Doiteronomio

12 “Ye ke melao le ditaelo tšeo le swanetšego go di latela mehleng ka moka ya ge le sa phela nageng yeo Jehofa Modimo wa borakgolokhukhu ba lena a tlago go le nea yona gore e be ya lena. 2 Ge le raka ditšhaba gomme le tšea naga ya tšona, le fediše mafelo ka moka moo di bego di hlankela medimo ya tšona, e ka ba e le dithabeng tše telele goba mebotong, goba ka tlase ga mehlare le ge e le efe e megolo. 3 Le phušoleng dialetare tša tšona, le pšhatle maswika a tšona ao di a rapelago, le fiše dikota tša tšona tše kgethwa le go fediša diswantšho tše di betlilwego tša medimo ya tšona, gomme le phumole maina a medimo ya tšona mafelong ao.

4 “Le se ke la rapela Jehofa Modimo wa lena ka tsela yeo ditšhaba tšeo di rapelago medimo ya tšona. 5 Eyang lefelong le ge e le lefe leo Jehofa Modimo wa lena a kgethago gore leina la gagwe le be go lona, le mo hlankele lefelong leo a tlago go le kgetha gore a dule go lona gare ga meloko ya lena ka moka. 6 Lefelong leo ke moo le tlago go tliša dibego tša lena tša go fišwa, dihlabelo tša lena, dikarolo tša lena tša lesome, dibego tša lena tša go phetha dikeno, dibego tša lena tša go ithaopa, maitšibulo a lena a dikgomo le a dinku le dipudi gotee le selo le ge e le sefe seo le nyakago go se nea Modimo. 7 Lena le ba malapa a lena le je diphoofolo tšeo le dirilego dihlabelo ka tšona le le pele ga Jehofa Modimo wa lena, le thabele dilo ka moka tšeo le di dirilego ka gobane Jehofa Modimo wa lena o le šegofaditše.

8 “Le se ke la dira dilo tšeo re di dirago mo lehono, moo motho yo mongwe le yo mongwe a dirago seo a bonago se lokile, 9 ka gobane ga se la tšwa le fihla lefelong leo le tlago go dula go lona leo Jehofa Modimo wa lena a tlago go le nea lona. 10 Ge le tshela Noka ya Jorodane gomme le dula nageng yeo Jehofa Modimo wa lena a tlago go le nea yona gore e be ya lena, o tla le šireletša go manaba a lena ka moka ao a le dikologilego, ke moka le tla dula moo le šireletšegile. 11 Le tla tliša dilo ka moka tšeo ke le laelago gore le di tliše lefelong leo Jehofa Modimo wa lena a tlago go le kgetha gore le mo hlankele go lona,* e lego dibego tša lena tša go fišwa, dihlabelo tša lena, dikarolo tša lena tša lesome, dibego ka moka tša go phetha dikeno tšeo le di diretšego Jehofa le selo le ge e le sefe seo le nyakago go se nea Modimo. 12 Le thabeng pele ga Jehofa Modimo wa lena, lena le barwa le barwedi ba lena, le makgoba a lena a banna le a basadi gotee le Balefi bao ba dulago metseng ya lena, ka gobane bona ga ba hwetše karolo goba bohwa go swana le lena. 13 Le itlhokomele gore le se ke la neela dibego tša lena tša go fišwa lefelong le ge e le lefe leo le ka le kgahlago. 14 Le neele dibego tša lena tša go fišwa feela lefelong leo Jehofa a tlago go le kgetha nageng ya o mongwe wa meloko ya lena, gomme gona moo le dire dilo ka moka tšeo ke le laelago tšona.

15 “Neng le neng ge le nyaka go ja nama le hlabe phoofolo go e mengwe ya metse ya lena gomme le e je, le thabele tšhegofatšo yeo Jehofa Modimo wa lena a le neilego yona. E ka jewa ke motho yo a sa hlwekago le yo a hlwekilego, go swana le ge le eja nama ya kgama.* 16 Eupša le se ke la ja madi a yona, le a tšhollele fase go swana le meetse. 17 Mo metseng ya lena le ka se dumelelwe go ja karolo ya lesome ya mabele a lena, beine ya lena e mpsha, makhura a lena, maitšibulo a lena a dikgomo le a dinku le dipudi, dibego le ge e le dife tša go phetha dikeno, dibego tša lena tša go ithaopa goba selo le ge e le sefe seo le nyakago go se nea Modimo. 18 Dilo tše le di je le le pele ga Jehofa Modimo wa lena lefelong leo Jehofa Modimo wa lena a tlago go le kgetha. Di jewe ke lena, barwa ba lena, barwedi ba lena, makgoba a lena a banna le a basadi le Balefi bao ba dulago metseng ya lena. Ke moka, pele ga Jehofa Modimo wa lena le thabele dilo ka moka tšeo le di dirilego. 19 Le itlhokomele gore le se ke la lebala Balefi ge feela le sa dula nageng ya lena.

20 “Ge Jehofa Modimo wa lena a oketša naga ya lena bjalo ka ge a tshepišitše, ge e ba le nyaka go ja nama le e je nako e nngwe le e nngwe ge le nyaka go eja. 21 Ge e ba lefelo leo Jehofa Modimo wa lena a kgethago gore le mo hlankele go lona le le kgole le lena, gona le hlabe tše dingwe tša dikgomo tša lena goba tše dingwe tša dinku le dipudi tšeo Jehofa a le neilego tšona, feela bjalo ka ge a le laetše, gomme le di jele metseng ya lena neng le neng ge le nyaka go ja nama. 22 Le ka eja bjalo ka ge le eja nama ya kgama. Motho yo a hlwekilego le yo a sa hlwekago a ka eja. 23 Le kgonthišetše gore ga le je madi, ka gobane madi ke bophelo. Ka gona le se ke la ja nama ge e ba e na le madi. 24 Le se ke la a ja. Le a tšhollele fase go swana le meetse. 25 Le se ke la a ja, e le gore dilo di le sepelele gabotse, lena le bana ba lena bao le tlago go ba le bona, ka gobane le tla be le dira seo se lokilego pele ga Jehofa. 26 Le tšee feela dimpho tša lena tše kgethwa le dibego tša lena tša go phetha dikeno ge le eya lefelong leo Jehofa a tlago go le kgetha. 27 Ge le le moo le neele dibego tša lena tša go fišwa, e lego nama le madi. Le di neele aletareng ya Jehofa Modimo wa lena. Madi a dihlabelo tša lena le a tšhollele ka thoko ga aletare ya Jehofa Modimo wa lena, eupša nama yona le ka e ja.

28 “Le netefatše gore le kwa mantšu a ka moka ao ke le laelago ona, e le gore dilo di dule di le sepelela gabotse, lena le bana ba lena bao le tlago go ba le bona, ka gobane le dira seo se lokilego le se sebotse pele ga Jehofa Modimo wa lena.

29 “Ge Jehofa Modimo wa lena a fediša ditšhaba tšeo le yago go di amoga naga ya tšona gore le dule go yona, 30 le itlhokomele gore le se ke la dira dilo tšeo ditšhaba tšeo di di dirago. Le se ke la botšiša ka medimo ya tšona la re: ‘Ditšhaba tše di be di hlankela medimo ya tšona bjang? Le rena re nyaka go dira seo di se dirago.’ 31 Le se ke la hlankela Jehofa Modimo wa lena ka tsela yeo, ka gobane ditšhaba tšeo ge di be di hlankela medimo ya tšona di dirile dilo ka moka tše di šišimišago Jehofa le tšeo a di hloilego. Le gona batho ba ditšhaba tšeo ba fiša barwa le barwedi ba bona gore e be dihlabelo tša medimo ya bona. 32 Le netefatše gore le dira dilo ka moka tšeo ke le laetšego tšona. Le se ke la di oketša goba la di fokotša.