Baahlodi

20 Mafelelong, banna ka moka ba Baisiraele bao ba tšwago Dani go fihla Beresheba le nageng ya Gileada, ba kgobokana gotee pele ga Jehofa motseng wa Mitsipa. 2 Baetapele ba batho le meloko ka moka ya Isiraele ba ema pele ga phuthego ya batho ba Modimo. Mašole ao a bego a swere disabola e be e le a 400 000 (dikete tše makgolo a mane).

3 Babenjamini ba kwa gore banna ba Isiraele ba ile Mitsipa.

Ke moka banna ba Isiraele ba re: “Re botšeng gore go tlile bjang gore mosadi yo a hlokofale?” 4 Ge ba re’alo, monna wa Molefi, yoo mosadi wa gagwe a bolailwego, a araba a re: “Nna le mosadi wa ka wa serethe re be re ile Gibea ya Benjamini gore re robale moo. 5 Badudi ba Gibea ba ile ba dikanetša ntlo yeo ke bego ke le ka go yona bošego ba nyaka go ntlhasela. Ba be ba nyaka go mpolaya, eupša ba kata mosadi wa ka wa serethe gomme a hwa. 6 Ka gona, ka tšea setopo sa mosadi wa ka wa serethe ka se ripaganya gomme ka romela ditho tša sona nageng ka moka ya Isiraele, ka gobane banna bao ba be ba dirile selo seo se lešago dihlong Isiraele. 7 Bjale, lena batho ka moka ba Isiraele, le re’ng ka taba ye?”

8 Ka gona, batho ka moka ba dumelelana ka gore: “Ga go na yo a tlago go ya tenteng ya gagwe, goba a boela ntlong ya gagwe. 9 Bjale, seo re tlago go se dira Bagibea ke se: Re tla dira matengwa* ke moka ra ya ra ba hlasela. 10 Go banna ba 100 ba meloko ka moka ya Isiraele, re tlo tšea ba 10, go ba 1 000 (sekete) ra tšea ba 100 gomme go ba 10 000 (dikete tše lesome) ra tšea ba 1 000 (sekete) gore ba swarele mašole dijo, e le gore mašole ao a kgone go lwa le Gibea ya Benjamini ka baka la selo sa go hlabiša dihlong seo ba se dirilego Isiraele.” 11 Ka gona, banna ka moka ba Isiraele ba kgobokana gomme ba kwana gore ba yo lwa le motse woo.

12 Ke moka meloko ya Isiraele ya romela banna go meloko ka moka ya Benjamini, ya re: “Ke ka baka la’ng batho ba gabo lena ba dirile selo se sebe ka mokgwa wo? 13 Bjale tlišang banna bao ba babe ba Bagibea, re tle re ba bolaye e le gore re tloše bobe Isiraele.” Eupša Babenjamini ba se theetše bana babo bona ba Baisiraele.

14 Ke moka Babenjamini ba kgobokana ka ntle ga metse ba ya Gibea gore ba yo lwa le banna ba Baisiraele. 15 Letšatšing leo, Babenjamini ba kgoboketša banna ba 26 000 (dikete tše masomepedi-tshela) go tšwa metseng ya bona, bao ba bego ba itlhamile ka disabola go sa balwe banna ba 700 (makgolo a šupago) bao ba kgethilwego ba Bagibea. 16 Ntweng yeo, go be go na le banna ba 700 (makgolo a šupago) bao ba kgethilwego bao ba bego ba diriša letsogo la nngele. Yo mongwe le yo mongwe wa banna bao o be a kgona go betša leswika ka seragamabje gomme la betha moo a lebantšego gona.

17 Banna ba Isiraele, ntle le ba moloko wa Benjamini, ba ile ba kgoboketša banna ba 400 000 (dikete tše makgolo a mane) bao ba swerego disabola gomme yo mongwe le yo mongwe wa bona o be a na le bokgoni bja go lwa. 18 Ba tloga ba ya Bethele gore ba yo kgopela Modimo gore a ba hlahle. Ke moka batho ba Isiraele ba re: “Mo gare ga rena, ke mang yo a tlago go re eta pele ge re yo lwa le Babenjamini?” Jehofa a re: “Juda o tla le eta pele.”

19 Ka morago, Baisiraele ba tloga e sa le mesong, ba ya ba hloma ditente gore ba lwe le Gibea.

20 Bjale, banna ba Isiraele ba itokišetša ntwa kua Gibea gore ba ye ba lwe le Babenjamini. 21 Ka gona, letšatšing leo, Babenjamini ba tšwa Gibea gomme ba bolaya banna ba 22 000 (dikete tše masomepedi-pedi) ba Baisiraele. 22 Eupša, mašole a Baisiraele a bontšha sebete gomme a itokišeletša ntwa gape lefelong leo a lwelego go lona letšatšing la mathomo. 23 Ke moka Baisiraele ba ya Bethele gomme ba lla pele ga Jehofa go fihla mantšiboa. Ke moka ba botšiša Jehofa ba re: “Na re swanetše go boela re yo lwa le bana babo rena ba moloko wa Benjamini?” Ge ba re’alo, Jehofa a re: “Sepelang le yo lwa le bona.”

24 Ka letšatši la bobedi Baisiraele ba batamela Babenjamini. 25 Ka morago, Babenjamini ba tla ba etšwa Gibea gore ba tlo kopana le bona ka letšatši la bobedi gomme ba bolaya Baisiraele ba bangwe ba 18 000 (dikete tše lesomeseswai) bao ba bego ba swere disabola. 26 Banna ka moka ba Isiraele ba ya Bethele, ba dula moo pele ga Jehofa ba lla, ba ikona dijo letšatšing leo go fihla mantšiboa. Ke moka ba direla Jehofa dihlabelo tša go fišwa le tša go dira khutšo.* 27 Ka morago ga moo, banna ba Isiraele ba kgopela Jehofa gore a ba hlahle, ka gobane ka nako yeo areka ya kgwerano ya Modimo wa nnete e be e le Bethele. 28 Bjale Finease morwa wa Eleasara morwa wa Arone o be a hlankela e le moperisita pele ga yona mehleng yeo. Ke moka a ba botšišetša Modimo a re: “Na banna ba Isiraele ba swanetše go yo lwa le bana babo bona ba moloko wa Benjamini goba ba se ye?” Jehofa a re: “A ba ye, gobane gosasa ke tlo ba thuša gore ba ba fenye.” 29 Ke moka Baisiraele ba bea banna gore ba lalele Gibea ka mahlakoreng ka moka a yona.

30 Ka letšatši la boraro, Baisiraele ba ya go lwa le Babenjamini gomme ba itokišeletša go lwa le Gibea go etša ge ba ile ba dira bjalo nakong e fetilego. 31 Ge Babenjamini ba be ba etšwa gore ba yo lwa le Baisiraele, Baisiraele ba ile ba itira eka ba a tšhaba e le gore ba iše Babenjamini kgole le motse. Ke moka go etša mehleng, ba ile ba thoma go hlasela le go bolaya ba bangwe ba banna ditseleng tše dikgolo, e nngwe ya ditsela tšeo e be e eya Bethele gomme e nngwe e eya Gibea, gomme ba tlogela banna ba e ka bago ba 30 ba Isiraele ba rapaletše moo. 32 Ka gona Babenjamini ba re: “Re ba fentše go etša mathomong.” Eupša Baisiraele ba be ba itše: “Re tla itira okare re a tšhaba gore re ba ntšhe motseng re ba iše ditseleng tše dikgolo.” 33 Ka gona, banna ka moka ba Isiraele ba tšwa moo ba bego ba le gona gomme ba itokišeletša ntwa kua Baali-thamara, mola Baisiraele bao ba bego ba laletše motse ba ile ba tšwa moo ba bego ba ikutile gona kgauswi le Gibea. 34 Ka gona, mašole a 10 000 (dikete tše lesome) ao a nago le bokgoni ao a tšwago melokong ka moka ya Isiraele a tla a ema pele ga Gibea, gomme ntwa e be e le e kgolo kudu, eupša Babenjamini ba be ba sa tsebe gore ba be ba le kgauswi le go welwa ke kotsi.

35 Jehofa a thuša Baisiraele go fenya Babenjamini, gomme letšatšing leo Baisiraele ba bolaya banna ba 25 100 (dikete tše masomepedi-hlano le lekgolo) ba Babenjamini, bao ba bego ba swere disabola.

36 Lega go le bjalo, ge Babenjamini ba bona banna ba Isiraele ba gomela morago, ba ile ba nagana gore ba tlo ba fenya, mola Baisiraele ba be ba gomela morago ka ge ba be ba tshepile bao ba bego ba laletše motse kgauswi le Gibea. 37 Bao ba bego ba laletše motse ba tsena motseng wa Gibea ka go phakiša gomme ba phatlalala le motse woo. Ke moka ba bolaya batho ka moka ba moo motseng ka sabola.

38 Bjale banna ba Isiraele ba be ba kwane le bao ba laletšego motse gore ge ba se na go tsena motseng woo, ba o tšhume ke moka ba tla bona ka muši gore ba šetše ba o thopile.

39 Ge banna ba Isiraele ba itira okare ba a tšhaba ntweng, Babenjamini ba ba hlasela gomme ba bolaya banna ba e ka bago ba 30 ba Baisiraele. Ke moka ba re: “Re ba fentše go etša ntweng ya pele.” 40 Motseng wa Gibea, go ile gwa thoma go rotoga muši o mogolo e le sešupo sa gore ba o thopile. Ge Babenjamini ba retologa, ba bona motse ka moka o tuka mollo gomme muši wa gona o rotogela godimo. 41 Ke moka banna ba Isiraele ba retologa gomme ba thoma go ba hlasela. Ke moka Babenjamini ba tšhoga ka ge ba be ba bona gore ba wetšwe ke kotsi. 42 Ka gona, Babenjamini ba tšhaba Baisiraele ba lebile lešokeng, eupša bao ba lwago le bona ba ba šala morago. Banna bao ba tšwago motseng le bona ba tšwa gomme ba ba hlasela. 43 Ba kitimiša Babenjamini go tšwa mahlakoreng ka moka ba se ba dumelele gore ba khutše. Ba ba bolaela pele ga motse wa Gibea ka thoko ya bohlabela. 44 Mafelelong, ba bolaya banna ba Benjamini ba 18 000 (dikete tše lesomeseswai). Ka moka ga bona e be e le bagale.

45 Babenjamini ba retologa gomme ba tšhabela leweng la Rimone leo le bego le le lešokeng. Ke moka Baisiraele ba bolaya Babenjamini ba 5 000 (dikete tše hlano) ditseleng tše dikgolo, ba dulela go ba kitimiša go fihla Gidomo gomme ba bolaya banna ba bangwe gape ba 2 000 (dikete tše pedi). 46 Babenjamini ka moka bao ba ilego ba bolawa letšatšing leo e be e le ba 25 000 (dikete tše masomepedi-hlano) ka moka ga bona e be e le bagale bao ba bego ba swere disabola. 47 Eupša Babenjamini ba 600 (makgolo a tshelelago) ba ile ba tšhabela leweng la Rimone leo le bego le le lešokeng, gomme ba dula moo ka dikgwedi tše nne.

48 Banna ba Isiraele ba boela morago gomme ba hlasela Babenjamini ba bolaya batho ka moka bao ba bego ba le moo motseng ka sabola. Ba bolaya batho le diruiwa le dilo ka moka tšeo di bego di šetše. Le gona, ba tšama ba tšhuma metse ka moka ka mollo.