Mika
7 Ke wa madimabe!
Ke bjalo ka motho yo a nyakago diterebe tšeo a ka di jago,
Goba mago a mabose ao a a kganyogago eupša a se a hwetše.
Ka gobane dienywa tša selemo di šetše di kgobokeditšwe,
E bile nako ya go kga diterebe e fedile.
2 Lefaseng ga go sa na motho yo a tshepegago,
E bile ga go sa na motho yo a lokilego.
Ka moka ga bona ba nyaka motho yo ba ka mmolayago.
Yo mongwe le yo mongwe o radia ngwanabo bjalo ka batsomi ge ba thea diphoofolo.
3 Ba kgona go dira dilo tše mpe.
Moetapele wa gona o nyaka pipamolomo,
Le moahlodi o nyaka go patelwa gore a ahlole.
Yo a nago le maemo o bolela dilo tšeo yena a di nyakago.
Ka moka ga bona ba a šomišana.
4 Yo a ba phalago o swana le meetlwa,
Yo a lokilego go ba feta o phalwa le ke lešaša le legolo la meetlwa.
Letšatši la gore batho ba go leta motse le la gore batho ba ahlolwe le tla tla.
Ba tlo gakanega.
5 Le se ke la tshepa batho ba gabo lena,
Goba la tshepa bagwera ba lena ba bagolo.
O hlokomele seo o se botšago mosadi wa gago.
6 Morwa o nyatša tatagwe,
Morwedi o lwa le mmagwe,
Ngwetši e lwa le mmatswale wa yona,
Manaba a motho e tla ba ba gabo.
7 Eupša ge e le nna ke tla dula ke letile go tlo bona seo Jehofa a tlago go se dira.
Ke tla leta Modimo yo a mphološago ke sa fele pelo.
Modimo wa ka o tla nkwa.
8 Wena lenaba la ka, o se ke wa thabišwa ke gore ke mathateng.
Le ge ke wele, ke tla tsoga,
Le ge ke dula leswiswing, Jehofa e tla ba seetša sa ka.
9 Ke tla kgotlelela kgalefo ya Jehofa,
Go fihlela a nkemelela e bile a nkahlola ka toka,
Ka gobane ke mo diretše sebe.
O tla ntliša seetšeng,
Gomme ke tla bona go loka ga gagwe.
10 Lenaba la ka le lona le tlo bona seo,
Yo a rilego go nna: “Jehofa Modimo wa gago o kae?”
O tla lewa ke dihlong.
Ke tla bona kamoo lenaba leo le tlago go gatakelwa ka gona,
Bjalo ka maraga diterateng.
11 E tla be e le letšatši la go aga maboto a lena ka maswika,
Letšatšing leo mollwane wa naga ya lena o tla oketšwa.
12 Letšatšing leo ba tla tla go lena ba etšwa Asiria le metseng ya Egepeta,
Ba etšwa dinageng ka moka go tloga Egepeta go fihla Nokeng ya Eforate,
Ba etšwa lewatleng le lengwe go fihla go le lengwe,
Le go tloga thabeng e nngwe go fihla go e nngwe.
13 Naga e tla ba marope,
Ka baka la dilo tšeo batho bao ba dulago go yona ba di dirilego.
14 Diša batho ba gago ka lepara la gago, e lego dinku tša gago,*
Bona bao ba bego ba dula ba nnoši sethokgweng, eupša go le bjalo ka ge eka ba dula serapeng sa dienywa.
Anke ba je kua Bashani le Gileada go swana le kgale.
15 “Ke tla le bontšha dilo tše di makatšago,
Go swana le ge ke ile ka dira bjalo ge le be le etšwa nageng ya Egepeta.
16 Ditšhaba di tla bona seo gomme le ge di na le matla, di tlo hlabja ke dihlong.
Di tla itshwara melomo,
Ditsebe tša tšona di tla thibana.
17 Ditšhaba tšeo di tlo latswa lerole bjalo ka dinoga,
Di tlo tšwa mafelong a tšona a go khuta di thothomela ka baka la go tšhoga go swana le digagabi.
Di tla tla go Jehofa Modimo di tšhogile
Gomme di tla mmoifa kudu.”
18 Ke Modimo ofe yo a swanago le wena,
Yo a swarelago diphošo le go lebalela dibe tša batho bao ba šetšego ba setšhaba sa Isiraele?
A ka se dule a galefile go ya go ile,
E bile o thabišwa ke go bontšha lerato le legolo.*
19 O tla re bontšha kgaugelo gape, o tla fenya diphošo tša rena bjalo ka ge eka o fenya manaba.
Dibe tša rena o tla di lahlela garegare ga lewatle.
20 Dilo ka moka tšeo o di boditšego Jakobo e be e le nnete.
E bile o ile wa bontšha Aborahama lerato le legolo,
Le rena o tla re swara ka tsela yeo, ka gobane o ile wa tshepiša borakgolokhukhu ba rena mehleng ya kgale gore o tla dira bjalo.