Numeri
27 Ke moka gwa tla barwedi ba Tselofehadi morwa wa Hefere. Hefere e be e le morwa wa Gileada, Gileada e be e le morwa wa Makiri, Makiri e be e le morwa wa Manase. Bona e be e le ba moloko wa Manase morwa wa Josefa. Maina a barwedi ba Tselofehadi e be e le Maala, Noa, Hogola, Milika le Thiritsa. 2 Ba ema pele ga Moshe, moperisita Eleasara, dikgošana le setšhaba ka moka mojakong wa taberenakele, ba re: 3 “Tatago rena o hwetše lešokeng, eupša o be a se gare ga batho bao ba thekgago Kora bao ba bego ba elwa le Jehofa, yena o hwile ka baka la dibe tša gagwe e bile o be a se na barwa. 4 Ke ka baka la’ng leina la tatago rena le tlošwa lapeng la gagwe feela ka gobane a se na morwa? Hle re neeng bohwa go no swana le banababo tatago rena.” 5 Ka gona Moshe a iša taba ya bona pele ga Jehofa.
6 Ke moka Jehofa a re go Moshe: 7 “Barwedi ba Tselofehadi ba bolela nnete. Ba nee bohwa gare ga banababo tatago bona, gomme o ba nee bohwa bjo tatago bona a bego a swanetše go bo hwetša. 8 O botše Baisiraele o re: ‘Ge monna a ka hwa a se na morwa, gona le neeng morwedi wa gagwe bohwa bja gagwe. 9 Ge e ba a se na morwedi, gona bohwa bja gagwe le bo neeng banababo. 10 Ge e ba a se na banababo, gona le nee banababo tatagwe bohwa bja gagwe. 11 Ge e ba tatagwe a se na banababo, gona bohwa bja gagwe le bo neeng yo a tswalanago le yena kgauswi ka madi gomme a bo tšee e be bja gagwe. Phetho ye e tla ba molao go Baisiraele, feela bjalo ka ge Jehofa a laetše Moshe.’”
12 Ka morago Jehofa a re go Moshe: “Rotogela thabeng ye ya Abarimi gomme o bone naga yeo ke tlago go e nea Baisiraele. 13 Ge o e bone, ke moo o tlago go hwa gomme wa bolokwa le batho ba geno, go no swana le Arone ngwaneno. 14 Ka gobane ge setšhaba se be se elwa le nna kua lešokeng la Tsini, le ile la se kwe taelo ya ka, ka go se bontšhe batho gore ke yo mokgethwa ge ke be ke ba nea meetse. Ao ke meetse a Meriba kua Kadeshe lešokeng la Tsini.”
15 Ke moka Moshe a re go Jehofa: 16 “Anke wena Jehofa Modimo yo a neago batho ka moka bophelo o kgethe monna yo a tlago go hlokomela setšhaba se, 17 yoo a tlago go se etelela pele dilong ka moka tšeo di se dirago, e le gore setšhaba sa Jehofa se se ke sa swana le dinku tšeo di se nago modiši.” 18 Ka gona Jehofa a re go Moshe: “Tšea Joshua morwa wa Nuni, e lego monna yo a nago le bokgoni, gomme o bee diatla tša gago godimo ga gagwe, 19 o mo emiše pele ga moperisita Eleasara le pele ga setšhaba gomme o mmee pele ga bona gore e be moetapele. 20 O mo nee a mangwe a matla ao o nago le ona, e le gore setšhaba ka moka sa Baisiraele se tle se mo theetše. 21 O tla ema pele ga moperisita Eleasara gomme yena o tla mmotšišetša go Jehofa a diriša Urime. Batho ka moka ba tla kwa taelo ya gagwe, yena le Baisiraele ka moka e lego setšhaba ka moka.”
22 Moshe a dira feela bjalo ka ge Jehofa a mo laetše. Ke moka a tšea Joshua a mo emiša pele ga moperisita Eleasara le pele ga setšhaba ka moka, 23 a bea diatla tša gagwe godimo ga gagwe gomme a mmea gore e be moetapele, feela bjalo ka ge Jehofa a boletše a diriša Moshe.