Esera

10 Ge Esera a sa rapela e bile a botša Modimo dibe tša setšhaba sa gabo, a lla e bile a rapaletše pele ga ntlo ya Modimo wa nnete, lešaba le legolo la Baisiraele, e lego banna, basadi le bana ba mo kgobokanela, gomme le bona ba lla kudu. 2 Ke moka Shekania morwa wa Jehiele wa barwa ba Elama a re go Esera: “Ga se ra botegela Modimo wa rena ka go nyala basadi ba ditšhaba tše dingwe. Eupša Baisiraele ba sa na le tshepo ya gore Modimo o tla dirišana le bona gabotse. 3 A re eneleng Modimo wa rena gore re tlo bušetša morago basadi ka moka le bana ba bona, ka go dumelelana le tlhahlo ya Jehofa le ya bao ba hlomphago molao wa Modimo wa rena. A re direng dilo go ya ka molao. 4 Emelela, ka gobane taba ye ke boikarabelo bja gago gomme rena re a go thekga. Eba le sebete, gomme o dire se sengwe ka taba ye.”

5 Ge a realo, Esera a ema a dira gore baetapele ba baperisita, Balefi le Baisiraele ka moka, ba ene gore ba tla dira ka go dumelelana le seo se boletšwego ke Shekania. Ke moka ba ena. 6 Bjale Esera a ema a tloga moo pele ga ntlo ya Modimo wa nnete a ya phapošing* ya Jehohanani morwa wa Eliashiba. Le ge a ile a ya moo, ga se a ja dijo le go nwa meetse ka ge a be a llišwa ke go se tshepege ga bao ba kilego ba ya bothopša.

7 Ke moka ba tsebiša batho ka moka kua Juda le Jerusalema gore bohle bao e kilego ya ba mathopša ba kgobokane kua Jerusalema. 8 Dikgošana le banna ba bagolo ba ntšhitše taelo ya gore motho le ge e le ofe yo go ka fetago matšatši a mararo a se a tla, dithoto tša gagwe ka moka di tšewe gomme yena a rakwe setšhabeng sa Baisiraele.* 9 Bjale banna ka moka ba Juda le ba Benjamini ba kgobokana kua Jerusalema pele go ka fela matšatši a mararo, e lego ka letšatši la bo-20 la kgwedi ya senyane. Batho ka moka ba be ba dutše lapeng la ntlo ya Modimo wa nnete. Ba thothomela ka gobane taba yeo ba bego ba tlile ka yona e be e le e kgolo, le ka gobane go be go ena pula e matla.

10 Ke moka moperisita Esera a ema a re go bona: “Ga se la botegela Modimo ka go nyala basadi ba ditšhaba tše dingwe, gomme ka go dira bjalo, le okeditše molato wa Isiraele. 11 Bjale botšang Jehofa Modimo wa borakgolokhukhu ba lena dibe tša lena gomme le dire dilo tšeo di mo kgahlago. Le kgaoganeng le ditšhaba tša dinaga tše dingwe, e bile le aroganeng le basadi ba ditšhaba tšeo, bao le šetšego le ba nyetše.” 12 Ge a re’alo, batho ka moka bao ba bego ba bokane ba bolelela godimo ba re: “Re tla dira sona seo o se bolelago. 13 Eupša go na le batho ba bantšhi e bile re sehleng sa dipula, ga go kgonege gore re eme ka ntle. Le gona taba ye e ka se tšee letšatši letee goba a mabedi ka gobane re diretše Modimo sebe se segolo. 14 Hle re kgopela gore dikgošana tša rena di emele batho ka moka legato. Ke moka bohle bao ba lego metseng ya rena bao ba nyetšego basadi ba ditšhaba tše dingwe, ba tle ka nako yeo e beilwego ba na le banna ba bagolo le baahlodi ba metseng ya gabo bona e le gore ba tle ba rarolle taba ye gore Modimo a se sa re galefela ka baka la sebe seo re se dirilego.”

15 Eupša Jonathane morwa wa Asahele le Jahasia morwa wa Tikifa ba se dumelelane le taba ye, gomme Meshulama le Shabethai bao e lego Balefi le bona ba ba thekga. 16 Bao ba kilego ba ya bothopša bona, ba latela seo se boletšwego. Moperisita Esera le banna bao e bego e le dihlogo tša malapa a botatago bona, bao ka moka ba boletšwego ka maina, ba ikarola gomme ba kgobokana ka letšatši la pele la kgwedi ya lesome gore ba nyakišiše ka taba ye. 17 Letšatšing la pele la kgwedi ya pele ba fetša go rarolla taba ya banna ka moka bao ba bego ba nyalane le basadi ba ditšhaba tše dingwe. 18 Ba ile ba hwetša gore ba bangwe ba barwa ba baperisita ba nyalane le basadi ba ditšhaba tše dingwe. Go barwa ba Jeshua ba hweditše morwa wa Jehosadaka le bana babo e lego Maaseya, Eliesere, Jariba le Gedalia. 19 Eupša ba ile ba tshepiša gore ba tla tlogela basadi bao ba bona, le gore ka ge ba na le molato, yo mongwe le yo mongwe o tla ntšha nku e tona ka baka la molato wa gagwe.

20 Baperisita ba bangwe bao ba bego ba nyetše basadi ba ditšhaba tše dingwe ke ba ba latelago: Go barwa ba Imere e be e le Hanani le Sebadia. 21 Go barwa ba Harima e be e le Maaseya, Eliya, Shemaya, Jehiele le Usia. 22 Go barwa ba Pashuri e be e le Elioenai, Maaseya, Ishimaele, Nethanele, Josabadi le Eleasa. 23 Go Balefi e be e le Josabadi, Shimei, Kelaya (e lego Kelita), Phethahia, Juda le Eliesere. 24 Go diopedi e be e le Eliashiba. Go batho bao ba šomago go leta dikeiting e be e le Shalume, Telema le Uri.

25 Baisiraele bao ba bego ba nyetše basadi ba ditšhaba tše dingwe ke ba ba latelago: Go barwa ba Paroshe e be e le Ramia, Isiya, Malakiya, Mijamini, Eleasara, Malakia le Benaya. 26 Go barwa ba Elama e be e le Matania, Sakaria, Jehiele, Abadi, Jeremothe le Eliya. 27 Go barwa ba Sathu e be e le Elioenai, Eliashiba, Matania, Jeremothe, Sabada le Asisa. 28 Go barwa ba Bebai e be e le Jehohanani, Hanania, Sabai le Athalai. 29 Go barwa ba Bani e be e le Meshulama, Maluka, Adaya, Jashubu, Sheale le Jeremothe. 30 Go barwa ba Pahathe-moaba e be e le Adena, Kelale, Benaya, Maaseya, Matania, Betsalele, Binui le Manase. 31 Go barwa ba Harima e be e le Eliesere, Isishija, Malakiya, Shemaya, Shimeone, 32 Benjamini, Maluka le Shemaria. 33 Go barwa ba Hashuma e be e le Matenai, Matata, Sabada, Elifelete, Jeremai, Manase le Shimei. 34 Go barwa ba Bani e be e le Maadai, Amorama, Uele, 35 Benaya, Bedeya, Keluhi, 36 Bania, Meremothe, Eliashiba, 37 Matania, Matenai le Jaasu. 38 Go barwa ba Binui e be e le Shimei, 39 Shelemia, Nathane, Adaya, 40 Makanadibai, Shashai, Sharrai, 41 Asarele, Shelemia, Shemaria, 42 Shalume, Amaria le Josefa. 43 Go barwa ba Nebo e be e le Jeiele, Matitia, Sabada, Sebina, Jadai, Joele le Benaya. 44 Banna ba ka moka ba be ba nyalane le basadi ba ditšhaba tše dingwe, gomme ba ile ba bušetša basadi bao le bana ba bona morago.