Esitere

3 Ka morago ga dilo tše, Kgoši Ahasiwerosi o ile a fa Hamani morwa wa Hamedatha wa Moagaga maemo a godimo, gomme a dira gore a fete dintona tše dingwe ka moka tšeo di bego di na le yena ka maemo. 2 Bahlanka ka moka ba kgoši bao ba bego ba le keiting ya ka mošate, ba be ba inama ba khunamela Hamani go bontšha gore ba a mo hlompha, ka gobane kgoši e be e ba laetše gore ba dire bjalo. Eupša ge e le Morodekai yena, o ile a gana go inama goba go khunama. 3 Ke moka bahlanka ba kgoši bao ba bego ba le keiting ya ka mošate ba ile ba re go Morodekai: “Goreng o sa kwe taelo ya kgoši?” 4 Letšatši le lengwe le le lengwe ba be ba bolela le yena ka taba ye, eupša yena o be a sa ba theetše. Ka ge Morodekai a be a ba boditše gore ke yena Mojuda, ba ile ba botša Hamani e le gore ba bone gore go tlo diragala’ng ka yena.

5 Bjale ge Hamani a bone gore Morodekai o ganne go inama le go mo khunamela, o ile a galefa kudu. 6 O ile a bona okare o be a tla inyatšiša ka batho ge a ka bolaya Morodekai a nnoši, ka gobane o be a boditšwe le gore Morodekai o tšwa setšhabeng sa Bajuda. Ka gona, Hamani o be a nyaka go fediša batho ka moka bao ba bego ba le mmušong wa Ahasiwerosi, e lego setšhaba ka moka sa gabo Morodekai.

7 Ka kgwedi ya pele, e lego kgwedi ya Nisani, ngwageng wa bo-12 wa ge go be go buša Kgoši Ahasiwerosi, Hamani o ile a laela gore motho yo mongwe a lahlele letengwa* leo le bitšwago Puri, e le gore ba kgone go tseba letšatši le kgwedi yeo ba tlago go bolaya Bajuda ka yona. Letengwa leo le ile la šupa go kgwedi ya bo-12, e lego Adara. 8 Ke moka Hamani o ile a botša Kgoši Ahasiwerosi a re: “Go na le setšhaba se sengwe seo se gašanego le go phatlalala diprofenseng ka moka tšeo di lego mmušong wa gago, seo melao ya sona e fapanego le ya ditšhaba tše dingwe ka moka. Setšhaba seo ga se kwe melao ya kgoši, ebile le ge kgoši e ka se tlogela e ka se holege ka selo. 9 Ge e ba kgoši e dumela, anke go ngwalwe mangwalo a gore setšhaba se se fedišwe, ge e le nna ke tla patela bahlanka ba ka mošate ditšhelete tša silifera tše 10 000 gore ba tle ba di bee moo go bewago dilo tše bohlokwa tša ka mošate.”

10 Ge kgoši e ekwa se, e ile ya rola palamonwana ya yona gomme ya e nea Hamani morwa wa Hamedatha wa Moagaga, yena yo e bego e le lenaba la Bajuda. 11 Kgoši ya botša Hamani ya re: “O filwe silifera le setšhaba seo, ka gona dira ka mokgwa wo o nyakago.” 12 Ka gona bangwaledi ba kgoši ba ile ba bitšwa ka di-13 tša kgwedi ya pele. Ba ile ba ngwala ditaelo ka moka tša Hamani tšeo a bego a di neile dintona tša kgoši, baetapele ba diprofense le dikgošana tša ditšhaba tša go fapafapana. Profense e nngwe le e nngwe e be e ngwaletšwe ka mokgwa wa yona, gomme setšhaba se sengwe le se sengwe se be se ngwaletšwe ka leleme la sona. Mangwalo ao a be a ngwadilwe ka leina la Kgoši Ahasiwerosi, gomme a be a kgatlilwe ka setempe sa palamonwana ya gagwe.

13 Mangwalo ao a ile a romelwa diprofenseng ka moka tša kgoši. A be a laela gore ka di-13 tša kgwedi ya bo-12, e lego ka kgwedi ya Adara, Bajuda ka moka ba fedišwe le go bolawa ka letšatši letee. Go bolawe masogana le bakgalabje, gotee le bana le basadi, ebile ba tšee dithoto tša bona. 14 Seo se bego se ngwadilwe ka mangwalong ao, e be e tla ba molao diprofenseng ka moka gomme sa tsebišwa ditšhaba ka moka e le gore di itokišeletše letšatši leo. 15 Batho bao ba bego ba romilwe, ba ile ba tšwa kapelapela go ya le kamoo kgoši e bego e laetše. Molao woo o be o dirilwe ka mošate wa Shushani. Ke moka kgoši le Hamani ba dula fase ba nwa beine, eupša ge e le motse wa Shushani wona, o be o le kgakanegong.