Doiteronomio
29 A ke mantšu a kgwerano yeo Jehofa a laetšego Moshe gore a e dire le setšhaba sa Baisiraele nageng ya Moaba, ka ntle le kgwerano yeo a šetšego a e dirile le bona kua Horebe.
2 Ke moka Moshe a bitša Baisiraele ka moka a re go bona: “Le bone dilo ka moka tšeo Jehofa a di dirilego pele ga mahlo a lena kua nageng ya Egepeta, e lego dilo tšeo a di dirilego Farao le bahlanka ba gagwe ka moka gotee le naga ya gagwe ka moka, 3 e lego dikotlo tše kgolo tšeo le di bonego, dipontšho tšeo tše kgolo le mehlolo. 4 Eupša go ba go fihla lehono le, Jehofa ga se a dira gore le kwešiše ka mo go tseneletšego dilo tšeo le di bonego le tšeo le di kwelego. 5 Modimo o re: ‘Ge ke be ke le hlahla lešokeng ka mengwaga e 40, diaparo tša lena ga se tša ka tša hlagala, le dieta tša lena ga se tša ka tša senyega. 6 Le be le sa je senkgwa, le sa nwe beine goba bjala, eupša ke ile ka tšwela pele ke le hlokomela e le gore le tsebe gore ke nna Jehofa Modimo wa lena.’ 7 Mafelelong le ile la tla lefelong le gomme Sihoni kgoši ya Heshibone le Ogo kgoši ya Bashani ba tla ba lwa le rena, eupša ra ba fenya. 8 Ka morago ga moo ra tšea naga ya bona ra e nea moloko wa Rubeni, wa Gada le seripa sa moloko wa Manase gore e be bohwa bja bona. 9 Ka gona ekwang mantšu a kgwerano ye gomme le a lateleng, e le gore dilo ka moka tšeo le di dirago di tle di le sepelele gabotse.
10 “Ka moka ga lena le eme pele ga Jehofa Modimo wa lena lehono, lena le lego dihlogo tša meloko ya lena, banna ba lena ba bagolo, banna bao ba le etelelago pele, monna yo mongwe le yo mongwe wa Isiraele, 11 bana ba lena, basadi ba lena le batho bao e sego Baisiraele bao ba dulago ditenteng tša lena, go tloga ka yo a le rwalelago dikgong go fihla ka yo a le gelago meetse. 12 Le eme mo gore le ikane gore le tsena kgweranong le Jehofa Modimo wa lena, e lego kgwerano yeo Jehofa Modimo wa lena a e dirago le lena lehono, 13 e le gore lehono a tiišetše gore le be setšhaba sa gagwe le gore yena e be Modimo wa lena, feela bjalo ka ge a le tshepišitše le ka ge a ile a enela borakgolokhukhu ba lena e lego Aborahama, Isaka le Jakobo.
14 “Bjale kgwerano ye le keno ye ga ke di dire le lena feela, 15 eupša ke di dira le bao ba emego mo le rena lehono pele ga Jehofa Modimo wa rena le bao ba se nago le rena mo lehono. 16 Ka gobane le tseba gabotse kamoo re bego re phela ka gona nageng ya Egepeta le kamoo re ilego ra feta gare ga ditšhaba tša go fapafapana mo tseleng. 17 Le gona le be le fela le bona dilo tša bona tše di šišimišago, e lego medimo ya bona e šišimišago yeo e dirilwego ka kota le leswika, le ka silifera le gauta. 18 Le hlokomele gore lehono mo gare ga lena go se be le lapa goba moloko, goba monna goba mosadi yo a ka hlanogelago Jehofa Modimo wa rena, gomme a yo hlankela medimo ya ditšhaba tšeo, e le gore mo gare ga lena go se ke gwa ba le modu wo o tšweletšago semela sa mpholo le lengana.*
19 “Eupša ge e ba motho a ekwa mantšu a keno ye, gomme a itheta ka pelong, a re: ‘Ga go na seo se tlago go ntiragalela,’ gomme seo sa dira gore motho yo mongwe le yo mongwe yo a phelago le yena a fedišwe, 20 gona Jehofa a ka se nyake go mo lebalela, go e na le moo Jehofa o tla galefela motho yoo, gomme dilo ka moka tše mpe tšeo di ngwadilwego ka pukung ye di tla mo diragalela, e bile Jehofa o tla phumola leina la motho yoo mo lefaseng. 21 Ka gona Jehofa o tla mo kgetha mo go meloko ka moka ya Isiraele, gomme a dira gore a welwe ke dilo tše tše mpe, a rogakwe ka tsela yeo bohle bao ba sa latelego kgwerano ba tlago go rogakwa ka yona, e lego kgwerano yeo e ngwadilwego ka mo pukung ye ya Molao.
22 “Moloko wa lena o tlago, e lego bana ba lena bao ba tlago go tla ka morago, gotee le batho bao e sego Baisiraele bao ba tšwago nageng ya kgole, ba tla bona dikotlo tšeo Jehofa a di rometšego nageng ye. 23 O rometše sebabole,* letswai le phišo, e le gore go se ke gwa bjalwa selo nageng ka moka, e bile go se ke gwa mela selo go yona. E tla senywa go swana le Sodoma le Gomora, Adema le Tseboima, e lego tšeo Jehofa a di sentšego a galefile kudu. 24 Bana ba lena, batho bao e sego Baisiraele le batho ba ditšhaba ka moka ba tla re: ‘Ke ka baka la’ng Jehofa a dirile dilo tše nageng ye? Ke ka baka la’ng a galefile ka tsela ye?’ 25 Ke moka batho ba tla re: ‘Ke ka gobane ba tlogetše kgwerano ya Jehofa Modimo wa borakgolokhukhu ba bona, yeo a e dirilego le bona ge a be a ba ntšha nageng ya Egepeta. 26 Eupša ba ile ba ya go hlankela medimo e mengwe e bile ba e khunamela, e lego medimo yeo ba bego ba sa e tsebe yeo yena a bego a se a ba dumelela gore ba e rapele. 27 Ka gona Jehofa a galefela naga yeo ka go e tlišetša thogako ka moka yeo e ngwadilwego ka pukung ye ya Molao. 28 Ke ka baka leo Jehofa a ba tlošitšego nageng ya bona a galefile kudu, gomme a ba iša nageng e nngwe moo ba sa lego gona le lehono.’
29 “Dilo tšeo di sego tša utollwa ke tša Jehofa Modimo wa rena, eupša tšeo di utolotšwego ke tša rena le bana ba rena go ya go ile, e le gore re latele mantšu ka moka a Molao wo.