Psalme
Ditaelo tšeo di yago go mohlahli. Diriša modumo wa koša yeo e rego: “O se ke wa Senya.” Miktame.* Koša ya Dafida. Ge a be a tšhabetše ka leweng ka baka la Saulo.
57 Nkgaugele, hle Modimo, nkgaugele,
Ka gobane ke tšhabela go wena,
E bile ke tšhabela moriting wa maphego a gago go fihlela ge mathata a ka a fedile.
2 Ke bitša Modimo yo Godimodimo,
Yena Modimo wa nnete yo a fedišago mathata a ka.
3 Modimo o tla nthuša a le legodimong gomme a mphološa.
O tla dira gore batho bao ba ntlhaselago ba gakanege. (Selah)
Modimo o tla mpontšha botho* bja gagwe bjo bogolo e bile o tla mpontšha gore o a botega.
4 Ke dikologilwe ke ditau.
Le ge ke re ke a robala, kgauswi le nna go na le batho bao ba swanago le dibata tšeo di jago batho,
Bao meno a bona a swanago le marumo le mesebe,
Le bao maleme a bona a lego bogale bjalo ka tšhoša.
5 Wena Modimo wa ka, bontšha bogolo bja gago o le magodimong.
Bontšha batho gore ke wena yo mogolo godimo ga lefase ka moka.
6 Manaba a ka a mpeetše nete gore a ntanye.
Ke gateletšegile.
Manaba a ka a nkepetše molete
Eupša ona a wela ka moleteng woo. (Selah)
7 Ke a tshepega hle Modimo,
Ke a tshepega.
Ke tla go leletša mmino ka ba ka go opelela koša ya go go reta.
8 Ke tla tsoga pele letšatši le hlaba
Gore ke letše harepa le diletšo tše dingwe tša metato.
Ke tla tsoga ka pela.
9 Wena Jehofa, ke tla go reta gare ga batho.
Ke tla go opelela koša ya go go reta gare ga ditšhaba.
10 Ka gobane lerato la gago le le botegago ke le legolo e bile le fihla magodimong,
Le gona o dula o tshepega.
11 Wena Modimo wa ka, bontšha bogolo bja gago o le magodimong.
Bontšha batho gore ke wena yo mogolo godimo ga lefase ka moka.