Daniele

9 Ngwageng wa pele wa ge go buša Dario morwa wa Ahasiwerosi yoo e bego e le setlogolo sa Bamede, yena yoo a bego a kgethilwe gore e be kgoši mmušong wa Bakaladea, 2 ngwageng wa pele wa ge a buša, nna Daniele ke ile ka thušwa ke dipuku* gore ke tsebe gore Jerusalema e tlo fetša mengwaga e mekae e le lešope. Go ya le ka seo Jehofa a ilego a se botša moporofeta Jeremia, Jerusalema e be e tlo ba lešope ka mengwaga e 70. 3 Ka gona ka kgopela Jehofa Modimo wa nnete gore a nthuše. Ka mo kgopela ka thapelo e bile ke ikona dijo ke apere diaparo tša go dirwa ka lesaka e bile ke itšhela ka melora. 4 Ke moka ka rapela Jehofa Modimo wa ka gomme ka ipobola ka re:

“Wena Jehofa Modimo wa nnete, wena yo mogolo le yo a boifišago, o tshepagalela kgwerano ya gago e bile o rata* bao ba go ratago le go kwa melao ya gago. 5 Re dirile sebe, ra go fošetša, ra dira dilo tše mpe gomme ra go hlanogela. Ga se ra boloka melao ya gago le ditaelo tša gago. 6 Ga se ra theetša bahlanka ba gago bao e lego baporofeta, bao ba bego ba botša dikgoši tša rena, baetapele ba rena, borakgolokhukhu ba rena le batho ka moka ba lefaseng ka leina la gago. 7 Wena Jehofa o dira dilo tša go loka, eupša rena, batho ba Juda, badudi ba Jerusalema le Baisiraele ka moka bao ba dulago kgole le kgauswi, dinageng ka moka tšeo o ba gašanyeditšego go tšona, re na le dihlong go no swana le ge go le bjalo lehono ka ge re sa ka ra go botegela.

8 “Wena Jehofa, rena, dikgoši tša rena, baetapele ba rena le borakgolokhukhu ba rena, re na le dihlong ka gobane re go diretše sebe. 9 Wena Jehofa Modimo wa rena, o a lebalela e bile o a gaugela, eupša rena re go hlanogetše. 10 Ga se ra kwa lentšu la gago wena Jehofa Modimo wa rena e bile ga se ra latela melao ya gago yeo o re filego yona o diriša bahlanka ba gago bao e lego baporofeta. 11 Rena batho ka moka ba Isiraele re tshetše molao wa gago, ra go hlanogela ka go se kwe lentšu la gago, moo re ilego ra welwa ke thogako yeo go ennwego ka yona gwa ba gwa ngwalwa ka yona Molaong wa Moshe mohlanka wa gago wena Modimo wa nnete, ka gobane re go diretše sebe. 12 O phethagaditše seo o se boletšego ka rena le ka babuši ba rena bao ba re bušago ka go re tlišetša masetlapelo a magolo. Lefaseng ka moka ga se gwa ka gwa direga selo sa go swana le seo se diragetšego Jerusalema. 13 Ka ge go ngwadilwe Molaong wa Moshe, re wetšwe ke masetlapelo a ka moka, eupša ga se ra kgopela gore wena Jehofa Modimo wa rena o re gaugele ka go tlogela phošo ya rena le ka go kwešiša gore o bolela nnete.

14 “Wena Jehofa, o be o dutše o lebeletše mediro ya rena ke moka wa re tlišetša masetlapelo ka gobane dilo ka moka tšeo wena Jehofa Modimo wa rena o di dirilego, di bontšha gore o lokile. Eupša rena ga se ra kwa lentšu la gago.

15 “Bjale wena Jehofa Modimo wa rena, wena o ntšhitšego rena batho ba gago nageng ya Egepeta ka matla a gago, gomme wa itirela leina le lebotse go ba go fihla le lehono, rena re go diretše sebe, ra ba ra dira dilo tše mpe. 16 Wena Jehofa, ka ge o dula o dira dilo tša go loka, hle gomiša bogale bja gago bjo bogolo gomme o se sa hlasela motse wa gago wa Jerusalema, e lego thaba ya gago e kgethwa. Ka gobane dibe tša rena le diphošo tša borakgolokhukhu ba rena, di dira gore batho ka moka bao ba re dikologilego ba re kwere ba be ba kwere le Jerusalema. 17 Bjale wena Modimo wa rena, hle theetša thapelo ya ka nna mohlanka wa gago o be o kwe dilo tšeo ke go kgopelago tšona gomme o gaugele sekgethwa sa gago seo se sentšwego. Tše ka moka di dire ka baka la leina la gago, wena Jehofa. 18 Wena Modimo wa ka, hle, hlwaya tsebe gomme o nkwe. Bona kamoo motse wo o bitšwago ka leina la gago o sentšwego ka gona. Ga re go kgopele ka baka la ge re dira dilo tša go loka eupša re go kgopela ka baka la ge re tseba gore o gaugela kudu. 19 Re kwe, hle Jehofa. Re lebalele, hle Jehofa. Re theetše gomme o gate mogato, hle Jehofa. Ka baka la leina la gago, o se ke wa diega hle Modimo wa ka, ka gobane motse wa gago le batho ba gago ba bitšwa ka leina la gago.”

20 Ge ke sa dutše ke bolela e bile ke rapela gomme ke ipobola sebe sa ka le sebe sa setšhaba sa gešo sa Isiraele e bile ke kgopela Jehofa Modimo wa ka gore a gaugele thaba ya gagwe e kgethwa, 21 Gabariele, yoo ke bego ke mmone ponong, o ile a tla go nna ka sebopego sa monna. Ka nako yeo ke be ke lapile kudu. E be e le nako ya go neela sebego sa mantšiboa. 22 O ile a nthuša gore ke kwešiše dilo tšeo di bego di tlo direga, a re:

“Wena Daniele, ke tlile go go thuša gore o kgone go lemoga dilo tšeo di tlago go direga le go go thuša go di kwešiša. 23 Ge o be o thoma go rapela, Modimo o ile a nthomela molaetša. Bjale ke tlile go go botša gore molaetša wo o reng ka gobane wena o bohlokwa* kudu go Modimo. Ka gona, theetša gabotse seo ke tlago go go botša sona gomme o leke go kwešiša pono ye.

24 “Go na le dibeke* tše 70 tšeo di beetšwego setšhaba sa geno le motse wa geno o mokgethwa, e le gore go fedišwe taba ya go tshelwa ga molao wa Modimo, go tlošwe sebe, go lebalelwe dibe, go dirwe dilo tša go loka go ya go ile, go tiišwe pono le boporofeta gomme Sekgethwakgethwa se tlotšwe. 25 O swanetše go tseba le go kwešiša gore go tloga ge go etšwa lentšu la gore Jerusalema e tsošološwe le go agwa leswa go fihlela ge Mesia* yoo e lego Moetapele a etla, go tla ba le dibeke tše šupago le dibeke tše dingwe tše 62. E tla tsošološwa le go agwa leswa, ya ba le mmaraka le leope leo le tletšego meetse, eupša batho ba tla dira seo nakong ya mathata.

26 “Ka morago ga dibeke tše 62, Mesia o tla bolawa a se na selo.

“Le gona mašole a moetapele yoo a tlago, a tlo senya motse le lefelo le lekgethwa. Le tla fedišwa ka mafula. Go tla dula go na le ntwa go fihla mafelelong. Modimo o phethile ka gore lefelo leo e šale e le lešope.

27 “O tla dira gore kgwerano e šome go batho ba bantšhi ka beke e tee. Le gona gare ga beke yeo o tla dira gore go se sa dirwa dihlabelo le dibego di se sa neelwa.

“Le gona, yoo a bakago tshenyo o tla tla ka maphego a dilo tšeo di šišimišago. Phetho yeo Modimo a e tšerego, e tla tšhollelwa le go yoo a lego nageng yeo e lego lešope go fihlela a fedišwa.”