Jeremia

24 Ke moka Jehofa a mpontšha dimanki tše pedi tša mago* di beilwe ka pele ga tempele ya Jehofa, ka morago ga ge Kgoši Nebukadinetsara wa Babilona a thopile Jekonia morwa wa Jehoyakima kgoši ya Juda, dintona tša Juda le ditsebi tša mošomo wa diatla gotee le batho bao ba šomago ka tshipi, o ile a ba tšea Jerusalema gomme a ba iša bothopša kua Babilona. 2 Ge e le manki o tee o be o na le mago a mabotse kudu, ao a swanago le mago ao a butšwago pele gomme ka manking o mongwe go be go na le mago ao a sa kgahlišego. E be e le a mabe kudu moo e lego gore go be go se na motho yo a ka a jago.

3 Ke moka Jehofa a mpotšiša a re: “Jeremia, o bona’ng?” Nna ka re: “Ke bona mago gomme mago a mabotse ke a mabotsebotse, eupša mago ao a sa kgahlišego ke a mabe le go feta, moo e lego gore go ka se be le motho yo a ka a jago.”

4 Ke moka Jehofa a bolela le nna a re: 5 “Se ke seo nna Jehofa Modimo wa Isiraele ke se bolelago: ‘Batho bao ba thopilwego ba Juda, bao ke ba rakilego nageng ye, ka ba iša nageng ya Bakaladea, ba swana le mago a a mabotse gomme ke tla ba direla dilo tše dibotse. 6 Ke tla dula ke ba lebeletše gore ke ba direle dilo tše dibotse e bile ke tla ba bušetša nageng ye. Ke tla dira gore dilo di ba sepelele gabotse, e bile nka se ba fediše, ke tla ba bjala gomme nka se ba tumole. 7 Ke tla dira gore dipelo tša bona di nyake go ntseba gabotse, di tsebe gore ke nna Jehofa. Bona e tla ba batho ba ka gomme nna ke tla ba Modimo wa bona, ka gobane ba tla boela go nna ka dipelo tša bona ka moka.

8 “‘Eupša ge e le mago ao a sa kgahlišego, ao e lego a mabe kudu moo e lego gore ga go na motho yo a ka a jago, Jehofa o bolela mabapi le ona gore: “Bjale ge e le Kgoši Tsedekia wa Juda, dikgošana tša gagwe, batho ba Jerusalema bao ba šetšego bao ba dulago nageng ye gotee le bao ba dulago nageng ya Egepeta, 9 ka moka ga bona ke tla ba lebelela go swana le mago ao. Ke tla dira gore batho ba ditšhaba ka moka lefaseng, ba tšhoge ge ba bona masetlapelo ao ke tlago go ba tlišetša ona. Batho ba tla ba kwera, ba tla bolela ka bona e le mohlala wa batho bao ba ilego ba welwa ke masetlapelo. Le gona batho ba tla ba kwera le go ba roga, kae le kae mo ke ba phatlalaleditšego gona. 10 Ke tla ba bolaya ka sabola, tlala le leuba la bolwetši, go fihlela ba fela nageng yeo ke e neilego bona le borakgolokhukhu ba bona.”’”