Lengwalo la Pele le le Yago go Bathesalonika
3 Ka gona, ge re be re se sa kgona go kgotlelela, re ile ra bona go le kaone gore re šale re nnoši Athene. 2 Re ile ra roma Timotheo, yo e lego ngwanabo rena le mohlanka wa Modimo yoo a bolelago ditaba tše dibotse mabapi le Kriste, gore a tle a le matlafatše le go le homotša ka baka la tumelo yeo le nago le yona, 3 e le gore go se be le o tee wa lena yo a ka fokodišwago ke mathata a. Ka gobane lena le a tseba gore dilo tše di swanetše go re diragalela. 4 Le gona, ge re be re na le lena re be re fela re le botša gore re tlo tlaišega gomme bjalo ka ge le tseba, re ile ra tlaišega e le ka nnete. 5 Ke ka baka leo ge ke be ke se sa kgona go kgotlelela, ke ilego ka roma Timotheo go lena gore ke tsebe ge e ba le sa botegela Modimo, ka gobane ke be ke tšhoga gore mohlomongwe Diabolo a ka ba a ile a le leka gore le dire sebe. Ge nkabe le ile la dira sebe, gona maiteko a rena e be e tla ba a lefeela.
6 Eupša Timotheo o sa tšwa go tla go rena a etšwa go lena gomme o re boditše ditaba tše dibotse tša gore le botegela Modimo ebile le rata batho ba bangwe. Le gona o re boditše gore le re gopola kudu ebile le fela pelo ya go re bona go no swana le ge le rena re fela pelo ya go le bona. 7 Banabešo, ke ka baka leo ge re be re welwa ke mathata ebile re tlaišega, re ilego ra homotšega ge re be re ekwa gore le botegela Modimo. 8 Ka gobane ge re ekwa gore le tšwela pele le le balatedi ba Morena, re ba le matla gape. 9 Ruri re leboga Modimo ka baka la lena, ka gobane le dirile gore re thabe kudu! 10 Re rapela bošego le mosegare go tšwa pelong gore re tle re le bone le gore re tle re le thuše ka dilo tšeo le di hlokago gore le tiiše tumelo ya lena.
11 Bjale eka Modimo Tatago rena le Morena wa rena Jesu, ba ka dira gore re kgone go tla go lena. 12 Le gona, eka Morena a ka dira gore le ratane kudu, le be le rate le batho ba bangwe go no swana le ge le rena re le rata. 13 Ka go dira bjalo, o tla dira gore dipelo tša lena di tie, le se ke la solega le gore le be ba bakgethwa pele ga Modimo Tatago rena, nakong ya ge Morena wa rena Jesu a tla be a le gona le bakgethwa ba gagwe ka moka.