Jeremia
6 Nyakang mo le ka tšhabelago gona lena barwa ba Benjamini, tšhabang Jerusalema,
Letšang naka Thekoa.
Tšhumang leswao la mollo Bethe-hakerema.
Ka gobane masetlapelo a tla a etšwa ka leboa, yona phedišo e kgolo.
2 Morwedi wa Tsione o swana le mosadi yo mobotse le yo a neneketšwago.
3 Badiši ba tla tla le mehlape ya bona.
Ba tla hloma ditente go mo dikologa,
Yo mongwe le yo mongwe a fudiša mehlape yeo a e hlokometšego.
4 Itokišeletšeng go yo lwa le yena,
Ba re: “Emang, re yo mo hlasela e le mosegare wa sekgalela!”
“Re ba madimabe gobane letšatši le a sobela,
E bile go thoma go swifala!”
5 “Emang, re mo hlaseleng e le bošego,
Gomme re yo senya mafelo a gagwe ao a šireleditšwego.”
6 Jehofa wa madira o re:
“Remang dikota gomme le di hlome go dikologa Jerusalema.
Ke motse wo o swanetšego go otlwa.
Ka gare ga wona go tletše kgatelelo feela.
7 Go no swana le ge meetse a etšwa sedibeng,
Le dilo tše mpe di tšwa motseng woo.
Le gona motseng woo go tletše bošoro le tshenyego,
Ke no bona bolwetši le kotlo.
8 Theeletša temošo ya ka wena Jerusalema, gore ke se ke ka go furalela ke šišimišegile.
Ke tla go dira gore o be marope, e lego naga yeo go se nago motho yo a dulago go yona.”
9 Jehofa wa madira o re:
“Ba tlo topelela mašaledi a Baisiraele bjalo ka ge eka ba kga diterebe tša mafelelo mohlareng.
Lenaba le tla ba tšea ka moka go swana le motho yo a topelelago diterebe.”
10 “Ke tla bolela le bomang, le gona ke tla lemoša bomang?
Ke bomang bao ba tlago go nkwa?
Bonang! Ditsebe tša bona di thibane,
E bile ga ba kgone le go nkwa.
Ba nyatša lentšu la Jehofa e bile ga ba le rate.
11 Ke ba galefetše go swana le ka mokgwa wo Jehofa a ba galefetšego ka gona.
Ke lapišitšwe ke go homola.”
“Ntšhetša bogale bja ka go ngwana yo a lego seterateng,
Le go masogana ao a kgobokanego gotee,
Ka moka ga bona ba tla thopša, monna a thopša le mosadi wa gagwe,
Mokgalabje a thopša le motho yo a tšofetšego kudu.
12 Dintlo tša bona di tla newa batho ba bangwe,
Gotee le mašemo a bona le basadi ba bona.
Ka gobane ke tla otlolla seatla sa ka gore ke lwe le badudi ba naga,” o realo Jehofa.
13 “Batho ka moka go tloga ka ba maemo a fase go fihla ka ba maemo a godimo ba hwetša dilo ka go se tshepege.
Go tloga ka moporofeta go fihla ka moperisita, yo mongwe le yo mongwe o dira dilo ka botsotsi.
14 Ge batho ba ka ba gobetše ba leka go ba fodiša ka go no re:
‘Go na le khutšo! Go na le khutšo!’
Mola go se na khutšo.
15 Na dilo tše di šišimišago tšeo ba di dirilego ga di ba hlabiše dihlong?
Ga ba swabe le ganyenyane,
E bile ga ba tsebe gore go hlabja ke dihlong ke eng.
Ka gona ba tla hwela gare ga bao ba šetšego ba hwile,
Ge ke ba otla ba tla kgopša,” o realo Jehofa.
16 Jehofa o re:
“Emang moo ditsela di kopanago gona gomme le bone,
Botšišang ka ditsela tša kgale,
Botšišang gore tsela e botse e kae gomme le sepele ka yona,
Ke moka le khutšeng.”
Eupša bona ba re: “Re ka se sepele go yona.”
17 “Ke ile ka kgetha batho bao ba letago motse, gomme bona ba re:
‘Theetšang modumo wa lenaka!’”
Eupša batho ba re: “Re ka se theetše.”
18 “Theetšang lena ditšhaba!
Gomme lena batho bao ba bokanego,
Tsebang seo se tlago go diragalela batho ba Jerusalema.
19 Theetšang lena batho ka moka lefaseng!
Ke tlišetša batho ba masetlapelo,
Ka baka la dilo tšeo ba di naganago,
Ka gobane ga se ba theetša mantšu a ka,
E bile ba ganne molao wa ka.”
20 “Na ke na le taba le gore le ntlišetša diorelo tšeo di tšwago Sheba,
Le lehlaka la go nkga bose leo le tšwago nageng ya kgole?
Dibego tša lena tše di feletšego tša go fišwa ga ke di amogele,
E bile dihlabelo tša lena ga di nkgahle.”
21 Ka gona Jehofa o re:
“Šefa ke beela batho ba setšhaba se mapheko,
Gomme a tla dira gore ba kgopše.
A tla wiša botate gotee le barwa ba bona,
Moagišane le mogagabo,
Gomme ka moka ga bona ba tla fedišwa.”
22 Jehofa o re:
“Tsebang gore go tla batho bao ba tšwago nageng ya ka leboa,
Gomme setšhaba se segolo se tla tsošwa go tšwa dikarolong tša kgole kudu tša lefase.
23 Ba tla swara bora le lerumo.
Ba sehlogo e bile ga ba na kwelobohloko.
Mantšu a bona a tla duma go swana le lewatle,
Gomme ba namela dipere.
Ba itokišeletša ntwa go swana le lešole leo le lwago le wena, wena morwedi wa Tsione.”
24 Rena re kwele ka bona.
Re fedile matla.
Re tlalelong,
Re kwa bohloko go swana le mosadi yo a belegago.
25 O se ke wa ya mašemong,
E bile o se ke wa sepela tseleng,
Ka gobane lenaba le swere sabola,
E bile batho ba tšhogile gohle.
26 Wena morwedi wa batho ba ka,
Apara diaparo tša masaka gomme o pshikologe meloreng.
Lla bjalo ka ge eka o llela morwa wa gago yo e lego yena a nnoši, o lle gabohloko,
Ka gobane motho yo a senyago o tla re wela ka ponyo ya leihlo.
27 “Ke go dirile gore o swane le motho yo a hlwekišago tšhipi,
Ka gobane o swanetše go hlwekiša batho ba ka,
O swanetše go ba lebeledišiša gomme o bone dilo tšeo ba di dirago.
28 Ka moka ga bona ke dinganga tša mafelelo,
Ba tšama ba thomeletša batho,
Ba swana le koporo le tšhipi.
Ka moka ga bona ke ba babe.
29 Motho o šomile ka thata gore a hlwekiše tšhipi,
Go fihlela dilo tšeo a di šomišago di e swa.
Eupša go no swana ka gobane go tšwa morodi feela,
Batho ba babe ga se ba tlošwa setšhabeng.
30 Batho ba tla ba bitša silifera e lahlilwego,
Ka gobane Jehofa o ba lahlile.”