Puku ya Pele ya Samuele

30 Ge Dafida le banna bao a bego a na le bona ba etla Tsikilaga ka letšatši la boraro, Baamaleke ba be ba tsene ka Negebe* le motseng wa Tsikilaga. Ba hlasetše Tsikilaga gomme ba e tšhumile ka mollo. 2 Ba be ba thopile basadi le batho ka moka bao ba bego ba le moo motseng, go tloga ka yo monyenyane go fihla ka yo mogolo. Ba be ba se ba bolaya motho eupša ba ba tšere gomme ba sepela le bona. 3 Ge Dafida le banna bao a bego a na le bona ba fihla motseng, ba ile ba hwetša o šetše o tšhumilwe ka mollo gomme basadi ba bona, barwa ba bona le barwedi ba bona ba thopilwe. 4 Dafida le banna bao a bego a na le bona ba ile ba lla kudu go fihlela ba se sa kgona go lla. 5 Basadi ba babedi ba Dafida e lego Ahinoama wa Mojeseriele le Abigaile wa Mokaramele, yo e bego e le mosadi wa Nabala, le bona ba be ba thopilwe. 6 Dafida o be a tlaletšwe kudu ka ge banna bao a bego a na le bona ba be ba nyaka go mo kgatla ka maswika. Banna bao ba be ba galefile kudu ka ge barwa le barwedi ba bona ba be ba thopilwe. Eupša Dafida o ile a imatlafatša ka Jehofa Modimo wa gagwe.

7 Dafida a re go moperisita Abiathara, morwa wa Ahimeleke: “Ke kgopela o ntlišetše efoda.”* Ke moka Abiathara a mo tlišetša yona. 8 Dafida a botšiša Jehofa a re: “Na nka rakediša banna bao ba hlasetšego motse wa rena? Na ke tla ba swara?” Modimo a re go yena: “Ba rakediše, ka gobane o tlo ba swara gomme wa tšea dilo tšeo ba di thopilego le go phološa batho bao ba ba thopilego.”

9 Kapejana Dafida le banna ba 600 (makgolo a tshelelago) bao a bego a na le bona ba sepela ba fihla Moeding wa Besora gomme banna ba bangwe ba šala moo. 10 Dafida le banna ba 400 (makgolo a mane) ba rakediša banna bao ba ba hlasetšego. Eupša banna ba 200 (makgolo a mabedi) bao ba bego ba lapile gore ba ka tshela Moedi wa Besora ba šala moo.

11 Ba hwetša monna wa Moegepeta kua nageng gomme ba mo tliša go Dafida. Ba mo nea dijo gore a je le meetse gore a nwe. 12 Ba mo ngwathela le kuku ya go dirwa ka mago ao a omišitšwego, ba ba ba mo fa le dikuku tše pedi tša go dirwa ka diterebe tšeo di omišitšwego. A ja gomme a ba le matla ka gobane o be a tšere matšatši a mararo le mašego a mararo a sa je selo le go nwa meetse. 13 Dafida a mmotšiša a re: “Mong wa gago ke mang, le gona o tšwa kae?” Yena a re: “Ke nna mohlanka wa Moegepeta, lekgoba la monna wa Moamaleke. Eupša mong wa ka o ntlogetše ka gobane ke be ke babja matšatšing a mararo a fetilego. 14 Ke rena re hlasetšego ka borwa bja Bakereta le nageng ya Juda gotee le ka borwa bja Kalebe gomme Tsikilaga yona ra e tšhuma ka mollo.” 15 Dafida a re go yena: “Na o ka nkiša go banna bao ba re hlasetšego? ” Monna yoo a re: “Nkenele ka Modimo gore o ka se mpolaye le gore o ka se nkiše go mong wa ka gore a mpolaye, gona ke tla go iša go banna bao ba le hlasetšego.”

16 Ke moka a mo iša go bona moo ba bego ba tletše le naga ba eja, ba enwa e bile ba dirile monyanya ka baka la dilo tše dintši tšeo ba di tšerego nageng ya Bafilisita le nageng ya Juda. 17 Dafida a ba bolaya go tloga ka masa go fihla mantšiboa. Gwa se phonyokge motho ntle le banna ba 400 (makgolo a mane) bao ba tšhabilego ba nametše dikamela. 18 Dafida a tšea dilo ka moka tšeo Baamaleke ba bego ba di tšere, a phološa le basadi ba gagwe ba babedi. 19 A tšea dilo ka moka tšeo ba bego ba di thopile, go tloga ka se senyenyane go fihla ka se segolo. Banna bao ba phološa le barwa le barwedi ba bona le dilo tšeo di bego di thopilwe. Dafida a di tšea ka moka. 20 Dafida a tšea mehlape ka moka ya dinku, dipudi le dikgomo, ba e gapa gotee le mehlape e mengwe. Ke moka ba re: “Tše ke tšeo di thopilwego ke Dafida.”

21 Dafida a fihla go banna ba 200 (makgolo a mabedi) bao ba bego ba lapile kudu gore ba ka sepela le yena, bao ba bego ba šetše Moeding wa Besora gomme le bona ba tla go tlo gahlanetša Dafida le banna bao a bego a na le bona. Ge Dafida a fihla go bona a ba botšiša gore ba šetše bjang. 22 Lega go le bjalo, go be go na le banna ba babe le ba go se re selo go banna bao ba bego ba sepetše le Dafida. Ba ile ba re go Dafida: “Ka gore ba ga se ba sepela le rena, ga re ba nee selo go dilo tšeo re di tšerego ka morago ga ntwa. Yo mongwe le yo mongwe a a tšee mosadi wa gagwe le bana ba gagwe gomme a sepele.” 23 Eupša Dafida a re go bona: “Bana bešo, le se ke la dira bjalo ka gobane ke Jehofa a re filego dilo tše. Ke yena a re šireleditšego le go re thuša gore re fenye banna bao ba re hlasetšego. 24 Na le nagana gore go na le motho yo a ka dumelelanago le lena ge le bolela ka tsela ye? Yo a tšwago ntweng o tla hwetša sa go lekana le sa yo a bego a šetše le merwalo. Ka moka ga bona ba tla hwetša dilo tša go lekana.” 25 Go tloga letšatšing leo, seo Dafida a se boletšego e ile ya ba molao wa Baisiraele go fihla le lehono.

26 Ge Dafida a fihla Tsikilaga, o ile a tšea tše dingwe tša dilo tšeo ba di hweditšego ka morago ga ntwa gomme a di romela banna ba bagolo ba Juda, bao e bego e le bagwera ba gagwe, a re: “Ye ke mpho ya lena go tšwa go dilo tšeo di thopilwego go manaba a Jehofa.” 27 O ile a romela dimpho tšeo go bao ba lego Bethele, bao ba lego Ramothe ya ka borwa, bao ba lego Jathiri, 28 bao ba lego Aroere, bao ba lego Shifimothe, bao ba lego Eshithemoa, 29 bao ba lego Rakale, bao ba lego metseng ya Bajerahamiele, bao ba lego metseng ya Bakeni, 30 bao ba lego Horoma, bao ba lego Borashane, bao ba lego Athaka, 31 bao ba lego Heburone le mafelong ka moka ao Dafida le banna bao a bego a na le bona ba sepetšego go ona.