Puku ya Pele ya Samuele
4 Samuele a bolela le Baisiraele ka moka.
Ke moka Baisiraele ba ya go gahlana le Bafilisita lefelong la ntwa, ba hloma ditente kgauswi le Ebenetsere, gomme Bafilisita ba hloma ditente Afeke. 2 Bafilisita ba ipopa ngatana gore ba yo lwa le Baisiraele, eupša ntwa ya ba e šoro moo Bafilisita ba ilego ba fenya Baisiraele. Bafilisita ba bolaya banna ba e ka bago ba 4 000 (dikete tše nne) moo go bego go lwewa gona. 3 Ge mašole a boetše kampeng, banna ba bagolo ba Isiraele ba re: “Ke ka baka la’ng lehono Jehofa a re lesa re fenywa* ke Bafilisita? A re tšeeng areka ya kgwerano ya Jehofa yeo e lego kua Shilo re tle le yona mo, e le gore e tle e re phološe go manaba a rena.” 4 Ka gona gwa romelwa batho Shilo gore ba yo tšea areka ya kgwerano ya Jehofa wa madira yo a dutšego godimo* ga bakerubi. Barwa ba babedi ba Eli e lego Hofini le Finease ba be ba le moo le areka ya kgwerano ya Modimo wa nnete.
5 Gateetee ge areka ya kgwerano ya Jehofa e se na go fihla kampeng, Baisiraele ka moka ba ile ba goeletša kudu, moo lefase le ilego la thothomela. 6 Ge Bafilisita ba ekwa Baisiraele ba goeletša kudu, ba re: “Ke ka baka la’ng kampeng ya Baheberu go na le lešata le legolo?” Mafelelong ba lemoga gore Areka ya Jehofa e tlišitšwe kampeng. 7 Bafilisita ba tšhoga, ke moka ba re: “Modimo o tlile kampeng! Re ba madimabe, ka gobane selo sa go swana le se ga se sa ka sa direga peleng. 8 Re ba madimabe! Ke mang yo a tlago go re phološa go Modimo yo yo matla? Yo ke yena Modimo yo a bolailego Baegepeta ka dikotlo tše dintši kua lešokeng. 9 Lena Bafilisita, ebang le sebete go swana le bannanna e le gore le se ke la hlankela Baheberu go etša kamoo ba le hlanketšego ka gona. Bontšhang gore le banna gomme le lwe!” 10 Ka gona, Bafilisita ba lwa le Baisiraele gomme ba ba fenya. Moisiraele yo mongwe le yo mongwe a tšhabela tenteng ya gagwe. Go ile gwa bolawa batho ba bantši kudu. Go ile gwa bolawa mašole a Baisiraele a 30 000 (dikete tše masome a mararo) ao a sepelago ka maoto. 11 Le gona Areka ya Modimo e ile ya thopša, gomme barwa ba babedi ba Eli e lego Hofini le Finease ba ile ba hwa.
12 Monna yo mongwe wa moloko wa Benjamini a tšhaba ntweng gomme a fihla Shilo lona letšatšing leo, diaparo tša gagwe di be di gagogane e bile hlogo ya gagwe e na le ditšhila. 13 Ge monna yoo a fihla moo, a hwetša Eli a dutše setulong ka thoko ga tsela, a letetše go kwa gore go direga eng, ka gobane o be a tshwenyegile ka baka la Areka ya Modimo wa nnete. Monna yoo a tsena motseng gomme a o tsebiša seo se diregilego, ke moka motse ka moka wa thoma go hlakahlakana. 14 Ge Eli a ekwa mašata ao, a re: “Mašata a ke a eng?” Monna yoo a phakiša a ya a botša Eli seo se diregilego. 15 (Ka nako yeo, Eli o be a na le mengwaga e 98. Mahlo a gagwe a be a bulegile eupša a sa bone.) 16 Monna yoo a re go Eli: “Ke tšwa ntweng, e bile ke tšhabile gona moo lehono.” Ge a re’alo Eli a re: “Go diregile’ng morwa wa ka?” 17 Monna yoo a araba a re: “Baisiraele ba tšhabile Bafilisita, ka gobane ba fentšwe e bile batho ba bantši ba hwile. Le gona, barwa ba gago ba babedi e lego Hofini le Finease ba hlokofetše e bile Bafilisita ba thopile Areka ya Modimo wa nnete.”
18 Ya re ge monna yoo a bolela ka Areka ya Modimo wa nnete, Eli a wa ka sa morago setulong seo a bego a dutše go sona kgauswi le keiti, molala wa gagwe wa robega gomme a hlokofala, ka gobane o be a tšofetše e bile e le yo mokoto. O bile moahlodi wa Isiraele ka mengwaga e 40. 19 Ngwetši ya gagwe, e lego mosadi wa Finease, o be a imile e bile a le kgauswi le go belega. Ge a ekwa gore Areka ya Modimo wa nnete e thopilwe le gore ratswale wa gagwe le monna wa gagwe ba hlokofetše, o ile a šokwa kapelapela a se a letela gomme a belega. 20 Ge mosadi wa Finease a be a hlokofala, basadi bao ba bego ba le kgauswi le yena ba ile ba re: “O se ke wa boifa ka gobane o belege morwa.” Eupša yena a se arabe e bile a se be le taba le seo ba bego ba se bolela. 21 A reela mošemanyana yoo leina a re ke Ikabodi, a re: “Letago le tlogile Isiraele la ya bothopša,” a bolela ka Areka ya Modimo wa nnete yeo e thopilwego le ka seo se diragaletšego ratswale wa gagwe le monna wa gagwe. 22 A re: “Letago le tlogile Isiraele la ya bothopša, ka gobane Areka ya Modimo wa nnete e thopilwe.”