Puku ya Bobedi ya Dikoronika
30 Hesekia a romela molaetša go batho ba Isiraele ka moka le Juda, a ba a ngwalela bao ba dulago Efuraime le Manase mangwalo a gore ba tle ntlong ya Jehofa kua Jerusalema, go tlo keteka Paseka ya Jehofa Modimo wa Isiraele. 2 Eupša kgoši le baetapele bao e ba kgethilego gotee le phuthego ka moka yeo e bego e le Jerusalema, ba ile ba phetha ka gore ba tla keteka Paseka kgweding ya bobedi, 3 ka gobane ba be ba paletšwe ke go e keteka ka nako yeo ba tlwaetšego go e keteka ka yona ka ge go be go na le baperisita ba sego kae feela bao ba bego ba ikgethagaditše ebile le batho ba be ba se ba kgobokana kua Jerusalema. 4 Kgoši le phuthego ka moka ba ile ba bona seo se lokile. 5 Ka gona ba ile ba phetha ka gore Baisiraele ka moka ba tsebišwe gore batho ba swanetše go tla go keteka Paseka ya Jehofa Modimo wa Isiraele kua Jerusalema ka gobane ba be ba se ba ka ba e keteka e le sehlopha go ya ka seo se bego se ngwadilwe. Ba ile ba tsebišwa go tloga Beresheba go fihla Dani.
6 Ke moka, kgoši ya laela gore baromiwa* ba ye nageng ya Isiraele ka moka le Juda ba iše mangwalo ao a tšwago go kgoši le baetapele bao e ba kgethilego, ba re: “Lena Baisiraele, boelang go Jehofa Modimo wa Aborahama, Isaka le Isiraele, e le gore le yena a boele go batho bao ba šetšego bao ba phonyokgilego go dikgoši tša Asiria. 7 Le se ke la swana le borakgolokhukhu ba lena le banababo lena bao ba sa kago ba botegela Jehofa Modimo wa borakgolokhukhu ba bona. Ka baka la seo, Modimo o ile a ba tlišetša masetlapelo e le gore batho bao ba a bonago le go kwa ka ona ba tšhoge, bjalo ka ge le lena le bona. 8 Bjale le se ke la thatafiša dihlogo tša lena go swana le borakgolokhukhu ba lena. Ikokobeletšeng Jehofa gomme le tleng sekgethweng sa gagwe seo a se kgethagaditšego go ya go ile gomme le hlankele Jehofa Modimo wa lena, e le gore a se sa le galefela. 9 Ka gobane ge le boela go Jehofa, batho bao ba thopilego banababo lena le barwa ba lena ba tla ba gaugela gomme ba ba dumelela gore ba boele nageng ye ka gobane Jehofa Modimo wa lena o a šokela ebile o a gaugela le gona a ka se le furalele ge e ba le boela go yena.”
10 Ka gona baromiwa ba tloga motseng o mongwe ba ya go o mongwe nageng ka moka ya Efuraime le ya Manase, ba ba ba fihla Sebulone, eupša batho ba be ba ba sega le go ba kwera. 11 Le ge go le bjalo, batho ba bangwe bao ba tšwago molokong wa Ashere, Manase le Sebulone ba ile ba ikokobetša gomme ba tla Jerusalema. 12 Le gona Modimo wa nnete o ile a šegofatša batho ba Bajuda gore ba be le botee e le gore ba phethe seo Jehofa a se laetšego a diriša kgoši le baetapele bao e ba kgethilego.
13 Batho ba bantšhi ba ile ba kgobokana kua Jerusalema go keteka monyanya wa dinkgwa tše di sa omelwago kgweding ya bobedi. Batho bao ba bego ba bokane e be e le ba bantšhi kudu. 14 Ke moka ba ya ba tloša dialetare tšeo di bego di le Jerusalema, ba tloša le dialetare ka moka tša diorelo gomme ba di lahlela Moeding wa Kidirone. 15 Ka morago ga moo, ba hlaba diphoofolo tšeo ba tlago go dira dihlabelo tša Paseka ka tšona letšatšing la bo-14 la kgwedi ya bobedi. Baperisita le Balefi ba ile ba jewa ke dihlong gomme ba ikgethagatša ba tliša dibego tša go fišwa ka ntlong ya Jehofa. 16 Ba ema mafelong ao ba tlwaetšego go ema go ona go ya ka Molao wa Moshe monna wa Modimo wa nnete. Ke moka Balefi ba fa baperisita madi a dihlabelo gomme baperisita ba foketša madi ao aletareng. 17 Go be go na le batho ba bantšhi ka phuthegong bao ba bego ba se ba ikgethagatša. Ka gona Balefi ba be ba ikarabela ka go bolaya diphoofolo tša sehlabelo sa Paseka ba di bolaela batho ka moka bao ba sego ba hlweka, e le gore ba ba kgethagatše pele ga Jehofa ka gobane batho ka moka ba be ba se ba hlweka. 18 Le gona batho ba bantšhi, kudukudu ba go tšwa go Efuraime, Manase, Isakara le Sebulone, ba be ba se ba itlhwekiša. Eupša ba ile ba tshela molao woo o bego o ngwadilwe gomme ba ja dijo tša Paseka. Eupša Hesekia o ile a ba rapelela a re: “Anke Jehofa yo a lokilego a lebalele 19 yo mongwe le yo mongwe yo a lokišitšego pelo ya gagwe gore a tsome Modimo wa nnete e lego Jehofa Modimo wa borakgolokhukhu ba gagwe, le ge a se a hlwekišwa go ya ka melao e mekgethwa.” 20 Ka gona Jehofa o ile a theetša Hesekia gomme a lebalela* setšhaba.
21 Ka gona Baisiraele bao ba bego ba le Jerusalema ba ile ba fetša matšatši a šupa ba keteka monyanya wa dinkgwa tše di sa omelwago ba thabile kudu gomme Balefi le baperisita ba be ba tumiša Jehofa letšatši le lengwe le le lengwe ba leletša godimo diletšo tša bona tša mmino ba di leletša Jehofa. 22 Go oketša moo, Hesekia o ile a bolela le Balefi ka moka bao ba bego ba dira dilo ka bohlale ge ba hlankela Jehofa le gona o ile a ba kgothatša. Ba ile ba fetša matšatši a šupago ba eja dijo tša monyanyeng woo, ba dira dihlabelo tša go dira khutšo le Modimo ebile ba leboga Jehofa Modimo wa borakgolokhukhu ba bona.
23 Ke moka phuthego ka moka ya dira phetho ya go keteka monyanya woo ka matšatši a mangwe a šupago, ka gona ba o keteka ka matšatši a mangwe a šupago ba thabile. 24 Le gona, Kgoši Hesekia wa Juda o ile a ntšha moneelo wa dipoo tše 1 000 (sekete) le dinku tše 7 000 (dikete tše šupago) a o ntšhetša batho bao ba bego ba kgobokane moo. Baetapele bao a bego a ba kgethile le bona ba ile ba ntšha dipoo tše 1 000 (sekete) le dinku tše 10 000 (dikete tše lesome) ba di ntšhetša batho bao ba bego ba kgobokane moo ebile baperisita ba bantšhi ba ile ba ikgethagatša. 25 Phuthego ka moka ya Juda, baperisita, Balefi, le phuthego ka moka yeo e bego e etšwa Isiraele gotee le batho bao ba bego ba etšwa Isiraele eupša e se Baisiraele le bao ba dulago Juda ba ile ba tšwela pele ba thabile. 26 Batho bao ba bego ba le Jerusalema ba be ba thabile kudu ka gobane ga se gwa ka gwa direga selo sa go swana le se Jerusalema go tloga nakong ya ge Solomone morwa wa Dafida kgoši ya Isiraele a be a buša. 27 Mafelelong baperisita ba Balefi ba ile ba emelela gomme ba šegofatša setšhaba. Ke moka Modimo a kwa mantšu a bona ebile thapelo ya bona e ile ya fihla magodimong e lego lefelong la gagwe le lekgethwa.