Jeremia
15 Jehofa a re go nna: “Le ge Moshe le Samuele ba be ba ka ema pele ga ka, ke be nka se šokele batho ba. Ba rake mo pele ga ka, a ba sepele. 2 Ge e ba ba ka re go wena: ‘Bjale go tlo direga’ng ka rena?’ Wena o re go bona: ‘Jehofa o re:
“Ba bangwe ba lena ba tla bolawa ke malwetši a šoro,
Ba bangwe ba lena ba tla bolawa ka sabola,
Ba bangwe ba lena ba tla hwa ka baka la tlala,
Gomme ba bangwe ba lena ba tla išwa bothopša!”’
3 Jehofa o re: “Ke tla kgetha mehuta e mene ya dikotlo gore ke ba otle ka tšona. Ba tla bolawa ka sabola, dimpša di goge ditopo tša bona, dinonyana tša magodimong le diphoofolo tša nageng di tla ba ja le go ba fediša. 4 Ke tla dira gore mebušo ka moka ya lefase e tšhoge ka baka la seo se ba diragaletšego. Ke tla dira bjalo ka baka la seo Manase morwa wa Hesekia, e lego kgoši ya Juda, a se dirilego Jerusalema.
5 Ke mang yo a tlago go go kwela bohloko, wena Jerusalema,
Ke mang yo a tlago go go šokela,
Ke mang yo a tlago go tla go wena gore a go botšiše gore o phela bjang?’
6 Jehofa o re: “O ntahlile,
O duletše go katakatela morago.
Bjale ke tla otlolla seatla sa ka gore ke go hlasele, e bile ke go fediše.
Ke lapišitšwe ke go go kwela bohloko.
7 Ke tla ba ološa gore ba tšewe ke phefo dikeiting tša nageng.
Ke tla bolaya bana ba bona.
Ke tla fediša batho ba ka,
Ka ge ba gana go tlogela mekgwa ya bona.
8 Ke tla dira gore bahlologadi ba bona e be ba bantšhi kudu go feta santa ya mawatle.
Ke tla dira gore go be le motho yo a tlago go ba fediša mosegare wa sekgalela. O tla fediša bomma le barwa ba bona.
Ke tla dira gore ba tšhoge ba be ba tlalelwe ba sa itebetše.
9 Mosadi yo a belegego bana ba šupa o feletšwe ke matla,
O thatafalelwa ke go hema.
Letšatši la gagwe le sobetše e sa le mosegare,
Ka gona, o hlabilwe ke dihlong e bile o swabile.’
Jehofa o re:
‘Ke tla dira gore manaba a bona a bolaye bao ba šetšego ka sabola.’”
10 Joo nna mma wee! Ke yo madimabe ka gobane o mpelegile,
Batho ba nageng ka moka ba ntirela tshele e bile ba lwa le nna.
Ga se ka ka ka adima selo go bona, goba bona ba nkadima selo,
Eupša bona ba a nthoga.
11 Jehofa o itše: “Ruri ke tla le direla dilo tše dibotse.
Ruri ke tla le thuša ge le wetšwe ke mathata.
Le ge le tlaletšwe nakong ya ge le hlaselwa ke lenaba.
12 Na go na le motho yo a ka kgonago go robaganya tshipi, gaešita le yona tshipi ya ka leboa?
E bile na go na le motho yo a ka kgonago go robaganya koporo?
13 Batho ba tla tšea dilo tša lena tše bohlokwa le mahumo a lena mahala,
Ka gobane le tladitše dibe tša lena ditikologong tša lena ka moka.
14 Ke tla dira gore di tšewe ke manaba a lena
Gore a di iše nageng yeo le sa e tsebego.
Ka gobane ke tukile bogale bjalo ka mollo,
Ke galefetše lena.”
15 Wena Jehofa,
O tseba gabotse mathata a ka, nkgopole hle o be o nthuše.
Ntefeletše go bao ba ntlaišago,
O se ke wa ntlogela ke fedišwa ka ge o sa galefe ka pela.
Tseba gore ke rwala kgobošo ye ka baka la gago.
16 Ge lentšu la gago le be le etla go nna, ke ile ka le ja bjalo ka dijo.
Gomme lentšu la gago le nthabišitše pelong ya ka,
Ka gobane ke bitšwa ka leina la gago, wena Jehofa Modimo wa madira.
17 Ga se ka dula le batho bao ba dirago metlae gomme ka ipshina le bona.
Ke itulela ke nnoši, ka gobane ke wena o ntlhahlago.
Ka gobane o dirile gore ke galefe kudu, ka baka la dilo tše mpe tšeo ba di dirilego.
18 Goreng bohloko bja ka bo sa fele gomme ntho ya ka e sa alafege?
E gana go fola.
Na o tla swana le sediba sa meetse seo se omilego,
Seo motho a ka se ithekgego ka sona?
19 Jehofa o re:
“Ge e ba o* ka boa, gona ke tla go amogela gape,
Gomme wa tšwela pele o hlankela o le pele ga ka.
Ge e ba o ka tlogela go dira dilo tšeo di se nago mohola, gomme wa tšwela pele o dira dilo tšeo di nago le mohola,
Gona o tla ba bjalo ka motho yo a mpolelelago.
Bona ba tla boela go wena,
Eupša wena o ka se boele go bona.”
20 “Ke go dirile gore o be leboto leo le tiilego la koporo go batho ba.
Ba tla lwa le wena,
Eupša ba ka se go fenye.
Ka gobane ke na le wena, ke tla go phološa ka ba ka go hlakodiša,” o realo Jehofa.
21 “Le gona, ke tla go phološa go batho ba babe,
E bile ka go namolela go batho ba šoro.”