Lefitiko

6 Jehofa a tšwela pele a bolela le Moshe a re: 2 “Ge e ba motho a ka radia motho yo mongwe ka go mo hlalefetša goba go mo utswetša selo seo motho yoo a mo adimilego sona goba a mo neilego sona gore a se hlokomele, gona motho yoo ga a botegele Jehofa, o dirile sebe. 3 Goba ge e ba motho a ka hwetša selo se se timetšego eupša a se se bušetše go mong wa sona, goba ge a ka ena ka maaka a re ga se a ka a dira se sengwe sa dibe tšeo, gona motho yoo ga a botegele Modimo. Ka gona o swanetše go dira se se latelago: 4 Ge e ba a dirile sebe gomme a hwetšwa a na le molato, gona a buše selo seo a se utswitšego, seo a se tšerego ka boradia, seo a se adimilwego goba seo se bego se timetše seo a se hweditšego, 5 goba a buše selo le ge e le sefe seo a ennego ka maaka mabapi le sona, a patelele selo seo ka tšhelete e feletšego, a be a oketše ka karolo ya bohlano ya tšhelete yeo. A bušetše selo seo go mong wa sona letšatšing leo a hwetšwago a le molato. 6 Sebego sa gagwe sa molato seo a se tlišetšago Jehofa e be nku e tona yeo e phetšego gabotse. Nku yeo e be ya tšhelete yeo e boletšwego ke moperisita. Ke moka a e tliše go moperisita. 7 Moperisita yoo a mo direle sehlabelo pele ga Jehofa gomme Modimo o tla mo lebalela dibe tšeo a di dirilego.”

8 Jehofa a tšwela pele a bolela le Moshe a re: 9 “Botša Arone le barwa ba gagwe o re: ‘Molao wa sebego sa go fišwa šo: Sebego sa go fišwa se be sebešong godimo ga aletare bošego ka moka go fihlela mesong, gomme mollo woo o dule o tuka mo aletareng. 10 Moperisita a apare seaparo sa boperisita sa linene le borokgwana bja ka gare bja linene. Ke moka a tloše melora ya sebego seo sa go fišwa gomme a e bee kgauswi le aletare. 11 Ke moka a hlobole diaparo tša gagwe a apare tše dingwe gomme a tšee melora yeo a e iše lefelong leo le hlwekilego ka ntle ga ditente. 12 Mollo o dule o tuka aletareng. Mesong e mengwe le e mengwe moperisita a bešetše dikgong mo mollong wa aletare, mo go wona a bee sebego sa go fišwa gomme a beše makhura a dihlabelo tša go dira khutšo le Modimo gore di thuntšhe muši moo. 13 Mollo o dule o tuka moo aletareng. O se ke wa tima.

14 “‘Molao wa sebego sa mabele šo: Lena barwa ba Arone le tliše sebego seo go Jehofa pele ga aletare. 15 Yo mongwe wa barwa ba Arone, a tšee folouru yeo e šitšwego gabotse ya go tlala seatla go sebego seo sa mabele. A ntšhe le makhura a mangwe a yona gotee le diorelo ka moka tšeo di tlišitšwego le sebego seo sa mabele, ke moka a beše sebego seo aletareng gore se thunye muši wo o nkgago bose wo o yago go Jehofa gore a dule a gopola sebego seo. 16 Arone le barwa ba gagwe ba je seo se šetšego. Se apewe e be dinkgwa tšeo di sa omelwago gomme se jelwe lefelong le lekgethwa. Ba se jele lapeng la taberenakele. 17 Ba se ke ba se tšhela komelo. Ke ba file sona gore e be karolo ya bona go dibego tša ka tša go fišwa. Ke se sekgethwakgethwa go swana le sebego sa sebe le sebego sa molato. 18 Barwa ba Arone e be bona feela ba jago sebego seo. Ke karolo yeo Jehofa a ba neago yona go ya go ile go tšwa dibegong tša gagwe tša go fišwa. Selo se sengwe le se sengwe seo se ka kgwathago dibego tšeo e tla ba se sekgethwa.’”

19 Jehofa a tšwela pele a bolela le Moshe a re: 20 “Ge Arone a tlotšwa gore e be moperisita, yena le barwa ba gagwe ba swanetše go nea Jehofa sebego sa mabele sa folouru yeo e šitšwego gabotse ka sebjana sa dilithara tše pedi. Ba tliše karolo ya folouru yeo mesong gomme karolo e nngwe ya go lekana le yona ba e tliše mantšiboa. 21 Folouru yeo e dubje ka makhura gomme e apewe paneng. O e dube gabotse ka makhura, o e apee gomme o e tliše ka diriparipa e le sebego sa mabele sa monkgo o bose wo o yago go Jehofa. 22 Moperisita yo a tloditšwego yo a tla bego a tšeetše barwa ba Arone legato, e be yena a se neelago. Sebego seo se bešwe ka moka gore se thuntšhe muši wo o yago go Jehofa. Ye ke taelo ya go ya go ile. 23 Sebego se sengwe le se sengwe sa mabele seo se newago moperisita e be se se feletšego. Se se ke sa jewa.”

24 Jehofa a tšwela pele a bolela le Moshe a re: 25 “Bolela le Arone le barwa ba gagwe o re: ‘Molao wa sebego sa sebe šo: Sebego sa sebe le sona se hlabelwe pele ga Jehofa lefelong leo diphoofolo tša sebego sa go fišwa di hlabelwago gona. Ke selo se sekgethwakgethwa. 26 Moperisita yo a se neelago e be yena a se jago. A se jele lefelong le lekgethwa ka lapeng la taberenakele.

27 “‘Selo se sengwe le se sengwe seo se ka kgwathago nama ya sebego seo, e be se sekgethwa. Le gona ge motho le ge e le ofe a ka tšhelwa ke a mangwe a madi a sona seaparong, gona le hlatswe seaparo seo lefelong le lekgethwa. 28 Pitša ya letsopa yeo sebego seo se fufuditšwego ka go yona, le e thube. Ge e ba se fufuditšwe ka pitšeng ya koporo, gona le e gohle le be le e hlatswe ka meetse.

29 “‘Banna bao e lego baperisita e be bona feela ba jago sebego seo. Ke selo se sekgethwakgethwa. 30 Eupša le se ke la ja sebego le ge e le sefe sa sebe ge e ba a mangwe a madi a sona a tlišitšwe ka taberenakeleng gore go hlwekišwe dibe lefelong le lekgethwa. Eupša le se fiše ka mollo.