Puku ya Pele ya Dikoronika

9 Baisiraele ka moka ba be ba ngwadišitšwe go ya ka meloko ya bona e bile ba ngwadilwe ka Pukung ya Dikgoši tša Isiraele. Bajuda ba ile ba išwa bothopša Babilona ka ge ba ile ba se botegele Modimo. 2 Badudi ba mathomo bao ba ilego ba boela magaeng a bona metseng ya bona e be e le Baisiraele ba bangwe, baperisita, Balefi le batho bao ba bego ba hlankela* tempeleng. 3 Tše dingwe tša ditlogolo tša Juda, tša Benjamini, tša Efuraime le tša Manase di ile tša dula Jerusalema. Tšona ke tše: 4 Go ditlogolo tša Peretse morwa wa Juda e be e le Uthai morwa wa Amihudi. Amihudi e be e le morwa wa Omiri, Omiri e be e le morwa wa Imiri, Imiri e be e le morwa wa Bani. 5 Go Bashilo e be e le Asaya yoo e bego e le ngwana wa mathomo ka gae le barwa ba gagwe. 6 Go barwa ba Tsera e be e le Jeuele le ditlogolo tše dingwe tša Juda tše 690 (makgolotshela-masomesenyane).

7 Go ditlogolo tša Benjamini e be e le Sallu morwa wa Meshulama, Meshulama e be e le morwa wa Hodafia, Hodafia e be e le morwa wa Hasenua, 8 Ibinea morwa wa Jerohama, Elaa morwa wa Usi, Usi e be e le morwa wa Mikiri, le Meshulama morwa wa Shefatia, Shefatia e be e le morwa wa Reguele, Reguele e be e le morwa wa Ibinija. 9 Banababo bona bao ba ngwadišitšwego go ya ka tatelano ya meloko e be e le ba 956 (makgolosenyane-masomehlano-tshela). Banna ba ka moka e be e le baetapele ba malapa a botatago bona.

10 Go baperisita e be e le Jedaya, Jehoyariba, Jakine, 11 Asaria morwa wa Hilikia, Hilikia e be e le morwa wa Meshulama, Meshulama e be e le morwa wa Tsadoko, Tsadoko e be e le morwa wa Merayothe, Merayothe e be e le morwa wa Ahitubo yoo e bego e le moetapele wa ntlo ya Modimo wa nnete, 12  Adaya morwa wa Jerohama, Jerohama e be e le morwa wa Pashuri, Pashuri e be e le morwa wa Malakia, Maasai morwa wa Adiele, Adiele e be e le morwa wa Jahasera, Jahasera e be e le morwa wa Meshulama, Meshulama e be e le morwa wa Meshilemithe, Meshilemithe e be e le morwa wa Imere, 13 le banababo bona bao e bego e le baetapele ba malapa a botatago bona. E be e le banna ba 1 760 (sekete-makgološupa-masometshela) bao ba nago le sebete, banna bao ba bego ba botega e bile ba dula ba loketše go šoma ntlong ya Modimo wa nnete.

14 Go Balefi e be e le Shemaya morwa wa Hasishubi, Hasishubi e be e le morwa wa Aserikama, Aserikama e be e le morwa wa Hashabia, e be e le ditlogolo tša Merari, 15 le Bakabakari, Hereshi, Galala, Matania morwa wa Mikha, Mikha e be e le morwa wa Sikiri, Sikiri e be e le morwa wa Asafa, 16 Obadia morwa wa Shemaya. Shemaya e be e le morwa wa Galala, Galala e be e le morwa wa Jeduthune. Berekia morwa wa Asa, Asa e be e le morwa wa Elikana yoo a bego a dula metsaneng ya Banetofa.

17 Batho bao ba bego ba leta keiting e be e le Shalume, Akuba, Talamoni, Ahimane le Shalume ngwanabo bona yoo e bego e le moetapele. 18 Le gona nakong e fetilego o be a letile keiti ya kgoši yeo e bego e le ka bohlabela. Ba e be e le batho bao ba bego ba leta dikeiti tšeo di bego di le dikampeng tša Balefi. 19 Shalume morwa wa Kore, morwa wa Ebiasafa, morwa wa Kora le banababo bao e bego e le ditlogolo tša Kora e bile ba etšwa lapeng la tatagwe ba be ba hlokometše mošomo woo le bona ba bego ba o šoma wa go leta mojako wa tente, e lego mošomo woo botatago bona ba bego ba o dira, wa go hlokomela lefelo leo Jehofa a bego a dula go lona. 20 Ba be ba kile ba etwa pele ke Finease morwa wa Eleasara. Jehofa o be a na le yena. 21 Sakaria morwa wa Meshelemia o be a kile a leta keiti ya moo go tsenwago gona tenteng ya kopano.

22 Batho ka moka bao ba bego ba kgethilwe gore ba lete keiti ya moo go bego go tsenwa gona e be e le ba 212 (makgolopedi-lesomepedi). Ba be ba dula metsaneng ya bona go ya ka tatelano ya meloko ya bona. Dafida le Samuele yoo a bego a kgona go bona dipono ba be ba file banna ba mošomo woo ka ge banna ba ba be ba tshepega. 23 Bona le barwa ba bona ba be ba filwe mošomo wa go hlokomela dikeiti tša ntlo ya Jehofa, ke gore ntlo ya tente. 24 Batho bao ba bego ba leta keiti ba be ba le ka mahlakoreng a mane e lego ka thoko ya bohlabela, ya bodikela, ya leboa le ya borwa. 25 Nako le nako, banababo bona bao ba lego metsaneng ya bona ba be ba swanetše gore ba tle ba šome le bona ka matšatši a šupago. 26 Go be go kgethilwe banna ba bane ba matla bao ba tshepegago gore ba hlokomele dikeiti. E be e le Balefi gomme ba be ba hlokometše diphapoši tša go jela, diphapoši tšeo go bego go beilwe matlotlo a ntlo ya Modimo wa nnete. 27 Ba be ba fetša bošego ka moka ba le mafelong ao ba beilwego go ona gomme ba hlokometše ntlo ya Modimo wa nnete, ka gobane ba be ba filwe mošomo wa go hlokomela ntlo e bile ba be ba swanetše go e bula* mesong e mengwe le e mengwe.

28 Ba bangwe ba bona ba be ba hlokometše dibjana tšeo di bego di dirišwa borapeding bja Modimo. Ba be ba di bala ge ba di ntšha le ge ba di buša. 29 Ba bangwe ba bona ba be ba filwe mošomo wa go hlokomela dibjana go akaretša le dibjana ka moka tše kgethwa, folouru yeo e šitšwego gabotse, beine, makhura, diorelo le makhura ao a bitšwago balesamo. 30 Ba bangwe ba barwa ba baperisita ba be ba dira motswako wa senkgišabose sa makhura a balesamo. 31 Le gona, yo mongwe wa Balefi yoo e bego e le Matitia, yoo e bego e le ngwana wa mathomo wa Shalume yoo e bego e le setlogolo sa Kora, o be a kgethilwe gore a hlokomele dilo tšeo di pakilwego ka dipaneng ka ge a be a botega. 32 Bana ba bangwe babo bona bao e bego e le Bakohathe ba be ba filwe mošomo wa go lokišetša senkgwa seo se hlatlagantšwego* sabatha se sengwe le se sengwe.

33 Ba e be e le diopedi, baetapele ba malapa a botatago bona ba Balefi bao ba bego ba le ka diphapošing tša go jela. Ba be ba se ba fiwa mešomo e mengwe ka gobane ba be ba swanetše go šoma bošego le mosegare. 34 Ba e be e le baetapele ba malapa a botatago bona ba Balefi go ya ka tatelano ya meloko ya bona. Ba be ba dula Jerusalema.

35 Jeiele tatago Gibeoni o be a dula Gibeoni gomme leina la mosadi wa gagwe e be e le Maaka. 36 Morwa wa gagwe wa mathomo e be e le Abadone, a latelwa ke Tsuri, Kishe, Baali, Nere, Nadaba 37 Gedora, Ahio, Sakaria le Mikilothe. 38 Mikilothe o ile a ba tatago Shimeama. Ba be ba dula kgauswi le banababo bona kua Jerusalema, gotee le banababo bona ba bangwe. 39 Nere o ile a ba tatago Kishe, Kishe a ba tatago Saulo, Saulo a ba tatago Jonathane, Malaki-shua, Abinadaba le Eshibaali. 40 Morwa wa Jonathane e be e le Meriba-baali. Meriba-baali yena ya ba tatago Mika. 41 Barwa ba Mika e be e le Pithona, Meleke, Tarea le Ahasi. 42 Ahasi o ile a ba tatago Jara, Jara a ba tatago Alemethe, Asimafete le Simiri. Simiri o ile a ba tatago Motsa. 43 Motsa o ile a ba tatago Binea, Binea ya ba tatago Rafaha, Rafaha ya ba tatago Eleasa gomme Eleasa ya ba tatago Atsele. 44 Atsele o be a na le barwa ba tshelelago, gomme maina a bona e be e le Aserikama, Bokeru, Ishimaele, Shearia, Obadia le Hanana. Ba ka moka e be e le barwa ba Atsele.