Psalme
118 Lebogang Jehofa, gobane o lokile.
Lerato la gagwe le le botegago ke la go ya go ile.
2 Anke Isiraele e re:
“Lerato la gagwe le le botegago ke la go ya go ile.”
3 Anke ba ntlo ya Arone ba re:
“Lerato la gagwe le le botegago ke la go ya go ile.”
4 Anke bao ba boifago Jehofa ba re:
“Lerato la gagwe le le botegago ke la go ya go ile.”
5 Ge ke be ke le tlalelong, ke ile ka bitša Jah.*
Jah a nkaraba gomme a nkiša lefelong leo le šireletšegilego.
6 Jehofa o na le nna, nka se boife.
Motho a ka ntira’ng?
8 Go kaone go tšhabela go Jehofa
Go e na le go tshepa batho.
9 Go kaone go tšhabela go Jehofa
Go e na le go tshepa baetapele.
10 Ditšhaba ka moka di be di ntikologile.
Eupša ke ile ka di raka ka leina la Jehofa.
11 Di be di ntikologile, di ntikologile ka mahlakoreng ka moka.
Eupša ke ile ka di raka ka leina la Jehofa.
12 Di be di ntikologile go etša dinose,
Eupša di ile tša fedišwa ka pela go etša ge go tingwa mollo wa mehlare ya meetlwa.
Ke ile ka di raka ka leina la Jehofa.
14 Jah ke lefelo leo ke tšhabelago go lona le matla a ka,
E bile ke yena a mphološago.
15 Go kwagala modumo wa lethabo go tšwa ditenteng tša baloki,
Ka gobane ba phološitšwe.
Seatla sa le letona sa Jehofa se dira dilo tše dikgolo.
16 Seatla sa le letona sa Jehofa se ya godimo,
Seatla sa le letona sa Jehofa se dira dilo tše dikgolo.
17 Nka se hwe, eupša ke tla dula ke phela
E le gore ke bolele ka ditiro tša Jah.
18 Jah o mphošolotše ka bogale,
Eupša ga se a ntumelela gore ke hwe.
19 Mpuleleng dikeiti tšeo go tsenago baloki.
Ke tla tsena ka tšona gomme ka reta Jah.
20 Ye ke keiti ya ntlo ya Jehofa.
Baloki ba tla tsena ka yona.
21 Ke tla go reta, ka gobane o nkarabile
Wa ba wa mphološa.
22 Leswika leo baagi ba le gannego
Le fetogile leswika le bohlokwa leo le lego khoneng ya moago.
23 Se se tšwa go Jehofa,
E bile se a kgahliša mahlong a rena.
24 Le ke letšatši leo Jehofa a le dirilego.
Re tlo thaba kudu letšatšing le.
25 Jehofa, re kgopela gore o re phološe!
Ao hle Jehofa, re thuše gore re fenye manaba a rena!
26 A go šegofatšwe yo a tlago ka leina la Jehofa.
Rena bao re lego ntlong ya Jehofa, re kgopela gore a le šegofatše.
27 Jehofa ke Modimo,
Gomme o re nea seetša.
Sepelang le bao ba yago monyanyeng le swere makala.
Le sepele go fihla aletareng.*
28 Wena o Modimo wa ka e bile ke tla go reta.
Ke tla go phagamiša wena Modimo wa ka.
29 Lebogang Jehofa, gobane o lokile.
Lerato la gagwe le le botegago ke la go ya go ile.