Jobo
34 Ka gona Elihu a tšwela pele a re:
2 “Lena ba bohlale, theetšang mantšu a ka.
Lena bao le nago le tsebo e ntšhi, ntheetšeng.
3 Tsebe e senkasenka mantšu,
Go no swana le ge leleme le ekwa tatso ya dijo.
4 Anke re inyakeleng seo e lego nnete,
Le gona anke re itireleng phetho ya seo se lokilego.
5 Ka gobane Jobo o itše: ‘Nna ga ke na molato,
Eupša Modimo yena o ganne go mpontšha toka.
6 Na nka bolela maaka ka gore ke swanetše go ahlolwa bjang?
Ntho ya ka ga e alafege, le ge ke se ka dira sebe.’
7 Ke monna ofe yo a swanago le Jobo
Yo a kwerago ba bangwe bjalo ka ge eka o nwa meetse?
8 O tlwaelane le batho bao ba dirago dilo tše mpe
E bile o gwerana le batho ba babe.
9 Ka gobane o itše: ‘Motho ga a holege ka selo
Ge a leka go dira seo se kgahlago Modimo.’
10 Ka gona, ntheetšeng lena banna bao ba nago le tlhaologanyo.
Ga go kgonege gore Modimo wa nnete a dire dilo tše mpe,
Le gore Ramatlaohle a dire selo se se fošagetšego!
11 O tla putsa motho go ya ka dilo tšeo a di dirago,
Gomme a dira gore motho yoo a bune seo a se bjetšego.
12 Ruri Modimo ga a dire dilo tše mpe,
Ramatlaohle o ahlola ka toka.
13 Ke mang yo a mmeilego gore a laole lefase,
Le gona ke mang yo a mo kgethilego gore a hlokomele lefase ka moka?
14 Ge e ba a ka hlanogela batho,
Gomme a kgobokeletša bophelo bja bona le mohemo wa bona go yena,
15 Gona batho ka moka ba tla hwa,
Gomme ba boela leroleng.
16 Wena o monna wa go kwešiša, ka gona ntheetše.
Theetša gabotse seo ke se bolelago.
17 Na motho yo a hloilego toka a ka kgona go buša,
Goba na o ka sola mmuši yo a lokilego?
18 Na o ka botša kgoši wa re: ‘Ga o motho wa selo’?
Goba wa re go bakgomana: ‘Le batho ba babe?
19 Modimo ga a kgetholle dikgošana
E bile o swara badiidi le bahumi go swana,
Ka gobane ka moka ga bona ke mediro ya diatla tša gagwe.
20 Ba ka no hwa kapejana gare ga bošego,
Ba thothomela ka matla gomme ba hlokofala,
Le batho ba matla le bona ba a fedišwa, eupša ga ba fedišwe ka diatla tša batho.
21 Ka gobane Modimo o bona ditsela tša motho ka moka,
E bile o bona dilo ka moka tšeo a di dirago.
22 Ga go na leswiswi goba leswiswi le lesoleso
Moo bao ba dirago dilo tše mpe ba ka ikutago gona.
23 Ka gobane Modimo ga se a beela motho le ge e le ofe nako ya gore
A tle go yena gore a tlo mo ahlola.
24 O fediša ba matla ntle le go nyakišiša,
Gomme a bea ba bangwe legatong la bona.
25 Ka ge a tseba dilo tšeo ba di dirago,
O ba fenya bošego gomme ba fedišwa.
26 O ba otla pele ga batho ka moka,
Ka ge ba dira dilo tše mpe.
27 Ka gobane ba arogile ba se sa mo latela,
Le gona ga ba na taba le selo le ge e le sefe seo a se dirago.
28 Batho bao ba dirago dilo tše mpe ba dira gore badiidi ba llele go yena,
Ke ka baka leo a kwago batho bao ba hlokago thušo ge ba mo llela.
29 Ge Modimo a homola, ke mang yo a ka mmonago molato?
Ge a uta sefahlego sa gagwe, ke mang yo a ka mmonago?
Go sa šetšwe gore o utela sefahlego sa gagwe setšhaba goba o se utela motho, go no swana.
30 Ga a dumelele motho yo a dirago dilo tše mpe gore a buše,
Goba go beela batho melaba.
31 Na go na le yo a ka botšago Modimo a re:
‘Ke a otlwa le ge ke se ka senya selo?
32 Nthute seo ke sa se tsebego.
Ge e ba go na le phošo yeo ke e dirilego, gona nka se e bušeletše gape.’
33 Na Modimo o swanetše go go putsa ka mokgwa wo o nyakago ka gona le ge o sa dumelelane le yena?
Ke wena o swanetšego go ikgethela, e sego nna.
Bjale mpotše seo o se tsebago.
34 Banna bao ba kwešišago le motho le ge e le ofe yo bohlale yo a nkwago,
Ba tla re go nna,
35 ‘Jobo ga a tsebe seo a se bolelago,
E bile dilo tšeo a di bolelago di bontšha gore ga a na temogo.’
36 Anke Jobo a lekwe ka mo go feletšego ke mathata ao a mo welago,
Ka gobane o araba go swana le batho bao ba dirago dilo tše mpe!
37 O oketša sebe sa gagwe ka go hlanogela Modimo.
O re kwera a phaphatha diatla mo pele ga rena,
E bile o bolela dilo tše dintšhi tše mpe ka Modimo wa nnete!”