Puku ya Pele ya Dikgoši

11 Kgoši Solomone o be a rata basadi ba bantšhi bao e bego e se Baisiraele. Ka ntle le morwedi wa Farao, o be a na le basadi ba Bamoaba, Baamoni, Baedomo, Basidone le Bahethe. 2 Basadi bao ba be ba etšwa ditšhabeng tšeo Jehofa a ilego a botša Baisiraele ka tšona a re: “Le se ke la ikopanya le tšona, gomme le tšona di se ke tša ikopanya le lena ka gobane batho ba ditšhaba tšeo ba tla kgonthišetša gore le latela medimo ya bona.”* Eupša Solomone o be a ba rata kudu. 3 Le gona o be a na le basadi ba 700 (makgološupa) bao ba bego ba na le maemo a godimo, le basadi ba direthe ba 300 (makgolotharo) gomme basadi ba gagwe ba mo dira gore a latele medimo ya bona ganyenyane-ganyenyane. 4 Ge Solomone a šetše a tšofetše, basadi ba gagwe ba ile ba feleletša ba mo dirile gore a hlankele medimo e mengwe. Le gona o be a se a ineela go Jehofa Modimo wa gagwe ka pelo ya gagwe ka moka go swana le Dafida tatagwe. 5 Solomone o ile a hlankela Ashiterothe modimogadi wa Basidone le Milikomo yo e bego e le modimo wa go šišimiša wa Baamoni. 6 Le gona, Solomone o ile a dira dilo tše mpe pele ga Jehofa. Go fapana le tatagwe Dafida, o ile a se kwe Jehofa ka pelo ya gagwe ka moka.

7 Ka morago ga moo, Solomone a agela Kemoshi yo e lego modimo wa go šišimiša wa Bamoaba lefelo le le phagamego leo go rapelwago go lona, a ba a agela le Mmoleke yo e lego modimo wa go šišimiša wa Baamoni lefelo le le swanago kgauswi le Jerusalema. 8 Ge e le basadi ba gagwe ka moka bao e bego e se Baisiraele e bile ba direla medimo ya bona dihlabelo gotee le dihlabelo tšeo di thuntšhago muši, le bona o ile a ba direla mafelo a phagamego.

9 Jehofa o ile a galefela Solomone kudu, ka gobane pelo ya gagwe e ile ya mo dira gore a be kgole le Jehofa Modimo wa Isiraele, yena yoo a ilego a iponagatša go yena gabedi, 10 a ba a mo lemoša ka yona taba ye ya gore a se ke a hlankela medimo e mengwe, eupša yena a se theetše taelo ya Jehofa. 11 Bjale Jehofa a re go Solomone: “Ka ge o se wa ntheetša e bile o se wa boloka kgwerano ya ka le melao ya ka yeo ke go laetšego yona, gona ke tla go amoga mmušo gomme ka o nea yo mongwe wa bahlanka ba gago. 12 Lega go le bjalo, ka baka la Dafida tatago, nka se go amoge mmušo woo o sa phela. Ke tla o amoga morwa wa gago, 13 eupša nka se mo amoge ka moka ga wona. Ke tla nea morwa wa gago moloko o tee, ka baka la Dafida mohlanka wa ka le ka baka la Jerusalema yeo ke e kgethilego.”

14 Ke moka Jehofa a dira gore go be le motho yo a lwago le Solomone, e lego Hadada wa Moedomo, yo a tšwago lapeng la bogoši la Edomo. 15 Ge Dafida a be a fenya Edomo, Joaba molaodi wa mašole o ile a ya a boloka bao ba bego ba bolailwe ka sehlogo, gomme a leka go bolaya banna ka moka ba Edomo. 16 (Ka gobane Joaba le banna ka moka ba Baisiraele ba ile ba dula Edomo dikgwedi tše tshela go fihlela a bolaile banna ka moka ba moo.) 17 Eupša Hadada o ile a tšhaba a na le ba bangwe ba bahlanka ba tatagwe ba Baedomo gomme ba ya Egepeta. Ka nako yeo Hadada e be e sa le mošemanyana. 18 Ka gona ba tloga Midiane ba ya Parane, ba tšea banna moo Parane ba ya Egepeta go kgoši ya moo e lego Farao, yoo a ilego a fa Hadada ntlo, a laela gore a fiwe dijo a ba a mo fa le naga. 19 Kgoši Farao o ile a rata Hadada kudu, moo a ilego a mo fa moratho wa mosadi wa gagwe mohumagadi Tahapenese gore a mo nyale. 20 Ka morago, moratho wa Tahapenese a belegela Hadada morwa gomme a mo reela leina a re ke Genubatha, gomme Tahapenese a mo godišetša ntlong ya Farao. Ke moka Genubatha a dula ntlong ya Farao gotee le barwa ba Farao.

21 Ge Hadada a be a le Egepeta o ile a kwa gore Dafida o hlokofetše e bile o bolokilwe* le gore Joaba molaodi wa mašole le yena o hlokofetše. Ka gona a botša Farao a re: “Ntumelele gore ke sepele, ke boele nageng ya gešo.” 22 Eupša Farao a re go yena: “Ke eng seo o se hlokago ge o na le nna mo? Ke ka baka la eng o nyaka go boela nageng ya geno?” Yena a re: “Ga ke hloke selo, eupša ke kgopela o ntumelele gore ke sepele.”

23 Le gona, Modimo a dira gore go be le motho yo mongwe gape yo a lwago le Solomone, e lego Resone morwa wa Eliada, yo a bego a tšhabetše mong wa gagwe e lego Hadadesere kgoši ya Tsoba. 24 Ka morago ga gore Dafida a fenye banna ba Tsoba, Resone o ile a ikgobokeletša banna, a ba moetapele wa sehlopha sa batho bao ba hlaselago ba bangwe. Ka gona ba ile ba ya Damaseko gomme ba dula moo, ke moka ba thoma go buša Damaseko. 25 Go oketša go mathata ao Hadada a bego a a baketše Baisiraele, Resone o ile a ba lenaba la setšhaba seo mehleng ka moka ya ge go buša Solomone. Le gona nakong ya ge a be a buša Siria, o be a hloile setšhaba sa Isiraele.

26 Go be go na le Jeroboama morwa wa Nebata yo e lego Moefuraime wa go tšwa Tsereda, e be e le mohlanka wa Solomone gomme leina la mmagwe e be e le Tserua, yo e bego e le mohlologadi. Le yena o ile a thoma go lwa le kgoši. 27 Lebaka leo le dirilego gore a lwe le kgoši ke le: Solomone o be a agile Mmoto e bile a tswaletše sekgoba lebotong la Motse wa Dafida tatagwe. 28 Jeroboama e be e le monna yo a nago le bokgoni. Ge Solomone a bona gore Jeroboama o be a šoma ka thata, o ile a mmea gore e be molebeledi wa batho ka moka bao ba šomago mošomo wa kgapeletšo ntlong ya Josefa. 29 Ka nako yeo, Jeroboama o ile a tloga Jerusalema gomme moporofeta Ahija wa Moshilo a gahlana le yena tseleng. Ahija o be a apere seaparo se seswa, gomme e be e le bona feela nageng. 30 Ahija o ile a tšea seaparo se seswa seo a bego a se apere a se ripaganya sa tšwa diripa tše 12. 31 Ke moka a re go Jeroboama:

“Tšea diripa tše lesome ka gobane se ke seo Jehofa Modimo wa Isiraele a se boletšego a re: ‘Ke amoga Solomone mmušo diatleng tša gagwe, gomme wena ke tla go fa meloko e lesome. 32 Eupša yena o tla šala ka moloko o tee ka baka la mohlanka wa ka Dafida le ka baka la Jerusalema, e lego motse woo ke o kgethilego melokong gare ga meloko ka moka ya Isiraele. 33 Ke tla dira se ka gobane ba ntlogetše gomme ba khunamela Ashiterothe modimogadi wa Basidone, Kemoshi modimo wa Bamoaba le Milikomo modimo wa Baamoni. E bile ga se ba sepela ditseleng tša ka go swana le Dafida tatago Solomone ka gobane ba be ba dira dilo tše di sa lokago pele ga ka, ba sa latele melao ya ka e bile ba sa thekge dikahlolo tša ka. 34 Eupša nka se mo amoge mmušo ka moka, e bile ke tla dula ke mmeile gore e be moetapele matšatši ka moka a ge a sa phela ka baka la Dafida mohlanka wa ka yoo ke mo kgethilego, ka gobane o ile a kwa ditaelo tša ka le melao ya ka. 35 Eupša ke tla tšeela morwa wa gagwe bogoši gomme ka dira gore wena o buše meloko e lesome. 36 Morwa wa gagwe ke tla mo nea moloko o tee, e le gore setlogolo* sa mohlanka wa ka Dafida se dule se buša Jerusalema, e lego motse woo ke ikgethetšego wona gore ke bee leina la ka moo. 37 Ke tla go tšea gomme wa buša dilo ka moka tšeo o di kganyogago e bile wa ba kgoši ya setšhaba ka moka sa Isiraele. 38 Ge e ba o ka kwa ditaelo tša ka ka moka, wa sepela ditseleng tša ka gomme wa dira se se lokilego pele ga ka ka gore o kwe melao ya ka le ditaelo tša ka, go swana le ge Dafida mohlanka wa ka a ile a dira bjalo, le wena ke tla ba le wena. Ke tla go agela ntlo yeo e tlago go ba gona go ya go ile go swana le ge ke agetše Dafida e bile ke tla go dira gore o buše Isiraele. 39 Ke tla dira gore batho ba sege ditlogolo tša Dafida ka baka la dilo tše mpe tšeo di di dirilego eupša nka se dire gore ba di sege go ya go ile.’”

40 Ka gona Solomone o ile a leka go bolaya Jeroboama. Eupša Jeroboama a tšhabela Egepeta go Shishaka kgoši ya Egepeta gomme a dula moo go fihlela Solomone a hlokofala.

41 Ditaba ka moka tša mabapi le Solomone le dilo ka moka tšeo a di dirilego gotee le bohlale bja gagwe, di ngwadilwe ka pukung ya histori ya ditaba tša Solomone. 42 Solomone o feditše mengwaga e 40 a buša Isiraele ka moka a le Jerusalema. 43 Ke moka Solomone o ile a hlokofala go no swana le borakgolokhukhu ba gagwe gomme a bolokwa Motseng wa Dafida tatagwe. Ke moka morwa wa gagwe Rehoboama a ba kgoši legatong la gagwe.