Jeremia

43 Ge Jeremia a feditše go botša batho ka moka dilo ka moka tšeo Jehofa Modimo wa bona a di boletšego, e lego selo se sengwe le se sengwe seo Jehofa Modimo wa bona a bego a mo romile gore a ba botše sona, 2 Asaria morwa wa Hoshaya, Johanana morwa wa Karea le banna ka moka bao ba ikgogomošago ba re go Jeremia: “O bolela maaka. Jehofa Modimo wa rena ga se a go roma gore o tle o re botše gore re se ke ra ya Egepeta gore re dule moo. 3 Eupša Baruke morwa wa Neriya ke yena a go hlohleletšago gore o lwe le rena gore o re neele go Bakaladea gore ba re bolaye goba ba re iše bothopša Babilona.”

4 Ka gona Johanana morwa wa Karea, balaodi ka moka ba mašole le batho ka moka ba ile ba se kwe seo Jehofa a se boletšego ge a be a re ba dule nageng ya Juda. 5 Go e na le moo, Johanana morwa wa Karea le balaodi ka moka ba mašole, ba ile ba tšea batho ka moka bao ba šetšego ba Juda bao ba boilego gore ba tle ba dule nageng ya Juda ba etšwa ditšhabeng ka moka tšeo ba bego ba phatlalaleditšwe go tšona. 6 Ba ile ba tšea banna, basadi, bana, barwedi ba kgoši le batho ka moka bao Nebusaradani yo e lego molaodi wa batho ba go leta a bego a ba tlogetše le Gedalia morwa wa Ahikama, yo e lego morwa wa Shafane. Ba tšea le moporofeta Jeremia le Baruke morwa wa Neriya. 7 Ba sepela ba ba ba fihla nageng ya Egepeta, ka gobane ba be ba se ba kwa seo Jehofa a se boletšego, e bile ba ba ba fihla Thahapanese.

8 Ke moka Jehofa a bolela le Jeremia kua Thahapanese a re: 9 “Tšea matlapa a magolo gomme o a ute lerageng leo le lego mmotwaneng wa ditena wo o lego mojakong wa ntlo ya Farao kua Thahapanese, gomme o dire seo banna ba Bajuda ba lebeletše. 10 Ke moka o re go bona: ‘Jehofa wa madira, yena Modimo wa Isiraele, o re: “Bjale ke bitša Nebukadinetsara kgoši ya Babilona, yena mohlanka wa ka, gomme ke tla bea setulo sa gagwe sa bogoši ka godimo ga matlapa a ao ke a utilego, e bile o tla hloma tente ya gagwe ya bogoši godimo ga ona. 11 O tla tla gomme a otla naga ya Egepeta. Ba bangwe ba tla bolawa ke bolwetši bjo šoro, ba bangwe ba išwa bothopša, gomme ba bangwe ba bolawa ka sabola. 12 Ke tla tšhuma dintlo tša medimo ya Egepeta ka mollo. Kgoši ya Babilona e tla fiša medimo yeo gomme ya e iša bothopša. E tla ikapeša naga ya Egepeta go no swana le ge modiši a ikapeša seaparo sa gagwe, gomme ya tšwa moo e se ya gobatšwa.* 13 E tla pšhatlaganya diphilara tša Bethe-shemeshe yeo e lego nageng ya Egepeta, e bile ya fiša dintlo tša medimo ya Egepeta.”’”