyaka go tla Keila gore a tlo senya motse ka moka ka baka la ka. 11 Na baetapele* ba Keila ba tla ntlogela a ntlhasela? Na Saulo o tla tla go nna a nnyaka go etša ge nna mohlanka wa gago ke kwele bjalo? Wena Jehofa Modimo wa Isiraele, hle mpotše nna mohlanka wa gago.” Ke moka Jehofa a re: “O tla tla.” 12 Dafida a botšiša a re: “Na baetapele ba Keila ba tla tlogela nna le banna bao ke nago le bona re hlaselwa ke Saulo?” Jehofa a mo araba a re: “Ba tla le tlogela.”
13 Gateetee Dafida le banna bao a bego a na le bona bao e ka bago ba 600 (makgolo a tshelelago) ba tloga Keila gomme ba ya mafelong ao ba bego ba bona ba ka šireletšega go ona. Ge Saulo a ekwa gore Dafida o tšhabile Keila, a se sa mo šala morago. 14 Dafida a dula lešokeng mafelong ao go sego bonolo go fihla go ona, tikologong ya dithaba tša lešokeng la Tsifi. Saulo a tšwela pele a mo nyaka, eupša Jehofa a dira gore a se mo hwetše. 15 Nakong ya ge Dafida a be a le lešokeng la Tsifi kua Horeshe, o be a tseba* gore Saulo o be a tšama a nyakana le yena gore a mmolaye.
16 Jonathane morwa wa Saulo a ya go Dafida kua Horeshe gomme a mo kgothatša le go mo thuša gore a ithekge ka Jehofa. 17 Jonathane a re go yena: “O se ke wa tšhoga ka gobane tate a ka se go hwetše. Wena o tlo ba kgoši ya Isiraele gomme nna ke tlo go thekga. Tate le yena o tseba seo.” 18 Dafida le Jonathane ba dira kgwerano pele ga Jehofa. Ke moka Dafida a dula Horeshe gomme Jonathane a boela gae.
19 Ka morago banna ba Tsifi ba rotogela go Saulo kua Gibea, ba re: “Dafida o khutile kgauswi le rena mafelong ao go sego bonolo go fihla go ona kua Horeshe, mmotong wa Hakila yeo e lego ka borwa* bja Jeshimone.* 20 Wena kgoši, ge e ba o rata, sepela le rena gomme re tla go fa yena.” 21 Ke moka Saulo a re: “Anke Jehofa a le šegofatše, ka gobane le nkwetše bohloko. 22 Ke kgopela gore le ye le nyakišiše gore o mo kae le gore ke mang yo a mmonego a le moo ka gobane ke kwele gore o hlalefetše thoko. 23 Eyang le yo nyakišiša gore mafelo ka moka ao a ikutago go ona a mo kae gomme le boe go nna le na le bohlatse, ke moka ke tla ya le lena. Ge e ba a le moo nageng, ke tla mo nyaka gare ga batho ka moka ba dikete ba Juda.”
24 Ke moka ba tloga ba ya Tsifi ba eta Saulo pele, mola Dafida le banna bao a bego a na le bona ba be ba le lešokeng la Maoni kua Araba ka borwa bja Jeshimone. 25 Ke moka Saulo a tla le banna bao a bego a na le bona go tlo nyaka Dafida. Ge Dafida a ekwa taba yeo, gateetee a theogela legageng a dula lešokeng la Maoni. Ge Saulo a ekwa seo, a šala Dafida morago lešokeng la Maoni. 26 Ge Saulo a etla ka lehlakoreng le lengwe la thaba, Dafida le banna bao a bego a na le bona ba be ba le ka lehlakoreng le lengwe la thaba. Dafida o be a phakišetša gore a tšhabele Saulo. Eupša Saulo le banna bao a bego a na le bona ba be ba le kgauswi le go swara Dafida le banna bao a bego a na le bona. 27 Eupša moromiwa yo mongwe a tla go Saulo a re: “Phakiša o boele morago, ka gobane Bafilisita ba hlasetše naga!” 28 Saulo a se sa rakediša Dafida, gomme a yo lwa le Bafilisita. Ke ka baka leo lefelo leo le ilego la bitšwa Leswika la Dikgaogano.
29 Ke moka Dafida a tšwa moo gomme a rotoga a yo dula mafelong ao go sego bonolo go fihla go ona kua Ene-gedi.