Psalme

107 Lebogang Jehofa, ka gobane o lokile,

E bile lerato la gagwe le le botegago le dula le le gona go ya go ile.

 2 Anke bao Jehofa a ba phološitšego ba bolele seo,

Bona bao a ba rekolotšego go manaba a bona,

 3 E bile a ba kgobokeditšego go tšwa dinageng tše dingwe,

Go tšwa ka bohlabela le go tšwa ka bodikela,

Go tšwa ka leboa le go tšwa ka borwa.

 4 Ba ile ba ralala le lešoka, gona kua leganateng.

Ga se ba hwetša tsela ya go ya motseng woo ba ka dulago go wona.

 5 Ba be ba swerwe ke tlala, e bile ba nyorilwe.

Ba nyakile ba idibala ka baka la go lapa.

 6 Ba ile ba dulela go llela Jehofa ba le tlalelong,

Gomme yena a ba phološa mathateng ao a bego a ba wetše.

 7 O ile a ba sepediša tseleng ya go loka

E le gore ba fihle motseng woo ba ka dulago go wona.

 8 Anke batho ka moka ba leboge Jehofa ka baka la lerato la gagwe le le botegago,

Le ka baka la dilo tše dibotse tšeo a di diretšego batho.

 9 Ka gobane o timotše lenyora la batho bao ba bego ba nyorilwe,

Gomme bao ba bego ba swerwe ke tlala a ba fa dijo tše dibose.

10 Ba bangwe ba be ba dula leswiswing le lesoleso,

E be e le bagolegwa bao ba tlaišwago e bile ba tlemilwe ka diketane.

11 Ka gobane ba be ba se ba kwa lentšu la Modimo.

Ba ile ba nyatša keletšo ya yo Godimodimo.

12 Ka gona o ile a ba kokobetša ka go dumelela gore ba welwe ke mathata.

Ba ile ba kgopša gomme gwa se be le yo a ba thušago.

13 Ba ile ba bitša Jehofa gore a ba thuše ge ba be ba tlaletšwe,

Gomme yena a ba phološa mathateng ao a bego a ba wetše.

14 A ba ntšha leswiswing le lesoleso,

A ba a kgaola diketane tša bona.

15 Anke batho ka moka ba leboge Jehofa ka baka la lerato la gagwe le le botegago

Le ka baka la dilo tše dibotse tšeo a di diretšego batho.

16 Ka gobane o robile mabati ao a dirilwego ka koporo,

A roba le ditšhipi tšeo di šireleditšego mabati.

17 E be e le ditlaela. Ka gona ba ile ba hlaka

Ka baka la diphošo tšeo ba di dirilego le melato ya bona.

18 Ba ile ba se sa kganyoga mohuta o mongwe le o mongwe wa dijo.

Ba be ba le kgauswi le go hwa.*

19 Ba be ba bitša Jehofa gore a ba thuše ge ba be ba tlaletšwe,

Gomme yena o be a ba phološa mathateng ao a bego a ba wetše.

20 O be a ntšha taelo gomme a ba fodiša,

Le go ba phološa gore ba se ke ba hwa.

21 Anke batho ka moka ba leboge Jehofa ka baka la lerato la gagwe le le botegago,

Le ka baka la dilo tše dibotse tšeo a di diretšego batho.

22 Anke ba dire dihlabelo tša go mo leboga

Gomme ba bolele ka mediro ya gagwe ba thabile.

23 Bao ba tšeago maeto ka dikepe lewatleng,

Bona bao ba rekišago ba le ka meetseng a mantšhi,

24 Ke bona bao ba bonego mediro ya Jehofa

Le dilo tše dibotse tšeo a di bopilego tšeo di lego ka lewatleng.

25 Ba bone kamoo Modimo a ntšhago taelo ya gore go be le ledimo

Leo le kukelago maphoto a lewatle godimo.

26 Maphoto ao a ba iša godimo lefaufaung,

Ke moka ba theogela gape ka lewatleng.

27 Ba a tekateka e bile ba thekesela go etša setagwa

Gomme bokgoni bja bona bja go sesiša dikepe bo fetoga lefeela.

28 Ke moka ba llela Jehofa ba le tlalelong,

Gomme yena a ba phološa mathateng ao a bego a ba wetše.

29 O homotša ledimo,

Gomme maphoto a lewatle a homola.

30 Ba a thaba ge ba bona di homola,

Gomme yena a ba iša boemakepeng bjo ba nyakago go ya go bjona.

31 Anke batho ka moka ba leboge Jehofa ka baka la lerato la gagwe le le botegago,

Le ka baka la dilo tše dibotse tšeo a di diretšego batho.

32 Anke ba mo tumiše ba le moo batho ba kgobokanego gona,

Le gona anke ba mo tumiše ba le gare ga banna ba bagolo.

33 Dinoka o di fetoša leganata,

Gomme didiba a di fetoša naga yeo e omilego.

34 Naga yeo e tšweletšago dijo tše dintšhi o e fetoša naga ya letswai

Ka baka la bobe bja bao ba dulago go yona.

35 O fetoša leganata gore le be le meetse a mantšhi ao a nago le mahlaka,

Gomme naga yeo e omilego a e fetoša gore e be le didiba.

36 O dira gore bao ba swerwego ke tlala ba dule moo,

E le gore ba age motse woo ba ka dulago go wona.

37 Ba na le mašemo le dirapa tša meterebe

Tšeo di tšweletšago puno e ntšhi.

38 O a ba šegofatša gomme ya ba ba bantšhi kudu,

O dira le gore dikgomo tša bona e be tše dintšhi.

39 Eupša bona ba a boela ba fokotšega gomme ba hlabja ke dihlong

Ka baka la go gatelelwa, go welwa ke masetlapelo le go nyama.

40 O dira gore batho bao ba hlomphegago ba nyatšege,

A ba a dira gore ba ralale lešokeng leo le se nago tsela.

41 Eupša o šireletša badiidi gore ba se gatelelwe,

Gomme a dira gore malapa a bona e be a magolo bjalo ka mohlape.

42 Baloki ba bona seo gomme ba thaba,

Eupša bohle bao ba sa lokago ba hloka seo ba ka se bolelago.

43 Motho yo bohlale o tla bona dilo tše

Gomme a naganišiša ka mediro yeo e bontšhago lerato la Jehofa le le botegago.