Puku ya Pele ya Dikoronika
29 Bjale Kgoši Dafida a botša phuthego ka moka a re: “Solomone morwa wa ka, yena yo Modimo a mo kgethilego, e sa le yo moswa e bile ga a na tsebo e ntšhi, mošomo wo a swanetšego go o dira ke o mogolo ka gobane ga a agele motho tempele eupša o e agela Jehofa Modimo. 2 Ke šomile ka matla a ka ka moka go lokišeletša gore go tle go agwe ntlo ya Modimo wa ka. Ka tliša gauta gore go dirwe dilo tša gauta, silifera gore go dirwe dilo tša silifera, koporo gore go dirwe dilo tša koporo, tšhipi gore go dirwe dilo tša tšhipi, dikota gore go dirwe dilo tša kota, maswika ao a bitšwago onikisi, maswika ao a kgomaretšwago ka leraga, maswikana a go kgabiša, mehuta ka moka ya maswika a bohlokwa le maswika a mantšhi kudu ao a bitšwago alapasetere. 3 Le gona ka ge ke rata ntlo ya Modimo wa ka, go sa na le maswika a mangwe a gauta le a silifera ao ke a ntšhago gore go agwe ntlo ya Modimo wa ka, go tlaleletša go dilo tšeo ke šetšego ke di lokišeleditše ntlo e kgethwa, 4 tšeo di akaretšago gauta ya Ofira yeo e imelago dikhilokgerama tše 102 600 (dikete tše lekgolo-pedi le makgolo a tshelelago)* le silifera yeo e sego ya tswakwa le selo yeo e imelago dikhilokgerama tše 239 400 (dikete tše makgolopedi-masometharo-senyane le makgolo a mane),* gore go tle go pentiwe maboto a diphapoši tša ntlo yeo, 5 ka tliša gauta gore go dirwe dilo tša gauta, silifera gore go dirwe dilo tša silifera le mešomo ka moka yeo e tlago go dirwa ke batho ba ba kgonago go dira mešomo ya diatla. Bjale ke mang yo a ithaopelago go tla mo pele gore a tle a fe Jehofa mpho lehono?”
6 Go ile gwa ithaopa baetapele ba malapa a borakgolokhukhu ba bona, baetapele ba meloko ya Isiraele, baetapele ba batho ba sekete, baetapele ba batho ba lekgolo le baetapele bao ba bego ba hlokometše mešomo ya kgoši. 7 E le gore modiro wa ntlong ya Modimo wa nnete o dirwe, ba ile ba neela gauta yeo e lekanago dikhilokgerama tše 171 000 (dikete tše lekgolo masomešupa-tee),* didariki* tše 10 000 (dikete tše lesome), silifera yeo e imelago dikhilokgerama tše 342 000 (dikete tše makgolotharo-masomenne-pedi),* koporo yeo e imelago dikhilokgerama tše 615 600 (dikete tše makgolotshela-lesome-hlano le makgolo a tshelelago)* le tšhipi yeo e imelago dikhilokgerama tše 3 420 000. (dimilione tše tharo le dikete tše makgolonne-masome-pedi)* 8 Motho le ge e le ofe yo a bego a na le maswika a bohlokwa o be a a neela matlotlong a ntlo ya Jehofa ao a bego a hlokometšwe ke Jehiele wa Mogerishone. 9 Setšhaba se ile sa thabela gore se ithaopetše go ntšha dibego tše, ka gobane se di ntšheditše Jehofa ka pelo ka moka. Le gona, Kgoši Dafida le yena o ile a thaba kudu.
10 Ke moka Dafida a reta Jehofa pele ga phuthego ka moka, a re: “Wena Jehofa Modimo wa Isiraele tatago rena, anke o retwe go ya go ile. 11 Wena Jehofa, o yo mogolo, o na le matla, dilo ka moka tše dibotse ke tša gago, o a hlomphega e bile o na le seriti. Ka gobane dilo ka moka legodimong le lefaseng ke tša gago. Wena Jehofa, mmušo ke wa gago e bile o laola dilo ka moka. 12 Mahumo le letago di tšwa go wena e bile o buša dilo ka moka. Ka seatleng sa gago go na le matla, e bile seatla sa gago se kgona go dira dilo tše dikgolo le go fa batho ka moka matla. 13 Bjale wena Modimo wa rena, re a go leboga e bile re tumiša leina la gago le lebotse.
14 “Le gona, ke nna mang e bile setšhaba sa ka ke eng, moo re ka swanelegago go ithaopela go ntšha dibego tšeo di swanago le tše? Ka gobane dilo ka moka di tšwa go wena, e bile re go file dilo tšeo di šetšego di etšwa go wena.* 15 Ka gobane re bjalo ka batho bao ba tšwago dinageng tše dingwe pele ga gago e bile re badudi ba go ya go ile go swana le borakgolokhukhu ba rena. Matšatši a rena lefaseng a bjalo ka moriti e bile ga go na kholofelo ya gore re tla dula re phela. 16 Wena Jehofa Modimo wa rena, dilo tše ka moka tšeo re di lokišeditšego e le gore re agele leina la gago le lekgethwa ntlo, di tšwa go wena e bile ke tša gago. 17 Wena Modimo wa ka, ke tseba gabotse gore o hlahloba dipelo e bile o thabela go bona batho bao ba botegago. Le gona ke ithaopetše go go neela dilo tše ka moka ka pelo ya ka ka moka, e bile ke thabela go bona setšhaba sa gago seo se lego mo se neela dibego ka go ithaopa. 18 Wena Jehofa Modimo wa Aborahama, Isaka le Isiraele, e lego borakgolokhukhu ba rena, dira gore dilo tšeo setšhaba se se di naganago le go di kganyoga di dule di le dipelong tša sona go ya go ile, gomme se dule se go hlankela ka dipelo tša sona ka moka. 19 Le gona, thuša Solomone morwa wa ka gore a go hlankele ka pelo ya gagwe ka moka e le gore a kwe melao ya gago, dikgopotšo tša gago le ditaelo tša gago, a dire dilo tše ka moka gomme a age tempele yeo ke šetšego ke e lokišeleditše dilo.”
20 Ke moka Dafida a botša phuthego ka moka a re: “Bjale retang Jehofa Modimo wa lena.” Ke moka phuthego ka moka ya reta Jehofa Modimo wa borakgolokhukhu ba yona, ya ba ya inama le go khunama go bontšha gore e hlompha Jehofa le kgoši. 21 Ke moka ba tšwela pele ba direla Jehofa dihlabelo ba ba ba neela Jehofa dibego tša go fišwa go fihlela letšatšing le le latelago, ba ile ba neela dipowana tše 1 000 (sekete), dinku tše tona tše 1 000 (sekete), dikwana tše tona tše 1 000 (sekete) le dibego tša bona tša dino. Ba dira dihlabelo tše dintšhi legatong la Baisiraele ka moka. 22 Letšatšing leo, ba ile ba tšwela pele ba eja e bile ba enwa pele ga Jehofa ba thabile kudu. Ba tsebatša ka lekga la bobedi gore Solomone morwa wa Dafida ke kgoši gomme ba mo tlotša pele ga Jehofa gore e be moetapele, ba ba ba tlotša le Tsadoko gore e be moperisita. 23 Ke moka Solomone a dula setulong sa bogoši sa Jehofa e le kgoši legatong la Dafida tatagwe e bile o be a atlega gomme Baisiraele ka moka ba be ba mo kwa. 24 Baetapele ka moka, mašole a matla ka moka le barwa ka moka ba Kgoši Dafida, ba ile ba ikokobeletša Solomone yo e bego e le kgoši. 25 Jehofa a dira gore Baisiraele ka moka ba hlomphe Solomone kudu. A mo dira gore a be le seriti se segolo seo go se nago kgoši yeo e kilego ya ba le sona Isiraeleng.
26 Ka gona, Dafida morwa wa Jese, o ile a buša Isiraele ka moka. 27 O bušitše Isiraele ka mengwaga e 40. O bušitše Heburone ka mengwaga e šupago, gomme a buša Jerusalema ka mengwaga e 33. 28 Mafelelong o ile a hlokofala ka morago ga ge a phetše nako e telele, a ipshinne ka bophelo, mahumo le letago. Ke moka Solomone morwa wa gagwe a ba kgoši legatong la gagwe. 29 Ditaba ka moka tša Kgoši Dafida, go tloga mathomong go fihla mafelelong, di ngwadilwe gare ga mantšu a Samuele yoo a bego a bona dipono, Nathane yoo e bego e le moporofeta le Gada yoo a bego a bona dipono. 30 Le gona mantšu ao a ngwadilwego a bolela le ka dilo ka moka tša bogoši bja gagwe, matla a gagwe le dilo tšeo di diregilego mehleng ya gagwe tšeo di amago yena, Baisiraele le mebušo ka moka ya dinaga tše dingwe.