Jeremia

32 Jehofa o ile a bolela le Jeremia ngwageng wa lesome wa ge go be go buša Kgoši Tsedekia wa Juda, e lego ka ngwaga wa bo-18 wa ge go buša Nebukadinetsara. 2 Ka nako yeo, mašole a kgoši ya Babilona a be a dikaneditše motse wa Jerusalema, gomme moporofeta Jeremia yena o be a tswaleletšwe ka Lapeng la Motho yo a Letago leo le lego ka mošate wa kgoši ya Juda. 3 Ka gobane Kgoši Tsedekia wa Juda o ile a tswalelela Jeremia gomme a mmotša a re: “Goreng o porofeta ka mokgwa wo? O re: ‘Jehofa o re: “Ke tla neela motse wo go kgoši ya Babilona gomme yona e tla o thopa, 4 gomme Kgoši Tsedekia wa Juda, a ka se phonyokge go Bakaladea, ka gobane o tla neelwa go kgoši ya Babilona, ke moka o tla bolela le yona ba lebantše difahlego.” 5 Jehofa o re: ‘Kgoši yeo e tla tšea Tsedekia ya mo iša Babilona, gomme a dula moo go fihlela ke phethile gore ke tla dira eng ka yena. Le ge le ka dulela go lwa le Bakaladea, le ka se fenye.’”

6 Jeremia o itše: “Jehofa o boletše le nna a re: 7 ‘Ramogoloago* e lego Hanamele morwa wa Shalume, o tla tla go wena a re: “Ithekele tšhemo ya ka yeo e lego Anathothe, ka gobane ke wena o nago le tshwanelo ya go e rekolla.”’”

8 Hanamele morwa wa ramogolo o ile a tla go nna ke le Lapeng la Motho yo a Letago, feela bjalo ka ge Jehofa a boletše. A re go nna: “Hle, reka tšhemo ya ka yeo e lego Anathothe, nageng ya Benjamini, ka gobane o na le tshwanelo ya go e rekolla le ya go e tšea gore e be ya gago. Ithekele yona.” Nakong yeo ke ile ka tseba gore ke Jehofa yo a bego a nyaka gore seo se direge.

9 Ka gona, ke ile ka reka tšhemo yeo e bego e le Anathothe go Hanamele morwa wa ramogolo. Ke ile ka mo kalela tšhelete, gomme ya dira ditšhelete tše 17 tša silifera.* 10 Ke moka ka ngwala taba yeo ka lengwalong, ka le kgatla ka setempe, ka bitša dihlatse ke moka ka kala tšhelete yeo. 11 Ka tšea mangwalo a mabedi, e lego leo le bego le tswaletšwe e bile le kgatlilwe ka setempe go ya ka molao, le leo le bego le se la tswalelwa, 12 ke moka ka a nea Baruke morwa wa Neriya, e lego morwa wa Mahaseya. Ge ke be ke mo nea mangwalo ao, Hanamele morwa wa ramogolo o be a le gona, yena gotee le dihlatse tšeo di ngwadilego mangwalo ao, le Bajuda ka moka bao ba bego ba dutše Lapeng la Motho yo a Letago.

13 Bjale ka laela Baruke batho bao ba le gona, ka re: 14 “Jehofa wa madira, yena Modimo wa Isiraele o re: ‘Tšea mangwalo a, e lego leo le bego le tswaletšwe e bile le kgatlilwe ka setempe go ya ka molao, le leo le bego le se la tswalelwa, gomme o a bee ka sebjaneng sa letsopa e le gore a swarelele nako e telele,’ 15 ka gobane Jehofa wa madira, yena Modimo wa Isiraele, o re: ‘Dintlo, mašemo le mašemo a diterebe di tla rekwa gape nageng ye.’”

16 Ka morago ga gore ke nee Baruke morwa wa Neriya mangwalo ao, ke ile ka rapela Jehofa ka re: 17 “Wena Mmuši Morena Jehofa, ke wena yo a dirilego magodimo le lefase ka matla a gago a magolo le ka seatla sa gago se matla. Ga go na selo le ge e le sefe seo se ka go palelago. 18 Wena yo a bontšhago batho ba dikete lerato la gago le legolo,* eupša a dira gore barwa ba welwe ke ditlamorago tša melato ya botatago bona, wena Modimo wa nnete, yo mogolo, le yo a nago le matla, yena yoo leina la gagwe e lego Jehofa wa madira. 19 O Modimo yo a neago keletšo e kgahlišago kudu, le yo a dirago dilo tše kgolo. Wena yo a bonago dilo ka moka tšeo batho ba di dirago, e le gore o putse motho yo mongwe le yo mongwe go ya ka tsela yeo a itshwarago ka yona le go ya le ka dilo tšeo a di dirago. 20 O ile wa dira dipontšho le mehlolo nageng ya Egepeta, e lego mehlolo yeo batho ba sa e tsebago go fihla le lehono le. Le gona, o ile wa itirela leina leo le lehono o sa tumilego ka lona Isiraeleng le bathong ka moka. 21 E bile o ntšhitše setšhaba sa gago sa Isiraele nageng ya Egepeta o diriša dipontšho, mehlolo, matla a gago a magolo, seatla sa gago se matla, le dilo tšeo di boifišago kudu.

22 “Ge nako e dutše e eya o ile wa ba nea naga ye, yeo o enetšego borakgolokhukhu ba bona gore o tla ba nea yona, e lego naga yeo e elago maswi le todi ya dinose. 23 Ba ile ba tla gomme ba dula nageng yeo, eupša ga se ba ka ba go kwa goba go phela ka melao ya gago. Ga se ba ka ba dira selo le ge e le sefe seo o ba laetšego gore ba se dire, ka gona o ile wa dira gore masetlapelo a ka moka a ba wele. 24 Bonang! Batho ba tlile motseng gomme ba o dikanetša ka go aga maboto gore ba tle ba o thope. Sabola, tlala, le bolwetši di tla dira gore motse wo o neelwe go Bakaladea bao ba lwago le wona. Dilo tšeo o di boletšego di diragetše ka moka, bjalo ka ge le wena o bona. 25 Eupša wena Mmuši Morena Jehofa, o ile wa re go nna: ‘Ithekele tšhemo ka tšhelete gomme o bitše dihlatse,’ gaešita le ge motse wo o be o tla neelwa go Bakaladea.”

26 Ke moka Jehofa a bolela le Jeremia a re: 27 “Ke nna Jehofa, Modimo wa batho ka moka. Na go na le selo le ge e le sefe seo se ka mpalelago? 28 Ka gona Jehofa o re: ‘Ke neela motse wo go Bakaladea le go Kgoši Nebukadinetsara wa Babilona, gomme yena o tla o thopa. 29 Ke moka Bakaladea bao ba lwago le motse wo ba tla tsena motseng gomme ba o tšhuma ka mollo, ba tšhuma le dintlo tšeo batho ba direlago Baali dihlabelo ditlhakeng tša tšona, le tšeo ba tšhelelago medimo e mengwe dibego tša dino e le gore ba nkgopiše.’

30 “‘Ka gobane batho ba Isiraele le batho ba Juda ba dirile feela dilo tše mpe pele ga mahlo a ka go tloga e sa le ba baswa. Batho ba Isiraele ba ile ba no tšwela pele ba nkgopiša ka dilo tšeo ba di dirago,’ o realo Jehofa. 31 ‘Ge e sa le motse wo o agiwa go fihla le lehono le, o be o sa ntlišetše selo ge e se feela go nkwatiša le go nkgalefiša, ke ka baka leo ke rego o swanetše go fedišwa gore ke se sa o bona, 32 ka baka la dilo ka moka tše mpe tšeo batho ba Isiraele le ba Juda ba di dirilego gore ba nkgopiše, bona, dikgoši tša bona, dikgošana tša bona, baperisita ba bona, baporofeta ba bona le batho ba Juda gotee le badudi ba Jerusalema. 33 Ba ile ba no dulela go mphuralela, le ge ke ile ka leka go ba ruta gantšhi le gantšhi. Ga go le o tee wa bona yo a ilego a kwa ge ke be ke ba laya. 34 Le gona ba ile ba bea medimo ya bona yeo e šišimišago ntlong yeo e bitšwago ka leina la ka, e le gore ba e šilafatše. 35 E bile ba agile mafelo a phagamego a go rapela Baali Moeding wa Morwa wa Hinomo, e le gore ba direle Mmoleke dihlabelo ka barwa le barwedi ba bona,* e lego selo seo se šišimišago seo ke sa kago ka ba laela gore ba se dire, e bile ke sa kago ka se nagana le go se nagana, sona selo seo se ilego sa dira gore batho ba Juda ba dire sebe.’

36 “Ka gona, Jehofa Modimo wa Isiraele o bolela mabapi le motse wo, woo le rego o tla neelwa go kgoši ya Babilona ka sabola, tlala le bolwetši, o re: 37 ‘Ke tla ba kgoboketša go tšwa dinageng ka moka tšeo ke tla bego ke ba phatlalaleditše go tšona ke kwatile, ke galefile, e bile ke tuka bogale, gomme ke tla ba buša lefelong le ka ba dira gore ba dule ba šireletšegile. 38 Bona e tla ba batho ba ka, gomme nna ke tla ba Modimo wa bona. 39 Ke tla fetoša dipelo tša bona le tsela yeo ba phelago ka yona e le gore ba dule ba mpoifa, gore go holege bona le bana ba bona. 40 Ke tla dira kgwerano ya go ya go ile le bona ya gore nka se tsoge ka tlogela go ba direla dilo tše dibotse, gomme ke tla dira gore ba mpoife ka dipelo tša bona ka moka e le gore ba se ke ba ntlhanogela. 41 Ke tla thabela go ba direla dilo tše dibotse, e bile ka dira gore ba dulele sa ruri nageng ye. Ke tla dira dilo tše ka pelo ya ka ka moka le ka moya wa ka ka moka.’”

42 “Jehofa o re: ‘Go no swana le ge ke tlišeditše batho ba masetlapelo a a magolo ka moka, ke tla ba tlišetša le dilo tše dibotse ka moka tšeo ke ba tshepišitšego tšona. 43 Le gona, mašemo a tla rekwa gape nageng ye le ge lena le re: “Ke mašope ao go ona go se nago le ka motho le phoofolo. E bile naga ye e neetšwe go Bakaladea.”’

44 “‘Batho ba tla ithekela mašemo ka tšhelete gomme ba ngwala mangwalo a bohlatse ba a kgatla ka setempe. E bile go tla bitšwa dihlatse nageng ya Benjamini, mafelong ao a lego kgauswi le Jerusalema, metseng ya Juda, metseng ya tikologong ya dithabeng, metseng ya mebotong, le metseng ya ka borwa, ka gobane ke tla buša batho ba bona bao ba thopilwego,’ o realo Jehofa.”