Ekisodo

18 Bjale Jethero moprista wa Midiane, e lego ratswale wa Moshe, a kwa ka tšohle tšeo Modimo a di diretšego Moshe le setšhaba sa gabo sa Baisiraele, le kamoo Jehofa a ntšhitšego Baisiraele Egepeta. 2 Ka gona, Jethero a tšea Tsipora mosadi wa Moshe ka morago ga ge Moshe a be a mmušeditše gae, 3 a tšea le barwa ba babedi ba Tsipora, yo mongwe wa bona leina la gagwe e be e le Gerishome.* Ge Moshe a be a mo reela leina leo o be a itše: “Ke ka gobane ke dutše nageng yeo e sego ya gešo.” 4 Leina la yo mongwe e be e le Eliesere.* Ge Moshe a be a mo reela leina le o be a itše: “Ke ka gobane Modimo wa botate ke mothuši wa ka ka ge a mphološitše go Farao yo a bego a nyaka go mpolaya.”

5 Ka gona Jethero, barwa ba Moshe le mosadi wa Moshe ba tla go Moshe lešokeng moo a bego a hlomile tente gona, thabeng ya Modimo wa nnete. 6 Ke moka a romela molaetša go Moshe a re: “Nna Jethero ratswalago, ke tla go wena ke na le mosadi wa gago le barwa ba gago ba babedi.” 7 Moshe a napa a tšwa a yo gahlanetša ratswalagwe, a inama a ba a mo khisa. Ka moka ga bona ba botšišana tša maphelo. Ka morago ga moo ba ya ka tenteng.

8 Moshe a anegela ratswalagwe dilo ka moka tšeo Jehofa a di dirilego Farao le Baegepeta e le gore a thuše Baisiraele, a mmotša le mathata ka moka ao a ba wetšego ge ba be ba le tseleng le kamoo Jehofa a ilego a ba phološa. 9 Jethero a thaba ge a be a ekwa ka dilo tše dibotse tšeo Jehofa a di diretšego Baisiraele ge a be a ba phološa kua Egepeta. 10 Ka gona Jethero a re: “A go retwe Jehofa, yena yo a le phološitšego Egepeta le go Farao, yena yo a phološitšego setšhaba sa gagwe go Baegepeta bao ba bego ba ba gatelela. 11 Bjale gona ke a bona gore Jehofa ke yo mogolo go feta medimo e mengwe ka moka. Ka gobane o ile a phološa batho ba gagwe ge Baegepeta bao ba ikgogomošago ba be ba ba swara gampe.” 12 Ke moka Jethero, e lego ratswale wa Moshe, a direla Modimo dihlabelo a ba a mo tlišetša sebego sa go fišwa. Arone le banna ba bagolo ba Isiraele ka moka ba tla ba ja dijo le ratswale wa Moshe pele ga Modimo wa nnete.

13 Letšatšing le le latelago Moshe a dula fase go swana le matšatšing a mangwe e le gore a ahlolele setšhaba. Batho ba be ba e hlwa ba eme pele ga gagwe go tloga mesong go fihlela mantšiboa. 14 Ratswale wa Moshe a bona dilo ka moka tšeo Moshe a bego a di direla setšhaba. Ka gona a re go yena: “Ke ka baka la’ng o ipolaiša mošomo? Go re’ng e le wena feela o dutšego mo gomme batho ka moka ba eme pele ga gago go tloga mesong go fihlela mantšiboa?” 15 Ke moka Moshe a re go ratswalagwe: “Ke ka gobane setšhaba se tla go nna e le gore se tlo nyaka tlhahlo ya go tšwa go Modimo. 16 Ge batho ba babedi ba na le bothata ba tla go nna gomme ba mpotša ka bjona, gomme nna ka ahlola gore ke mang a nago le molato le gona ke ba botša melao le ditaelo tša Modimo wa nnete.”

17 Ge a realo ratswale wa gagwe a re go yena: “Tsela yeo o dirago dilo ka yona ga se yona. 18 Wena le batho bao o nago le bona le tlo fela matla ka gobane mošomo wo o o dirago ke o mogolo kudu go wena. O ka se kgone go o dira o nnoši. 19 Ntheetše hle. Ke tla go eletša gomme Modimo o tla go šegofatša. Wena eba moemedi wa setšhaba se pele ga Modimo wa nnete, o be o iše ditaba go Modimo wa nnete. 20 O se botše ditaelo le melao ya Modimo, o be o se tsebiše kamoo se swanetšego go phela ka gona le mošomo wo se swanetšego go o dira. 21 Mo setšhabeng o kgethe banna bao ba kgonago go ahlola, bao ba hlomphago Modimo kudu, bao ba tshepegago e bile ba sa nyakego go hwetša tšhelete ka botsotsi. O ba bee gore e be balaodi ba batho ba dikete, balaodi ba batho ba makgolo, balaodi ba batho ba masomehlano le balaodi ba batho ba masome. 22 Ba ahlole batho ge go tšwelela bothata. Taba e nngwe le e nngwe e kgolo ba e tliše go wena, eupša taba e nngwe le e nngwe e nyenyane bona ba tla e ahlola. Iphokoletše mošomo gomme o ba tlogele gore ba go thuše. 23 Ge o ka dira ka mokgwa wo e bile e le seo Modimo a go laelago sona, gona o tla kgona go dira mošomo wo gomme batho ba tla ikela magaeng a bona ba kgotsofetše.”

24 Moshe a napa a theetša seo ratswalagwe a se boletšego gomme a dira dilo ka moka tšeo a mmoditšego tšona. 25 Moshe a kgetha banna bao ba kgonago go ahlola go Baisiraele ka moka, gomme a ba kgetha gore ba etelele setšhaba pele. Ke moka ba bangwe a ba dira balaodi ba batho ba dikete, ba bangwe a ba dira balaodi ba batho ba makgolo, ba bangwe a ba dira gore e be balaodi ba batho ba masomehlano mola ba bangwe a ba dirile balaodi ba batho ba masome. 26 Ka gona ba ile ba ahlolela setšhaba ge go be go tšwelela bothata. Taba yeo e bego e le thata ba be ba e tliša go Moshe, eupša taba e nngwe le e nngwe e nyenyane ba be ba e ahlola. 27 Ka morago ga moo Moshe a felegetša ratswalagwe, gomme ratswalagwe a tloga a ya nageng ya gabo.