Puku ya Bobedi ya Dikgoši
16 Ahasi morwa wa Kgoši Jothama wa Juda e bile kgoši ka ngwaga wa bo-17 wa ge Peka morwa wa Remalia a buša. 2 Ahasi o be a na le mengwaga e 20 ge a e ba kgoši, gomme o bušitše Jerusalema ka mengwaga e 16. Ga se a dira dilo tša go loka pele ga Jehofa Modimo wa gagwe, go swana le ge rakgolokhukhu wa gagwe Dafida a ile a di dira. 3 Go e na le moo o ile a dira dilo tšeo dikgoši tša Isiraele di ilego tša di dira, a ba a dira sehlabelo ka morwa wa gagwe,* a dira bjalo a ekiša dilo tše di šišimišago tšeo di bego di dirwa ke ditšhaba tšeo Jehofa a ilego a di raka pele ga Baisiraele. 4 O ile a tšwela pele a dira dihlabelo le dihlabelo tšeo di thuntšhago muši mafelong a phagamego ao go rapelwago go ona, mebotong le ka fase ga mehlare ka moka e metala.
5 Mehleng yeo, Kgoši Retsini wa Siria le Peka morwa wa Remalia kgoši ya Isiraele ba ile ba tla go lwa le Ahasi. Ba dikanetša Jerusalema, eupša ga se ba ka ba kgona go thopa motse woo. 6 Ka nako yeo Kgoši Retsini wa Siria o ile a bušetša Elathe go Edomo, ka morago ga moo a raka Bajuda moo Elathe. Ke moka Baedomo ba ile ba tsena Elathe gomme ba dula moo go ba go fihla le lehono. 7 Ka gona Ahasi a romela molaetša go Kgoši Tigilathe-pilesere wa Asiria, a re: “Nna ke mohlanka wa gago e bile ke morwa wa gago. Etla o mphološe go kgoši ya Siria le kgoši ya Isiraele tšeo di ntlhaselago.” 8 Ke moka Ahasi a tšea silifera le gauta tšeo di bego di le ka ntlong ya Jehofa le ka matlotlong ao a lego ka mošate a di romela go kgoši ya Asiria e le gore a e reke. 9 Ka gona kgoši ya Asiria ya theetša kgopelo ya Ahasi ke moka ya ya Damaseko gomme ya e thopa ya iša batho ba yona bothopša kua Kiri, ke moka ya bolaya Retsini.
10 Ka gona Kgoši Ahasi a ya go gahlanetša Kgoši Tigilathe-pilesere wa Asiria kua Damaseko. Ge Ahasi a bona aletare yeo e lego Damaseko o ile a romela moperisita Urija polane ya yona yeo e bego e bontšha dilo ka moka tša aletare le ka mokgwa woo e bego e agilwe ka gona. 11 Moperisita Urija o ile a aga aletare yeo go ya le ka polane yeo Kgoši Ahasi a mo rometšego yona a le Damaseko. Moperisita Urija o ile a fetša go aga aletare yeo pele Kgoši Ahasi a boa Damaseko. 12 Ge kgoši Ahasi a boa Damaseko gomme a bona aletare yeo, o ile a ya go yona gomme a neela dibego go yona. 13 Ke moka a thoma go dira gore dibego tša gagwe tša go fišwa le dibego tša gagwe tša mabele di thuntšhe muši aletareng yeo, a tšhollela le dibego tša dino a ba a foketša le madi a dihlabelo tša go dira khutšo le Modimo aletareng yeo. 14 A tšea aletare ya koporo yeo e bego e le pele ga tempele ya Jehofa, a e tloša pele ga tempele moo e bego e dula gona, e lego magareng ga aletare ya gagwe le tempele ya Jehofa, gomme a e bea ka lehlakoreng la ka leboa la aletare ya gagwe. 15 Kgoši Ahasi a laela moperisita Urija a re: “Dira gore sebego sa go fišwa sa mesong le sebego sa mabele sa mantšiboa di thuntšhe muši aletareng e kgolo, o dire gore sebego sa go fišwa sa kgoši, sebego sa yona sa mabele, sebego sa go fišwa sa setšhaba ka moka sa nageng gotee le dibego tša sona tša dino, di thuntšhe muši aletareng, o foketše madi ka moka a dibego tša go fišwa le madi ka moka a dihlabelo tše dingwe aletareng yeo. Aletare ya koporo ke tla bona gore ke dira eng ka yona.” 16 Moperisita Urija o ile a dira dilo ka moka tšeo Kgoši Ahasi a mo laetšego tšona.
17 Godimo ga moo, Kgoši Ahasi a ripaganya diphaphathi tša ka mahlakoreng a dikoloyana a tloša dibjana tšeo di bego di le godimo ga tšona, a tloša sebjana se segolo seo se bego se thekgilwe ke dipoo tša koporo gomme a se bea godimo ga lebato leo le bego le dirilwe ka maswika. 18 O ile a šuthiša karolo yeo e khupeditšwego, yeo e bego e dirišwa ka sabatha, yeo ba bego ba e agile ka ntlong ya Modimo, a šuthiša le mojako wa ka ntle woo kgoši e bego e tsena ka wona ntlong ya Jehofa. O dirile bjalo ka ge a be a tšhaba kgoši ya Asiria.
19 Ditaba ka moka tša Ahasi le dilo ka moka tšeo a di dirilego di ngwadilwe ka pukung ya histori ya mehleng ya dikgoši tša Juda. 20 Mafelelong Ahasi o ile a hlokofala go no swana le borakgolokhukhu ba gagwe ke moka ba mmolokela Motseng wa Dafida. Ka morago ga moo morwa wa gagwe Hesekia a ba kgoši legatong la gagwe.