Esera

3 Ka kgwedi ya bošupa Baisiraele ba be ba le metseng ya gabo bona. Ke moka ba ipopa ngatana e tee ba kopana Jerusalema. 2 Jeshua morwa wa Jehosadaka, le baperisitagotee le yena le Serubabele morwa wa Shealatiele le banababo, ba ile ba yo aga aletare ya Modimo wa Isiraele gore ba neele dihlabelo tša go fišwa go yona, go ya kamoo go ngwadilwego ka gona Molaong wa Moshe, yena monna wa Modimo wa nnete.

3 Ka gona, ba ile ba aga aletare moo e bego e le gona peleng, le ge ba be ba tšhaba batho ba dinageng tšeo ba bego ba le kgauswi le tšona. Ke moka ba direla Jehofa dihlabelo tša go fišwa go yona, tša mesong le tša mantšiboa. 4 Ba dira Monyanya wa Mešaša go ya ka seo se ngwadilwego molaong. Ba neela dihlabelo tša go fišwa aletareng tšeo ba bego ba swanetše go di neela letšatši le lengwe le le lengwe. 5 Ka morago ga moo, ba ile ba tšwela pele ba neela dihlabelo tšeo tša go fišwa, le meneelo ya ge go tšwelela ngwedi o moswa, le meneelo ya dihla ka moka tša menyanya e mekgethwa ya Jehofa. Ba ile ba neela le ka dilo ka moka tšeo motho yo mongwe le yo mongwe a di fago Jehofa ka go rata. 6 Go tloga letšatšing la pele la kgwedi ya bošupa, ba thoma go neela Jehofa dihlabelo tša go fišwa, le ge fantešeni ya tempele ya Jehofa e be e se ya tšwa e dirwa.

7 Ba patela babetli ba maswika le ditsebi tša mošomo wa diatla ka tšhelete. Basidone le Batiro ba ba fa dijo, dino le makhura ka ge ba tlišitše dikota tša mohlare wa motsedara go tšwa Libanoni ba di tshediša lewatle go ya Jopa, go ya kamoo Kgoši Korese wa Peresia a ba dumeletšego ka gona.

8 Ka ngwaga wa bobedi kgweding ya bobedi, ka morago ga ge Serubabele morwa wa Shealatiele le Jeshua morwa wa Jehosadaka ba šetše ba fihlile ntlong ya Modimo wa nnete, gotee le bana babo bona ka moka, baperisita, Balefi le bohle bao ba tlilego Jerusalema ba etšwa bothopša, ba ile ba thoma mošomo wa go aga. Ba ile ba kgetha Balefi, go thoma ka ba mengwaga e 20 go ya godimo, gore ba hlokomele mošomo wa go aga ntlo ya Jehofa. 9 Ke moka Jeshua, barwa ba gagwe le bana babo, le Kadimiele le barwa ba gagwe, bao ka moka e bego e le barwa ba Juda, gotee le barwa ba Henadada le barwa ba bona le bana babo bona bao ka moka e bego e le Balefi, ba ipopa ngatana e tee gore ba hlokomele bao ba bego ba šoma ntlong ya Modimo wa nnete.

10 Ge baagi ba be ba dira fantešeni ya tempele ya Jehofa, baperisita bao ba bego ba apere diaparo tša boperisita ba be ba swere diphalafala, gomme Balefi bao e lego barwa ba Asafa ba be ba swere disimbala. Ba ile ba ema ba tumiša Jehofa go ya ka taelo ya Kgoši Dafida wa Isiraele. 11 Ba ile ba thoma go opelela Jehofa ka go šiedišana, ba mo tumiša le go mo leboga ba re: “O lokile, o tla dula a bontšha Isiraele lerato la gagwe le legolo* go ya go ile.” Ke moka batho ka moka ba goeletša ba tumiša Jehofa, ka ge fantešeni ya ntlo ya Jehofa e be e dirwa. 12 Baperisita ba bantšhi, Balefi le dihlogo tša malapa a gabo bona, e lego banna ba ba godilego bao ba bonego tempele yela ya pele, ba ile ba llela godimo ge ba be ba bona fantešeni ya tempele e dirwa, mola ba bangwe ba bantšhi ba be ba goeletša ba thabile. 13 Batho ba be ba sa kgone go tseba gore lešata leo e be e le la gore batho ba thabile goba ba a lla, ka gobane ba be ba goeletša kudu moo e lego gore le batho ba kgole kudu ba be ba ba kwa.