Hesekiele

14 Go ile gwa tla ba bangwe ba banna ba bagolo ba Isiraele ba dula pele ga ka. 2 Ke moka Jehofa a bolela le nna a re: 3 “Morwa wa motho, banna ba ba ikemišeditše go tšwela pele ba rapela medingwana ya bona e šišimišago, ebile ba beile molaba wo o dirago gore batho ba dire sebe. Na ke ba arabe ge ba mpotšiša? 4 Bjale ba botše o re: ‘Mmuši Morena Jehofa o re: “Ge Moisiraele yo a ikemišeditšego go tšwela pele a rapela medingwana e šišimišago le yo a beago molaba gore batho ba dire sebe, a ka ya go moporofeta gore a yo botšiša, nna Jehofa ke tla mo nea karabo yeo e mo swanelago go ya ka medingwana ya gagwe e mentši yeo e šišimišago. 5 Ke tla dira gore Baisiraele ba tšhoge, ka gobane ka moka ga bona ba ntlhanogetše ba thoma go rapela medingwana ya bona yeo e šišimišago.”’

6 “Ka gona botša Baisiraele o re: ‘Mmuši Morena Jehofa o re: “Boang go nna, le tlogele go rapela medingwana ya lena yeo e šišimišago ebile le tlogele go dira dilo ka moka tše di šišimišago. 7 Ge Moisiraele le ge e le ofe goba motho yo a tšwago nageng e nngwe yo a dulago Isiraele a ka ntlhanogela gomme a tšwela pele a rapela medingwana ya gagwe yeo e šišimišago, ebile a bea molaba wo o dirago gore batho ba dire sebe, ke moka a ya go moporofeta wa ka go yo kgopela thušo, nna Jehofa ke tla mo araba. 8 Ke tla fetoga lenaba la motho yoo, gomme ke tla dira mohlala ka yena gore ke lemoše ba bangwe ebile ka dira gore ba bangwe ba mo kwere, le gona ke tla mo tloša setšhabeng sa ka. Ke moo le tlago go tseba gore ke nna Jehofa.”’

9 “‘Eupša ge e ba moporofeta a ka dirwa lešilo gomme a araba, e tla be e le nna Jehofa ke mo dirilego lešilo. Ke tla otlolla seatla sa ka ka mo fediša a se sa ba gona gare ga setšhaba sa ka sa Isiraele. 10 Ba tla swanelwa ke go rwala molato wa bona. Molato wa moporofeta o tla lekana le wa motho yo a mmotšišitšego, 11 e le gore Baisiraele ba se sa hlwa ba ntlhanogela le go itšhilafatša ka melato ya bona ka moka. Bona e tla ba batho ba ka gomme nna ka ba Modimo wa bona,’ o realo Mmuši Morena Jehofa.”

12 Jehofa a bolela le nna gape a re: 13 “Morwa wa motho, ge batho ba mo nageng ba ka ntirela sebe, ke tla otlollela seatla sa ka go yona ka dira gore go se sa ba le dijo, ke tla tliša tlala nageng ka ba ka fediša batho le diruiwa mo go yona.” 14 “‘Le ge nkabe banna ba ba bararo, e lego Noa, Daniele le Jobo, ba be ba le nageng yeo, ka ge ba lokile ba be ba tla no kgona go phološa maphelo a bona feela,’ o realo Mmuši Morena Jehofa.”

15 “‘Goba ge nka dira gore dibata tše šoro di fete nageng yeo gore di bolaye batho ba moo, gomme naga yeo ya fetoga lešope leo go se nago motho yo a fetago go lona ka baka la dibata tšeo, 16 gona ke ikana ka nna Modimo yo a phelago gore ge e ba banna ba ba bararo ba be ba le nageng yeo, ba be ba ka se kgone go phološa barwa goba barwedi ba bona. Ba be ba tlo phološa bona feela, gomme naga ya fetoga lešope,’ o realo Mmuši Morena Jehofa.”

17 “‘Goba le ge nka tliša sabola nageng, ke moka ka re: “Anke sabola e tsene nageng,” gomme e bolaye batho le diruiwa, 18 ke ikana ka nna Modimo yo a phelago gore le ge nkabe banna ba ba bararo ba be ba dula nageng yeo, ba be ba ka se kgone go phološa barwa goba barwedi ba bona, eupša ba be ba tlo phološa bona feela,’ o realo Mmuši Morena Jehofa.”

19 “‘Goba ge ke be nka dira gore go be le leuba la bolwetši nageng yeo, gomme ka galefela naga yeo ka gore ke bolaye batho le diruiwa tšeo di lego moo, 20 ke ikana ka nna Modimo yo a phelago gore le ge nkabe Noa, Daniele le Jobo ba be ba dula moo, ba be ba ka se kgone go phološa barwa goba barwedi ba bona. Ba be ba tla phološa bona feela, ka baka la ge ba lokile,’ o realo Mmuši Morena Jehofa.”

21 “Mmuši Morena Jehofa o re: ‘Go tlo ba bjalo ge ke tla be ke tliša dikahlolo tša ka tše nne motseng wa Jerusalema, e lego sabola, tlala, dibata tše šoro le leuba la bolwetši, gore ke fediše batho le diruiwa moo. 22 Eupša tsebang gore ba bangwe ba tlo phologa gomme ba ntšhiwa motseng woo le barwa le barwedi ba lena. Ba tla tla go lena gomme ge le bona mekgwa ya bona le dilo tšeo ba di dirago, le tla kwešiša gore ke ka baka la eng ke ile ka tliša masetlapelo Jerusalema, le gore ke ka baka la eng ke dirile dilo ka moka tšeo ke di dirilego moo.’”

23 “Mmuši Morena Jehofa o re: ‘Ge le bona mekgwa ya bona le dilo tšeo ba di dirago, le tlo kwešiša gore dilo tšeo ke di dirilego nageng ya bona, ke be ke swanetše go no di dira.’”