Jesaya
58 “Goeletša ka lentšu la go hlaboša, o se ke wa tšhaba.
Goeletša go swana le lenaka ge le lla,
O botše batho ba ka gore ba ntlhanogetše,
Gomme ditlogolo tša Jakobo o di botše dibe tša tšona.
2 Ba nnyaka letšatši le letšatši,
Le gona ba a thaba ka ge ba tseba ditsela tša ka,
Bjalo ka ge eka e be e le setšhaba seo se bego se dira dilo tša go loka,
E bile se sa ka sa tlogela go latela melao ya Modimo wa sona.
Batho ba setšhaba seo ba nkgopela gore ke ahlole ka toka,
Bjalo ka ge eka ba thabela go batamela Modimo.
3 Ba re: ‘Goreng o sa bone ge re itima dijo,
Le gona goreng o sa bone ge re nyamile ka baka la dibe tša rena?’
Nna ka re: “Ka gobane letšatšing leo le itimago dijo, le dira dilo tšeo le di ratago,
E bile le gatelela batho bao ba le šomelago,
4 Ge le itima dijo le feleletša le ngangišana e bile le elwa,
Le gona le itiana ka difeisi gabohloko.
Le ka se ke la itima dijo ka mokgwa wo, gomme la nyaka gore mantšu a lena a kwewe magodimong.
5 Na tsela yeo le itimago dijo ka yona ke ka mokgwa wo ke le kgopetšego gore le dire ka gona,
Gore e be letšatši la gore motho a itlaiše,
Gore motho a inamiše hlogo bjalo ka ge eka ke bjang bjo botelele,
Gore a robale godimo ga mekotla le melora?
Na le nagana gore matšatši ao le itimago dijo ka ona a tla thabiša Jehofa?
6 Aowa, tsela yeo ke le laelago gore le itime dijo ka yona ke ye:
Le tlemolle diketane tša kgatelelo,
Le tlemolle le dithapo tša joko,
Gore bao ba gateletšwego ba lokologe,
Le gore le robe joko e nngwe le e nngwe e tšwe diripa tše pedi,
7 E bile le fe bao ba swerwego ke tlala dijo,
Bao ba diilago le bao ba se nago magae le ba tliše ka dintlong tša lena,
Bao ba se nago diaparo le ba feng diaparo,
Le se ke la hlanogela batho ba gabo lena.
8 Seetša sa lena se tla hlaba go swana le ge go esa,
E bile le tla fola ka pela.
Go loka ga lena go tla le eta pele,
Gomme letago la Jehofa le tla le šireletša ka morago.
9 Ke moka le tla bitša gomme Jehofa o tla le araba,
Le tla kgopela gore a le thuše gomme yena o tla re: ‘Ke nna yo!’
Ge le tloša joko gare ga lena,
E bile le tlogela go šupašupana ka menwana le go fošana ka mantšu,
10 Ge le ka fa yo a swerwego ke tlala seo lena le se kganyogago,
La dira gore yo a tlaišegilego a kgotsofale,
Gona seetša sa lena se tla bonega le leswiswing,
Gomme leswiswi la lena le tla swana le seetša sa mosegare.
11 Jehofa o tla le hlahla ka mehla,
O tla le kgotsofatša le ge le le nageng e omilego,
O tla le matlafatša,
Gomme le tla swana le serapa seo se nošetšwago gabotse,
La ba la swana le mothopo wa meetse woo meetse a wona a sa pšhego.
12 Marope a kgale a tla tsošološwa ka baka la lena,
Le tla tsošološa difantišeni tšeo di bego di le gona melokong e fetilego.
Le tla bitšwa bao ba tsošološago maboto ao a welego,
Le bao ba tsošološago ditsela tšeo batho ba dulago kgauswi le tšona.
13 “Ge e ba le sa dire dilo tšeo le di ratago ka ge e le Sabatha, lona letšatši la ka le lekgethwa,
Gomme la tšea sabatha e le e thabišago kudu, lona letšatši le lekgethwa la Jehofa leo le tagafatšwago,
La ba la le tagafatša go e na le go dira dilo tšeo le di ratago le go bolela dilo tšeo di se nago mohola,
14 Gona nna Jehofa ke tla dira gore le thabe kudu ka baka la ka,
Gomme ke tla dira gore le buše mafelo a phagamego a lefase.
Ke tla dira gore le je bohwa bja rakgolokhukhu wa lena Jakobo,
Ka gobane se ke seo se boletšwego ke nna Jehofa.”