Baahlodi

3 Jehofa o ile a dumelela ditšhaba tše dingwe gore di šale nageng e le gore a bone ge e ba Baisiraele bao ba sa tsebego dintwa tša Kanana ba tla mo kwa. 2 (O ile a di dumelela gore di dule e le gore meloko ya Baisiraele yeo peleng e sa kago ya lwa dintwa e ithute le go tlwaela go lwa.) 3 Ditšhaba tšeo a di tlogetšego ke tše: Ke dikgoši tše hlano tša Bafilisita le Bakanana ka moka, Basidone le Bahefe bao ba bego ba dula dithabeng tša Libanoni go tloga Thabeng ya Baali-herimone go fihla Lebo-hamathi. 4 Ditšhaba tše di ile tša tlogelwa gore di dule nageng e le go bona ge e ba Baisiraele ba be ba tla kwa ditaelo tšeo Jehofa a bego a di file botatago bona a diriša Moshe. 5 Ka gona Baisiraele ba ile ba dula le Bakanana, Bahethe, Baamore, Baperetse, Bahefe le Bajebusi. 6 Ba ile ba nyala barwedi ba ditšhaba tše, gomme le tšona tša nyala barwedi ba bona, ke moka ba hlankela medimo ya tšona.

7 Ka gona Baisiraele ba ile ba direla Jehofa dilo tše mpe, ba lebala Jehofa Modimo wa bona gomme ba hlankela Bobaali le dikota* tše kgethwa. 8 Ka gona Jehofa a galefela Baisiraele kudu, a dumelela Kushani-rishathaimi kgoši ya Mesopotamia gore a ba thope. Baisiraele ba ile ba hlankela Kushani-rishathaimi ka mengwaga e seswai. 9 Ge Baisiraele ba llela Jehofa gore a ba thuše, Jehofa o ile a ba kgethela Othiniele morwa wa Kenase, moratho wa Kalebe gore a ba phološe. 10 Jehofa o ile a mo tšhollela moya wa gagwe gomme a ba moahlodi wa Isiraele. Ge a be a eya go lwa le Kushani-rishathaimi kgoši ya Mesopotamia, Jehofa o ile a mo thuša gore a mo fenye. 11 Ka morago ga moo, nageng go ile gwa ba le khutšo ka mengwaga e 40. Ke moka Othiniele morwa wa Kenase a hlokofala.

12 Baisiraele ba ile ba boela ba direla Jehofa dilo tše mpe. Ke moka Jehofa a dira gore Egilone kgoši ya Moaba a be le matla go feta Baisiraele, ka gobane ba be ba diretše Jehofa dilo tše mpe. 13 Go oketša moo Egilone a bitša Baamoni le Baamaleke gore ba yo lwa le Baisiraele, gomme ba thopa metse ya bona ya mepalema.* 14 Baisiraele ba hlankela Egilone kgoši ya Moaba ka mengwaga e 18. 15 Ke moka Baisiraele ba kgopela Jehofa gore a ba thuše. Ka gona Jehofa a ba kgethela motho yo a tlago go ba phološa, e lego Ehudi morwa wa Gera, wa leloko la Benjamini, yoo a bego a diriša letsogo la nngele. Ka morago Baisiraele ba mo roma go Egilone kgoši ya Moaba gore a ba išetše sebego. 16 Ehudi o be a itiretše sabola ya magale a mabedi gomme e be e lekana le kubiti* ka botelele. A e tlemelela ka lehlakoreng le letona la letheka la gagwe ka fase ga seaparo sa gagwe. 17 Ge Ehudi a fihla go Egilone kgoši ya Moaba o ile a mo nea sebego seo. Egilone yena o be a nonne kudu.

18 Ge Ehudi a se na go nea Egilone sebego seo, o ile a tšwa le batho bao ba bego ba se rwele. 19 Ge ba se na go fihla moo go bego go na le maswika ao a betlilwego kua Giligala, Ehudi o ile a gomela go Kgoši Egilone, gomme a re: “Kgoši, ke go swaretše molaetša wa sephiri.” Ke moka kgoši ya laela bahlanka ba yona gore ba tšwe gomme bona ba tšwa. 20 Ehudi a batamela kgoši ge e be e dutše e nnoši ka phapošing* ya ka godimo. Ke moka a re: “Ke go swaretše molaetša wo o tšwago go Modimo.” Ke moka kgoši ya emelela setulong sa yona sa bogoši. 21 Ke moka Ehudi a khwamola sabola ya gagwe yeo e bego e le ka lehlakoreng le letona la letheka la gagwe a diriša letsogo la gagwe la nngele, ke moka a hlaba Egilone mo dimpeng. 22 Sabola yeo ya sobelela mpeng ya gagwe ka moka ga yona gomme ya khupetšwa ke makhura, ka gobane Ehudi o be a se a ntšha tšhoša mpeng ya Egilone. Ka gona mantle a ile a tšwa. 23 Ehudi a tšwa ka lefasetere gomme a tswalela mejako ya phapoši ya ka godimo a e notlela. 24 Ge a tšwele, bahlanka ba kgoši ba ile ba boa gomme ba hwetša mejako ya phapoši e notletšwe. Ke moka ba re: “O swanetše go ba a ithoma ka phapošing e fodilego.” 25 Ba ile ba leta go fihla ba thoma go tshwenyega, eupša ge ba bona a sa bule mejako ya phapoši ya ka godimo, ba ile ba tšea senotlelo gomme ba e bula ke moka ba hwetša kgoši ya bona e wetše fase e hlokofetše!

26 Ehudi o ile a tšhaba ba sa dikadika, a ba a feta moo go bego go na le maswika ao a betlilwego gomme a fihla Seira a bolokegile. 27 Ya re ge a fihla tikologong ya dithabeng tša Efuraime, a letša naka gomme Baisiraele ba theoga le yena dithabeng, yena a ba etile pele. 28 Ke moka a re go bona: “Ntateleng, ka gobane Jehofa o le thušitše go fenya manaba a lena, e lego Bamoaba.” Ka gona ba mo latela gomme ba thiba moo go tshelwago Noka ya Jorodane e le gore Bamoaba ba se ke ba kgona go tshela. 29 Ka nako yeo ba bolaya Bamoaba ba 10 000 (dikete tše lesome), ba bolaya dinatla le bagale ba bona ka moka, gwa se be le o tee yo a phonyokgago. 30 Ka gona, Baisiraele ba fenya Bamoaba letšatšing leo gomme gwa ba le khutšo nageng ka mengwaga e 80.

31 Ka morago ga Ehudi, Shamogara morwa wa Anathe o ile a phološa Baisiraele gomme a bolaya banna ba 600 (makgolo a tshelelago) ba Bafilisita ka seotledi* sa dikgomo.