Psalme
71 Wena Jehofa, ke tšhabetše go wena.
O se ke wa dumelela gore ke hlabišwe dihlong.
2 Ntlhakodiše o be o mphološe ka gobane o lokile.
Ntheetše gomme o mphološe.
3 Eba lefelo la ka leo le šireletšegilego
Leo ke tlago go dula ke tšhabela go lona.
Romela motho gore a tle a mphološe,
Ka gobane o leswika la ka le legolo le sebo sa ka.
4 Mphološe go yo kgopo, hle Modimo wa ka,
O mphološe le go yoo a gatelelago.
5 Ka gobane ke tshepile wena Mmuši Morena Jehofa.
Ke be ke dutše ke ithekgile ka wena go tloga bosweng bja ka.
6 Ke be ke dutše ke ithekgile ka wena go tloga ge ke belegwa,
Ke wena o nntšhitšego ka popelong ya mma.
Ke dula ke go tumiša.
7 Batho ba bantšhi ba a mmakalela ge ba mpona.
Eupša ke a tseba gore wena o setšhabelo sa ka se matla.
8 Ke tla go reta letšatši ka moka,
Le go bolela ka bogolo bja gago.
9 O se ke wa ntahla ge ke tšofetše.
O se ke wa ntlogela ge ke felelwa ke matla.
10 Manaba a ka a bolela ka nna gampe,
Gomme bao ba nyakago go mpolaya ba ntogela maanomabe.
11 Ba re: “Modimo o mo tlogetše.
A re mo kitimišeng re mo sware, ka gobane ga go na yo a tlago go mo phološa.”
12 O se ke wa ntlogela hle Modimo.
Ke kgopela o tle ka pela o nthuše, hle Modimo wa ka.
13 Anke bao ba lwago le nna ba hlabje ke dihlong
Gomme ba fedišwe.
Anke bao ba nyakago ke welwa ke masetlapelo
Ba lewe ke dihlong.
14 Eupša ge e le nna ke tla tšwela pele ke go letetše,
Ke tla go tumiša go feta peleng.
15 Ke tla bolela ka go loka ga gago,
Letšatši ka moka ke tla bolela ka mediro ya gago ya phološo,
Le ge e le e mentšhi kudu moo ke palelwago ke go e bala.
16 Ke tla tla gomme ka bolela ka ditiro tša gago tše dikgolo,
Wena Mmuši Morena Jehofa,
Ke tla bolela ka go loka ga gago feela.
17 Wena Modimo, o nthutile go tloga bosweng bja ka,
Go fihla ga bjale, ke sa dutše ke bolela ka mediro ya gago e makatšago.
18 Hle Modimo, o se ke wa ntlogela ge ke tšofetše gomme hlogo ya ka e šweufetše.
Ntumelele gore ke botše moloko wo o tlago ka matla a gago,
Le go botša bohle bao ba sa tlago ka bogolo bja gago.
19 Wena Modimo, o dirile dilo tše dintšhi tša go loka e bile di fihla magodimong.
O dirile dilo tše dikgolo,
Wena Modimo, ke mang yo a swanago le wena?
20 Le ge o dirile gore ke welwe ke mathata a mantšhi le go welwa ke masetlapelo,
Hle mphe matla gape.
Anke o nntšhe ka tlasetlase ga lefase.
21 Anke o mpušetše seriti sa ka,
Le gona o ntšhireletše gomme o nkhomotše.
22 Ke moka ke tla go reta ka seletšo sa metato,
Ka gobane o a tshepega wena Modimo wa ka.
Ke tla go opelela dikoša tša go go reta ke letša harepa,
Wena Mokgethwa wa Isiraele.
23 Ke tla opelela godimo koša ya go go reta ke thabile,
Ka gobane o mphološitše.
24 Ke tla bolela ka go loka ga gago letšatši ka moka,
Ka gobane bao ba nyakago ke diragalelwa ke dilo tše mpe ba tla swaba gomme ba lewa ke dihlong.