Jeremia
20 Bjale Pashuri morwa wa Imere, yo e lego moperisita, yoo gape e bego e le molaodi yo mogolo ntlong ya Jehofa, o be a theeditše ge Jeremia a be a le gare a porofeta ka dilo tše. 2 Ke moka Pashuri a itia moporofeta Jeremia, gomme a mo tsenya ka setokising* seo se bego se le Keiting ya ka Godimo ya Benjamini, yeo e bego e le ntlong ya Jehofa. 3 Eupša ya re letšatšing le le latelago ge Pashuri a ntšhitše Jeremia setokising, Jeremia a re go yena:
“Jehofa o fetošitše leina la gago gore e se sa ba Pashuri, eupša o tla bitšwa Letšhogo le mo Gohle. 4 Jehofa o re: ‘Ke tla dira gore wena le bagwera ba gago ka moka le tšhoge ka baka la selo seo se tlago go le diragalela, gomme ba tla bolawa ka sabola ya manaba a bona, wena o dutše o ba lebeletše. Ke tla nea kgoši ya Babilona matla, gore e laole Bajuda ka moka. Ke moka e tla tšea ba bangwe ba bona, ya ba iša bothopša Babilona gomme bao ba šetšego ya ba bolaya ka sabola. 5 Ke tla nea manaba a ona mahumo a motse wo, dilo tša wona ka moka, dilo ka moka tše bohlokwa tša wona, le mahumo ka moka a dikgoši tša Juda. Manaba ao a tla tšea dilo tšeo gomme a di iša Babilona. 6 Ge e le wena Pashuri, le batho ka moka bao ba dulago ntlong ya gago, le tla ya bothopša. O tla ya Babilona gomme wa hwela moo, gomme o tla bolokwa moo wena le bakgotse ba gago ka moka, ka gobane o ba porofetetše maaka.’”
7 O ntahleditše wena Jehofa, gomme nna ka lahletšega.
O šomišitše matla a gago go lwa le nna, gomme wa mphenya.
Ke segwa ke batho letšatši ka moka,
Yo mongwe le yo mongwe o a nkwera.
8 Nako le nako ge ke bolela, ke swanelwa ke go goeletša ke re:
“Bošoro le phedišo!”
Lentšu la Jehofa le dirilwe gore ke rogwe le go kwerwa letšatši ka moka.
9 Bjale ka re: “Nka se sa bolela ka yena,
E bile nka se sa hlwa ke bolela ka leina la gagwe.”
Eupša pelong ya ka, lentšu la gagwe la ba bjalo ka mollo o tukago wo o sa kgonego go tšwa marapong a ka,
Ke be ke lapišitšwe ke go homola,
Ke be ke se sa kgona go kgotlelela.
10 Ka gobane ke kwele mabarebare a dilo tše dintšhi tše mpe,
Ke be ke tšhogile.
Batho ba re: “Mmeeng molato, a re mmeeng molato!”
Batho ka moka bao ba bego ba itira okare ba nyaka gore dilo di ntshepelele gabotse, ba be ba letetše go mpona ke ewa.
Ba re: “Mohlomongwe o tla dira phošonyana ya botlaela,
Ke moka ra mo swara ka yona, gomme ra itefeletša go yena.”
11 Eupša Jehofa o be a na le nna, go swana le lešole leo le tšhošago.
Ke ka lebaka leo bao ba ntlaišago ba tlago go kgopša gomme ba ka se fenye.
Ba tla hlabišwa dihlong kudu, ka gobane ba ka se atlege dilong tšeo ba di dirago.
Go tlontlollwa ga bona go ka se tsoge go lebetšwe, e bile e tla ba ga go ya go ile.
12 Eupša wena Jehofa wa madira, ke wena o hlahlobago yo a lokilego,
Ke wena o bonago pelo le dilo tšeo motho a di naganago ka garegare.*
Anke ke bone ge o ba galefetše,
Ka gobane ke go tsebišitše molato wa ka.
13 Opelelang Jehofa! Tumišang Jehofa!
Ka gobane o phološitše modiidi go batho ba babe.
14 A go rogakwe letšatši leo ke belegwego ka lona!
Anke letšatši leo mma a mpelegego ka lona le se ke la šegofatšwa!
15 A go rogakwe motho yo a tlišeditšego tate ditaba tše dibotse, a re:
“O belegetšwe morwa, ngwana wa mošemane!”
A dira gore tate a thabe kudu.
16 Anke motho yoo a swane le metse yeo Jehofa a e fedišitšego ntle le gore a itshole.
Anke motho yoo a kwe sello mesong, gomme a kwe mokgoši mosegare wa sekgalela.
17 Goreng a se a ka a mpolaela ka popelong,
Gore popelo ya mma e be lebitla la ka,
Gomme mma a dule e le moimana go ya go ile a se ke a mpelega?
18 Goreng ke tšwile ka popelong,
Gore ke tle ke bone mathata le manyami,
Le gore bophelo bja ka bo no feleletša ka go hlabiša dihlong?