Psalme
Koša ya barwa ba Kora.
48 Jehofa ke yo mogolo e bile o swanelwa ke go tumišwa,
Anke a tumišwe motseng wa Modimo wa rena thabeng ya gagwe e kgethwa.
2 Thaba ya Tsione yeo e lego dikarolong tša kgole tša ka leboa,
Ke motse o mobotse kudu e bile o phagame. O dira gore lefase ka moka le thabe
E bile ke motse wa Kgoši e Kgolo.
3 Ditoreng tša motse woo,
Modimo o ipontšhitše e le lefelo la botšhabelo.
4 Bonang! Dikgoši di kgobokane felo gotee,
Di gwantela motseng woo.
5 Ge di bona motse woo di ile tša makala,
Tša tšhoga gomme tša tšhaba.
6 Di ile tša thothomela di le moo,
Tša goeletša bjalo ka mosadi yo a kwago bohloko a le kgauswi le go belega.
7 Wena Modimo o robaganya dikepe tša Tarashishi ka phefo yeo e tšwago ka bohlabela.
8 Seo re se kwelego bjale re se bona ka mahlo a rena
Motseng wa Jehofa wa madira, motseng wa Modimo wa rena.
Modimo o tla šireletša motse wo go ya go ile. (Selah)
9 Wena Modimo, re naganišiša ka lerato la gago le le botegago
Re le tempeleng ya gago.
10 Wena Modimo, leina la gago le go tumišwa ga gago
Di fihla magomong a lefase.
O dula o diriša matla a gago go dira se se lokilego.
11 Anke Thaba ya Tsione e thabe,
Anke metse ya Juda e thabe ka baka la dikahlolo tša gago.
12 Gwantelang motseng wa Tsione, o dikologeng,
Balang ditora tša wona.
13 Hlahlobang maboto a wona.
Lekolang meago ya wona e metelele,
E le gore le tle le di anegele ba melokong e tlago.
14 Gobane Modimo yo a dirilego dilo tše ke Modimo wa rena go ya go ile.
E bile o tla re hlahla go ya go ile.*