Ruthe

1 Nakong ya ge go be go buša baahlodi nageng ya Isiraele, go ile gwa wa tlala e kgolo. Monna yo mongwe yo a bego a dula Betlelehema yeo e lego Juda, o ile a tloga moo le mosadi wa gagwe le barwa ba gagwe ba babedi gore ba yo dula nageng ya Moaba. 2 Ba ile ba fihla nageng yeo gomme ba dula gona. Leina la monna yoo e be e le Elimeleke,* la mosadi wa gagwe e le Naomi gomme maina a barwa ba gagwe ba babedi e le Maglone* le Kilioni.* E be e le Baefurata ba ba tšwago Betlelehema yeo e lego Juda.

3 Ge nako e dutše e eya, Elimeleke monna wa Naomi o ile a hlokofala, ke moka Naomi a šala le barwa ba gagwe ba babedi. 4 Ka morago barwa bao ba ile ba nyala basadi ba Bamoaba. Leina la yo mongwe e be e le Oropa, la yo mongwe e le Ruthe. Ba ile ba dula moo mengwaga e ka bago e lesome. 5 Maglone le Kilioni le bona ba ile ba hlokofala, ke moka mosadi yoo a šala a se na barwa le monna. 6 Yena le dingwetši tša gagwe ba ile ba tloga nageng ya Moaba, ka gobane o be a kwele a le moo gore Jehofa o hlokomela batho ba gagwe gape ka go ba fa dijo.

7 O ile a tloga moo a bego a dula gona le dingwetši tša gagwe. Ge ba dutše ba le tseleng ya go ya nageng ya Juda, 8 Naomi a re go dingwetši tša gagwe: “Gomang hle, yo mongwe le yo mongwe a boele ntlong ya mmagwe. Eka Jehofa a ka le bontšha botho* go swana le ge le bo bontšhitše nna le banna ba lena bao ga bjale ba hlokofetšego. 9 Ke rapela le gore Jehofa a le fe banna bao ba tlago go le hlokomela.” A ba khisa, ke moka ba lla kudu. 10 Ba dulela gore go yena: “Aowa hle, re tla boela le wena bathong ba geno.” 11 Eupša Naomi a re: “Gomang hle barwedi ba ka. Le re’ng le nyaka go sepela le nna? Nka se sa kgona go le belegela barwa bao ba ka tlago ba le nyala. 12 Gomang hle barwedi ba ka, ka gobane ke tšofetše kudu go ka nyalwa. Le ge nka nyalwa bošegong bjo gomme ka ba le bana, 13 na le be le ka ba emela go fihla ba gola? Na le be le ka ema la se nyalwe? Aowa hle barwedi ba ka, ke le kwela bohloko kudu ka ge Jehofa a ntlhanogetše.”

14 Ge a realo ba buša ba lla kudu, ke moka Oropa a khisa mmatswale wa gagwe a sepela. Ruthe yena a kgetha go šala le mmatswale wa gagwe. 15 Ke moka Naomi a re: “Bona! Oropa o boela bathong ba gabo le medimong ya gabo. Boela morago le yena.”

16 Ruthe a re: “O se ke wa nthapeletša gore ke go tlogele, ke se hlwe ke sepela le wena, ka gobane mo o yago gona le nna ke tla ya, mo o robalago gona ke tla robala gona. Batho ba geno e tla ba ba gešo, gomme Modimo wa gago ya ba Modimo wa ka. 17 Mo o hwelago gona le nna ke tlo hwela gona gomme ka bolokelwa moo. Ge nka go hlanogela, Jehofa a nkotle a be a oketše kotlo yeo. Nna le wena re tlo kgaogantšhwa ke lehu.”

18 Ge Naomi a bona gore Ruthe o gapeletša go sepela le yena, a napa a tlogela go mmotša gore a gome. 19 Ba ile ba tšwela pele ka leeto la go ya Betlelehema. Ge ba fihla moo, motse ka moka o be o dumaduma ka bona, le basadi ba moo ba be ba re: “Na yo ke yena Naomi?” 20 O be a re go basadi bao: “Le se ke la mpitša Naomi.* Mpitšeng Mara,* ka gobane Ramatlaohle o nkwešitše bohloko kudu. 21 Ke be ke na le tšohle ge ke tloga mo, eupša Jehofa o dirile gore ke boe ke lekeleditše diatla. Le se ke la mpitša Naomi, ka gobane Jehofa Ramatlaohle o ntlhanogetše a ba a mpakela mathata.”

22 Tše ke ditaba tša kamoo Naomi a boilego nageng ya gabo a etšwa Moaba. O boile le ngwetši ya gagwe ya Momoaba e lego Ruthe. Ba fihlile Betlelehema ge batho ba moo ba be ba thoma go buna mabele.*