Puku ya Pele ya Samuele
24 Gateetee ge Saulo a boa go rakediša Bafilisita, o ile a botšwa gore: “Tseba gore Dafida o lešokeng la Ene-gedi.”
2 Ke moka Saulo a tšea banna ba 3 000 (dikete tše tharo) bao ba kgethilwego go Baisiraele ka moka a yo tsoma Dafida le banna bao a bego a na le bona mebotong yeo e nago le maswika, moo go bego go dula dipudi tša naga. 3 Saulo a fihla mašakeng a dinku ao a bego a agilwe ka maswika kgauswi le tsela, moo go bego go na le lewa. O ile a tsena moo gore a ithome, mola Dafida le banna bao a bego a na le bona ba be ba dutše ka garegare ga lewa. 4 Banna bao ba bego ba na le Dafida ba re go yena: “Le ke letšatši leo Jehofa a rego go wena: ‘Ke go fa lenaba la gago gomme wena le dire seo o bonago se lokile.’” Ke moka Dafida a tsoga a khukhuna a ripa morumo wa seaparo sa Saulo sa go hloka matsogo. 5 Eupša ka morago ga moo, Dafida a bethwa ke letswalo* ka gobane o be a ripile morumo wa seaparo sa Saulo sa go hloka matsogo. 6 A re go banna bao a bego a na le bona: “Jehofa a ka se ntumelele gore ke dire selo se go mong wa ka, yena motlotšwa wa Jehofa. E bile a ka se ntumelele ke mo hlasela ka gobane ke motlotšwa wa Jehofa.” 7 Ge Dafida a re’alo, banna bao a bego a na le bona ba ile ba fela matla, gomme a se ba dumelele gore ba hlasele Saulo. Ke moka Saulo yena a tšwa ka leweng gomme a sepela.
8 Ka morago Dafida a tšwa ka leweng ke moka a goeletša Saulo a re: “Kgoši mong wa ka!” Ge Saulo a lebelela morago, Dafida a khunama hlogo ya gagwe e kgwathile fase go bontšha gore o a mo hlompha. 9 Dafida a re go Saulo: “Ke ka baka la’ng o theetša dilo tšeo batho ba di bolelago ge ba re: ‘Tseba gore Dafida o nyaka go go kweša bohloko’? 10 Le wena o bone gore lehono Jehofa o mphile sebaka sa gore ke go hlasele ka leweng. Eupša ge yo mongwe a be a re ke go bolaye, ke ile ka go kwela bohloko gomme ka re: ‘Nka se hlasele mong wa ka, ka gobane ke motlotšwa wa Jehofa.’ 11 Mong wa ka, bona ke swere morumo wa seaparo sa gago sa go hloka matsogo, ka gobane ge ke be ke ripa morumo wa seaparo sa gago ga se ka go bolaya. Bjale gona o a bona gore ga se ka ikemišetša go go kweša bohloko goba go go hlanogela. Le gona ga se ka go direla selo se sebe, eupša wena o duletše go nnyaka gore o mpolaye. 12 Anke Jehofa a ahlole gore magareng ga ka le wena ke mang yo a dirago se se lokilego, gomme anke Jehofa a ntefeletše go wena, eupša nna nka se go hlasele. 13 Go etša ge seema sa kgale se re: ‘Motho yo mobe o dira dilo tše mpe,’ eupša ge e le nna nka se go hlasele. 14 Ke ka baka la’ng kgoši ya Isiraele e kitimišana le nna mola ke swana le mpša e hwilego goba letsetse? 15 Anke Jehofa e be yena a re ahlolago. O tla hlahloba taba gomme a nkemelela, a nkahlola le go mphološa go wena.”
16 Ge Dafida a fetša go botša Saulo mantšu ao, Saulo a re: “Na ke wena o bolelago Dafida morwa wa ka?” Ke moka Saulo a thoma go kgitla sello. 17 A re go Dafida: “Wena o lokile go mphala, ka gobane o ntshwere gabotse le ge nna ke be ke go swere gampe. 18 Lehono gona o mpontšhitše gore o lokile ka go se mpolaye, le ge Jehofa a be a go file sebaka sa gore o mpolaye. 19 Ke mang yo a ka hwetšago lenaba la gagwe gomme a le tlogela a se le gobatše? Jehofa o tla go direla dilo tše dibotse, ka baka la dilo tšeo o ntiretšego tšona lehono. 20 Ga bjale ke tseba gabotse gore o tlo ba kgoši gomme o tlo buša Isiraele nako e telele. 21 Bjale nkenele ka Jehofa gore o ka se ke wa bolaya ditlogolo tša ka ka morago ga gore ke hlokofale le gore o ka se dire gore leina la ka le lebalwe bathong ba gešo.” 22 Dafida a enela Saulo, ke moka Saulo a ya lapeng la gagwe. Eupša Dafida le banna bao a bego a na le bona ba ya lefelong leo ba bego ba ikutile go lona.