Jeremia
51 Jehofa o re:
“Ke tlišetša Babilona le
Badudi ba Lebe-kamai phefo e senyago.
2 Ke tla romela batho bao ba ološago mabele Babilona,
Gomme ba tla e ološa gwa šala go se na selo,
Ba tla e hlasela mathokong ohle letšatšing la masetlapelo.
3 Batho ba Babilona bao ba betšago mesebe, ba ka se sa koba bora bja bona.
Le gona mašole a moo a ka se sa apara diaparo tša ona tša ntwa.
“Le se ke la šokela masogana a yona.
Le bolayeng mašole ka moka a moo.
4 Masogana a yona a tla bolawa nageng ya Bakaladea,
A tla hlabiwa diterateng tša yona.
5 Jehofa wa madira ga se a lahla batho ba Isiraele le ba Juda ka ge e le Modimo wa bona.
Dinaga tša bona ga di bjalo ka bahlologadi, eupša naga ya Bakaladea e na le molato o mogolo go Modimo o Mokgethwa wa Isiraele.
6 Tšhabang le tšweng Babilona,
Le phološe maphelo a lena.
Le se ke la fedišwa ka baka la molato wa yona.
Ka gobane ke nako ya gore Jehofa a itefeletše.
O e lefeletša go ya ka dilo tšeo e di dirilego.
7 Babilona e bile komiki ya gauta ka seatleng sa Jehofa,
E dirile gore lefase ka moka le tagwe.
Ditšhaba di tagilwe ke beine ya yona,
Ka baka leo di a gafa.
8 Babilona e wele ka tšhoganetšo gomme e pšhatlagane.
E lleleng.
E nyakeleng setlolo seo se bitšwago balesamo gore se fodiše bohloko bja yona. Mohlomongwe e ka fola.”
9 “Re lekile go alafa Babilona, eupša ga se ya fola.
A re tlogeng go yona re sepele, gomme yo mongwe le yo mongwe wa rena a ye nageng ya gabo.
Ka gobane molato wa yona o fihlile magodimong,
O godimodimo bjalo ka maru.
10 Jehofa o re tlišeditše toka.
Etlang re anegeng dilo tšeo Jehofa Modimo wa rena a di dirilego, re le Tsione.”
11 “Loutšang mesebe. Tšeang dikotse.
Jehofa o dirile gore dikgoši tša Bamede di ye ntweng,
Ka gobane o nyaka go fediša Babilona,
Ka gobane Jehofa o a itefeletša, o lefeletša tempele ya gagwe.
12 Emišang leswao la go bontšha gore ke nako ya go hlasela maboto a Babilona.
Oketšang batho ba go hlokomela motse, le beeng le batho ba go leta.
Beakanyang le batho bao ba tlago go lalela Babilona.
Ka gobane Jehofa o logile leano,
Gomme o tla phetha seo a se tshepišitšego mabapi le badudi ba Babilona.”
13 Wena mosadi yo a dulago meetseng a mantšhi,
Wena yo a nago le matlotlo a mantšhi kudu,
Nako ya gago e fedile e bile o ka se sa hwetša dilo tšeo o bego o di hwetša.
14 Jehofa wa madira o ikanne ka leina la gagwe, a re:
‘Ke tla go tlatša ka batho bao e lego ba bantšhi bjalo ka ditšie,
Gomme ba tla go hlabela mokgoši wa go bontšha gore o fentše.’
15 Ke yena a dirilego lefase ka matla a gagwe,
Yena yo a šomišitšego bohlale bja gagwe gore go be le naga yeo e enywago,
Le yo a šomišago kwešišo ya gagwe gore a phurolle magodimo.
16 Ge a bolela meetse ao a lego magodimong a a huduega,
Gomme o dira gore maru a rotoge a etšwa moo lefase le felelago gona.
O direla pula legadima,
Gomme a bulela phefo
Mo a e bolokago gona.
17 Motho yo mongwe le yo mongwe o dira tša botlaela,
E bile dilo tšeo a di dirago di bontšha gore ga a tsebe selo.
Motho yo mongwe le yo mongwe yo a šomago ka tšhipi o tla hlabišwa dihlong ka baka la seswantšho seo a se betlilego,
Ka gobane modimo wa gagwe wa seswantšho ke wa maaka, le gona ga o kgone go hema.
18 Ga e na mohola, e swanetše go no kwerwa.
Ge letšatši la gore Modimo a e ahlole le fihla, e tla fedišwa.
19 Yo e lego Bohwa bja Jakobo ga a swane le dilo tše,
Ka gobane ke yena a dirilego dilo ka moka,
Wona molamo wa bohwa bja gagwe.
Leina la gagwe ke Jehofa wa madira.
20 “O molamo wa ka wa ntwa, o swana le dibetša tša ntwa,
Ke tla pšhatlaganya ditšhaba
Le go senya mebušo ke diriša wena.
21 Ke tla pšhatlaganya pere le monamedi wa yona ke diriša wena,
E bile ke tla pšhatlaganya kariki ya ntwa le monamedi wa yona ke diriša wena.
22 Ke tla pšhatlaganya monna le mosadi,
Ka pšhatlaganya mokgalabje le mošemane,
Ka ba ka pšhatlaganya lesogana le kgarebe ke diriša wena.
23 Ke tla pšhatlaganya modiši le mohlape wa gagwe,
Ka pšhatlaganya molemi le di diphoofolo tšeo a lemago ka tšona,
Ka ba ka pšhatlaganya babuši le dintona ke diriša wena.
24 Ke tla lefetša Babilona le badudi ka moka ba Kaladea
Ka baka la dilo tše mpe tšeo ba di dirilego kua Tsione pele ga mahlo a lena,” o realo Jehofa.
25 “Wena thaba e senyago, šefa ke lwa le wena,
Wena yo a senyago lefase ka moka,
Ke tla go otlollela seatla sa ka ka go pshikološetša maswikeng,
Ka ba ka go dira thaba yeo e swelego,” o realo Jehofa.
26 “Batho ba ka se tšee leswika la khoneng goba leswika la fantešeni go wena,
Ka gobane o tla ba lešope go ya go ile,” o realo Jehofa.
27 “Emišang leswao mo nageng.
Letšang naka ditšhabeng.
Kgethang ditšhaba tšeo di tlago go lwa le yona.
Bitšang mebušo ya Ararate, Mini le Ashekenase gore e tle e lwe le yona.
Laelang molaodi wa mašole gore a lwe le yona.
Dirang gore dipere di tle go yona ka bontšhi go swana le ditšie tše dinyenyane.
28 Botšang ditšhaba gore di itokišeletše go lwa le yona,
E lego dikgoši tša Media, dintona tša yona, babuši ba yona
Le dinaga ka moka tšeo ba di bušago.
29 Le gona lefase le tlo šišinyega la ba la thothomela,
Ka gobane Jehofa o tlo dira dilo tšeo a di nagannego ka Babilona,
A dira gore Babilona e fetoge lefelo leo le tšhošago gomme gwa se sa ba le motho yo a dulago moo.
30 “Mašole a Babilona a tlogetše go lwa,
A ituletše mafelong a ona ao a šireleditšwego,
A feletšwe ke matla.
A swana le basadi.
Dintlo tša Babilona di tšhumilwe ka mollo.
Dikota tša yona tša go tswalela mejako di robilwe.
31 “Motho yo a romilwego o kitimela go yo gahlanetša motho yo mongwe yo a romilwego,
Gomme motseta o kitimela go gahlanetša motseta yo mongwe
Go yo begela kgoši ya Babilona gore motse wa yona o thopilwe ka mahlakoreng ka moka,
32 Le go e begela gore mafelo ao batho ba tshelago noka go ona a thopilwe,
Le gore dikepe tšeo di dirilwego ka mahlaka a papirase di fišitšwe ka mollo,
Gomme mašole a tšhogile.”
33 Jehofa wa madira, yena Modimo wa Isiraele o re:
“Morwedi wa Babilona o bjalo ka seboa.*
Ye ke nako ya gore a gatakelwe.
Kgauswinyane go tla fihla nako ya gore a bunwe.”
34 “Kgoši Nebukadinetsara wa Babilona o mmeditše,
O dirile gore ke gakanege.
O mpeile fase go swana le sebjana seo se se nago selo.
O mmeditše go swana le noga e kgolo,
O tladitše mpa ya gagwe ka dilo tša ka tše di kgahlišago.
O nkgogotše ka meetse.
35 Motho yo a dulago Tsione o re: ‘Anke dilo tše šoro tšeo ke di dirilwego, di diragalele Babilona.
Jerusalema yona e re: ‘Anke badudi ba Kaladea ba rwale molato wa madi a ka.’”
36 Ka gona Jehofa o re:
“Bjale ke a go emelela molatong wa gago,
E bile ke tla go lefeletša.
Ke tla dira gore lewatle la gagwe le didiba tša gagwe di ome.
37 Babilona e tla ba mokgobo wa maswika,
Le lefelo leo diphukubje di dulago go lona.
E tla tšhoša batho e bile ba tla letša molodi ba kgotsa ge ba e bona,
Go ka se sa ba le motho yo a dulago moo.
38 Badudi ba Babilona ka moka ba tla rora bjalo ka ditawana,
Ba tla bopa bjalo ka ditawana.”
39 “Ge dikganyogo tša bona di sa le matla, ke tla ba direla monyanya gomme ka ba nweša gore ba tagwe,
E le gore ba thabe.
Ba tla robala boroko bja go ya go ile,
Bjoo ba ka se kego ba tsoga go bjona,” o realo Jehofa.
40 “Ke tla ba iša gore ba yo hlabiwa bjalo ka dikwana,
Le bjalo ka dinku tše tona le dipudi.”
41 “Bonang kamoo Sheshake e thopilwego ka gona,
Le kamoo naga yeo e bego e retwa ke batho ka moka e ilego ya thopša ka gona.
Ruri Babilona e fetogile selo seo se tšhošago gare ga ditšhaba!
42 Lewatle le khupeditše Babilona.
E khurumeditšwe ke maphoto a lona a mantšhi.
43 Metse ya yona e fetogile selo seo se tšhošago batho, naga yeo e se nago meetse le ya leganata,
Naga yeo go se nago motho yo a tlago go dula go yona e bile go se nago motho yo a tlago go feta go yona.
44 Ke tla otla modingwana yo a bitšwago Bele kua Babilona,
Ke tla ntšha seo a se meditšego molomong wa gagwe.
Ditšhaba di ka se sa ya go yena.
Le gona, leboto la Babilona le tla wa.
45 “Etšwang go yona, lena batho ba ka,
Phološang maphelo a lena, ka gobane nna Jehofa ke galefile kudu.
46 Le se ke la tšhoga goba la boifa ge le ekwa dilo tšeo di tlago go bolelwa nageng.
Ngwageng wo go tla bolelwa taba e itšego,
Gomme ngwageng o latelago gwa bolelwa taba e nngwe
Ya mabapi le bošoro bjo bo diregago nageng le mabapi le mmuši yo a lwago le mmuši yo mongwe.
47 Tsebang gore go tla matšatši ao ka ona
Ke tlago go senya diswantšho tše di betlilwego tša Babilona.
Naga ya yona ka moka e tla hlabja ke dihlong,
Le bohle bao ba bolailwego ka sehlogo ba yona ba tla rapalala go yona.
48 “Magodimo le lefase le dilo ka moka tšeo di lego go tšona,
Di tla goeletša ka lethabo ge Babilona e ewa,
Ka gobane bao ba tlago go e fediša ba tla tla ba etšwa ka leboa,” o realo Jehofa.
49 “Bababilona ga se ba bolaya Baisiraele feela,
Eupša ba bolaile le batho ba lefaseng ka moka moo Babilona.
50 “Lena bao ba le phonyokgilego sabola, tšwelang pele le sepela, le se ke la ema.
Gopolang Jehofa le le kgole,
Le duleng le nagana ka Jerusalema.”
51 “Re hlabilwe ke dihlong, ka gobane re kwele batho ba bolela mantšu a go re nyatša.
Difahlego tša rena di aparetšwe ke dihlong,
Ka gobane batho bao e sego Baisiraele ba hlasetše mafelo a makgethwa a ntlo ya Jehofa.”
52 Jehofa o re: “Tsebang gore go tla matšatši
Ao ka ona ke tla senyago diswantšho tšeo di betlilwego tša Babilona,
Gomme nageng ya yona ka moka bao ba gobetšego ba tla lla gabohloko.”
53 “Le ge Babilona e ka rotogela magodimong,
Le ge e ka tiiša mafelo a yona ao a šireleditšwego,
Ke tla no e romela batho bao ba tlago go e fediša,” o realo Jehofa.
54 “Theetšang! Go kwagala mokgoši wo o tšwago Babilona,
E lego mokgoši wa ge naga ya Bakaladea e welwa ke masetlapelo a magolo.
55 Ka gobane Jehofa o fediša Babilona,
Gomme o tla dira gore go se sa kwagala lešata la yona le legolo,
Le gona lešata la manaba a bona le tla swana le lešata la maphoto,
Go tla kwagala modumo wa lentšu la ona.
56 Babilona e tla hlaselwa ke manaba a yona,
Gomme mašole a yona a tla thopša,
Bora bja yona bo tla pšhatlaganywa,
Ka gobane Jehofa ke Modimo wa go lefeletša.
Ruri o tla lefeletša!
57 Ke tla dira gore dikgošana tša yona, batho ba bohlale ba yona,
Babuši ba yona, dintona tša yona gotee le mašole a yona ba tagwe,
Gomme ba tla robala boroko bja go ya go ile,
Bjoo ba ka se kego ba tsoga go bjona,” e realo Kgoši, yeo leina la yona e lego Jehofa wa madira.
58 Jehofa wa madira o re:
“Le ge leboto la Babilona e le le lekoto, le tlo phušolwa ka mo go feletšego,
Le ge dikeiti tša yona e le tše ditelele di tlo tšhungwa ka mollo.
Batho ba tla berekela mahala,
Ditšhaba di tla itapišetša lefeela e le gore di bešetše mollo.”
59 Wo ke molaetša woo moporofeta Jeremia a o filego Seraya morwa wa Neriya yo e lego morwa wa Mahaseya ge a be a eya le Kgoši Tsedekia wa Juda Babilona. E be e le ka ngwaga wa bone wa ge Kgoši Tsedekia a buša. Seraya yena e be e le mohlokomedi wa dilo tša kgoši. 60 Jeremia o ile a ngwala ka pukung masetlapelo ka moka ao a bego a tla wela Babilona. Dilo tše ka moka go be go boletšwe gore di tla diragalela Babilona. 61 Le gona Jeremia a re go Seraya: “Ge o se na go fihla Babilona gomme o e bona, o balele godimo mantšu a ka moka. 62 Ke moka o re: ‘Jehofa o boletše gore lefelo le le tlo fedišwa gomme gwa šala go se na motho yo a dulago go lona, gwa šala go se na motho goba phoofolo e bile e tla ba mašope go ya go ile.’ 63 Ge o feditše go bala puku ye, o tla e tlemelela ka leswika gomme o e lahlele ka Nokeng ya Eforate. 64 Ke moka o re: ‘Babilona e tla nwelela ka wona mokgwa wo gomme e ka se tsoge e bile gona gape ka baka la masetlapelo ao ke e tlišetšago ona, gomme badudi ba yona ba tla felelwa ke matla.’”
Mantšu a Jeremia a felela mo.